భానుడి భగభగలు..! ఎండల్లో ఎలాంటి డ్రింక్స్ తాగాలి? వేటికి దూరంగా ఉండాలి?

Summer Best Drinks

ఎండలు రోజురోజుకూ తీవ్రమవుతుండటంతో బాడీ డీ-హైడ్రేషన్ బారిన పడకుండా ఉండటం చాలా ముఖ్యం. ఈ తీవ్రమైన వేడి నుంచి ఉపశమనం పొందేందుకు, శరీరానికి తక్షణ శక్తిని, చలవను ఇచ్చే సహజసిద్ధమైన పానీయాలను ఎక్కువగా తీసుకోవాలి. రోజువారీగా తీసుకునే మంచినీటితో పాటు ఎలక్ట్రోలైట్లు పుష్కలంగా ఉండే కొబ్బరిబొండం నీళ్లు, శరీర వేడిని తగ్గించే మజ్జిగ, నిమ్మరసం, సబ్జా గింజల నీళ్లు, చెరకు రసం వంటివి అద్భుతంగా పనిచేస్తాయి. ఇవి శరీరంలో కోల్పోయిన లవణాలను తిరిగి భర్తీ చేయడమే కాకుండా, వడదెబ్బ తగలకుండా కాపాడతాయి. ఇంట్లోనే తయారుచేసుకునే పుదీనా రసం, రాగి జావ, వివిధ రకాల తాజా పండ్ల రసాలు (షుగర్ లేకుండా) వేసవిలో అమృతంలా ఉపయోగపడతాయి.

ఏ పానీయం పడితే అది తాగితే..

అయితే, దాహం వేస్తోందని మార్కెట్లో దొరికే ఏ పానీయం పడితే అది తాగితే ఆరోగ్యం ముప్పులో పడుతుంది. ముఖ్యంగా ఎండ తీవ్రత ఎక్కువగా ఉన్నప్పుడు ఆర్టిఫిషియల్ స్వీట్నర్స్, ప్రిజర్వేటివ్స్ ఉండే కార్బోనేటెడ్ కూల్ డ్రింక్స్ (సోడాలు), ప్యాక్డ్ జ్యూస్‌లకు పూర్తిగా దూరంగా ఉండాలి. వీటిలో ఉండే అధిక చక్కెరలు శరీరాన్ని మరింత డీహైడ్రేట్‌కు గురిచేస్తాయి. అదేవిధంగా చాలామంది ఎండ నుంచి రాగానే ఐస్ ముక్కలు వేసిన చిక్కటి కాఫీ, టీలు లేదా ఆల్కహాల్ వంటివి తీసుకుంటారు. వీటిలో ఉండే కెఫిన్, ఆల్కహాల్ గుణాలు మూత్ర విసర్జనను పెంచి, శరీరంలోని నీటి శాతాన్ని వేగంగా తగ్గించేస్తాయి. కాబట్టి ఫ్రిజ్‌లో పెట్టిన అత్యంత చల్లటి నీటి కంటే, కుండ నీటిని తాగడం ఆరోగ్యానికి ఎంతో మేలు చేస్తుంది.

నీటితోపాటు హెల్దీ డ్రింక్స్..

ఎండకాలంలో కేవలం దాహం వేసినప్పుడే కాకుండా, ప్రతి గంటకు ఒకసారి నీళ్లు లేదా పైన పేర్కొన్న హెల్తీ డ్రింక్స్ తాగుతూ ఉండాలి. ముఖ్యంగా పిల్లలు, వృద్ధులు బయటకు వెళ్లేటప్పుడు తప్పనిసరిగా వాటర్ బాటిల్ లేదా నిమ్మరసం వెంట తీసుకెళ్లడం మంచిది. మార్కెట్లో లభించే రంగు రంగుల ఐస్ గోలాలు, రోడ్డు పక్కన కలుషిత నీటితో చేసే పానీయాల వల్ల టైఫాయిడ్, గ్యాస్ట్రో ఎంటరైటిస్ వంటి ఇన్ఫెక్షన్లు వచ్చే ప్రమాదం ఉంది. కాబట్టి ఈ వేసవిలో ‘కూల్’గా, హెల్తీగా ఉండాలంటే కెమికల్ డ్రింక్స్‌ను పక్కనబెట్టి, మన ఇంటి ముంగిట దొరికే సహజ పానీయాలనే అమృతంగా భావించి సేవించండి.