Hyderabad: ఓర్నీ.. ఇదేం ట్రిక్‌రా బాబు.. నివ్వెరపోయిన జూబ్లిహిల్స్ పోలీసులు..

హైదరాబాద్‌లోని జూబ్లీ హిల్స్‌లో పోలీసులు తనిఖీలు నిర్వహిస్తుండగా, ట్రాఫిక్ చలాన్లు తప్పించుకునేందుకు ఒక వాహనదారుడు ఉపయోగించిన అత్యంత వినూత్నమైన మోసం వెలుగులోకి వచ్చింది. ఒకే కారుకు రెండు నంబర్ ప్లేట్‌లను మార్చుకునే ప్రత్యేకమైన ఎలక్ట్రానిక్ సిస్టమ్‌ను గుర్తించి పోలీసులు ఆశ్చర్యానికి లోనయ్యారు. కోటి రూపాయల విలువైన BMW కారులో ఈ అక్రమ ఏర్పాట్లు ఉండటం పోలీసులను నివ్వెరపరిచింది. ఈ ఘటన జూబ్లీ హిల్స్ పోలీసుల చెకింగ్స్ సమయంలో బయటపడింది. మద్యం మత్తులో కారు నడుపుతున్న డ్రైవర్‌ను పోలీసులు ఆపినప్పుడు, అతని కారులో అమర్చిన నంబర్ ప్లేట్ మార్పిడి వ్యవస్థను గుర్తించారు. కారు డ్రైవింగ్ సీటు దగ్గర అమర్చిన ఒక స్విచ్ ద్వారా నంబర్ ప్లేట్ స్వయంచాలకంగా మారిపోతుందని పోలీసులు కనుగొన్నారు. ఉదాహరణకు, కారుపై 7097 అనే నంబర్ ఉన్నప్పుడు, స్విచ్ నొక్కగానే అది వెంటనే STS99గా మారడం పోలీసులు ప్రత్యక్షంగా చూశారు. వాస్తవానికి, కారు అసలు నంబర్ TS 9 FQ 9999 కాగా, స్విచ్ ద్వారా దానిని DL 6 CM 7097గా మార్చే సామర్థ్యం ఈ వ్యవస్థకు ఉంది. ఇలా వేర్వేరు నంబర్ ప్లేట్‌లతో ట్రాఫిక్ చలాన్ల నుంచి తప్పించుకోవడానికి ఈ డ్రైవర్ ప్రయత్నించినట్లు దర్యాప్తులో వెల్లడైంది.

పోలీసులు ఈ వ్యవస్థను తొలిసారి చూసి షాక్ అయ్యారు. వాహనదారుడిని అరెస్ట్ చేసి, కేసు నమోదు చేశారు. అతని కారును స్వాధీనం చేసుకుని పోలీస్ స్టేషన్‌కు తరలించారు. ఈ తరహా మోసంతో గతంలో ఎన్నిసార్లు తప్పించుకున్నాడనే కోణంలో జూబ్లీ హిల్స్ పోలీసులు దర్యాప్తును ముమ్మరం చేశారు. కేవలం పోలీసులు మాత్రమే కాకుండా, ఈ కొత్త మోసపూరిత పద్ధతి గురించి తెలిసిన ప్రజలు కూడా ఆశ్చర్యం వ్యక్తం చేస్తున్నారు. ట్రాఫిక్ చలాన్లు తప్పించుకునేందుకు కంత్రిగాళ్లు చేస్తున్న ఇలాంటి ప్రయత్నాలు పోలీసులకు సరికొత్త సవాళ్లను విసురుతున్నాయి. ఈ ఘటనతో వాహనదారులు ఇలాంటి అక్రమ పద్ధతులకు పాల్పడకుండా జాగ్రత్త పడాలని పోలీసులు హెచ్చరించారు.