Telangana: తెలంగాణ రైతులకు గుడ్‌న్యూస్.. పారా బాయిల్డ్ రైస్ సేకరణకు మోదీ సర్కార్ గ్రీన్ సిగ్నల్..

Para Boiled Rice From Telangana

అన్నదాతకు గుడ్‌న్యూస్ చెప్పింది మోదీ ప్రభుత్వం. బలవర్థకమైన బియ్యం సేకరణ కార్యకలాపాలలో తెలంగాణ రైతులకు కేంద్ర ప్రభుత్వం నిరంతరం మద్దతు ఇస్తోంది. ఖరీఫ్ మార్కెటింగ్ సీజన్ (కేఎంఎస్) 2022-2023 కోసం అదనంగా 6.80 LMT కేటాయింపునకు భారత ప్రభుత్వ ఆహార, ప్రజా పంపిణీ శాఖ ఆమోదం తెలిపిందని కేంద్ర మంత్రి జి.కిషన్ రెడ్డి తెలిపారు. ఇది 2021-22 రబీ సీజన్ మరియు 2022-23 ఖరీఫ్ సీజన్‌కు సంబంధించి ఇటీవల ఆమోదించబడిన 13.73 లక్షల మెట్రిక్ టన్నుల బాయిల్డ్ బియ్యం సేకరణకు అదనం.

తెలంగాణ రైతాంగాన్ని ఆదుకునేందుకు కేంద్ర ప్రభుత్వం తీసుకున్న నిర్ణయం పట్ల హర్షం వ్యక్తం చేసిన కేంద్ర మంత్రి జి.కిషన్ రెడ్డి. ఇటీవల అకాల వర్షాల వల్ల నష్టపోయిన రైతాంగానికి కేంద్ర ప్రభుత్వం తీసుకున్న ఈ నిర్ణయం ఎంతో ఊరటనిస్తుందని అన్నారు. తెలంగాణ ప్రభుత్వం కేంద్రప్రభుత్వం అందిస్తున్న సహకారాన్ని సద్వినియోగం చేసుకుని యుద్ధప్రాతిపదికన రైతుల నుంచి ధాన్యం సేకరించి, మిల్లింగ్‌ ఆపరేషన్లు పూర్తి చేసి బియ్యాన్ని ఎఫ్‌సీఐకి అందజేసేందుకు తగిన చర్యలు తీసుకోవాలని మంత్రి కిషన్ రెడ్డి సూచించారు.

గత నెలలో కేంద్ర మంత్రి కిషన్‌రెడ్డి కేంద్ర ఆహార, ప్రజాపంపిణీ శాఖ మంత్రి పీయూష్‌గోయల్‌కు లేఖ రాస్తూ తెలంగాణ నుంచి దొడ్డు బియ్యాన్ని కొనుగోలు చేయాలని కోరారు. దీనిపై స్పందించిన కేంద్ర మంత్రి పీయూష్‌గోయల్‌ తనవంతు సాయం అందిస్తానని హామీ ఇచ్చారు. రాష్ట్ర ప్రభుత్వం ఎఫ్‌సీఐకి అనేకసార్లు లేఖలు, రిమైండర్‌లు రాసినా సకాలంలో బియ్యం అందించలేకపోయిన విషయం తెలిసిందే.

• ఖరీఫ్ మార్కెటింగ్ సీజన్ (KMS) 2022-2023 కోసం అదనంగా 6.80 LMT కేటాయింపును ఆహార,ప్రజా పంపిణీ శాఖ ఆమోదించింది.
• ఇది రబీ 2021-2022, KMS 2022-2023 కోసం సేకరణ కోసం ఇప్పటికే ఆమోదించబడిన 13.73 LMTకి అదనం.
• కేంద్ర మంత్రి జి.కిషన్ రెడ్డి 5 ఏప్రిల్ 2023న కేంద్ర వినియోగదారుల వ్యవహారాలు,ఆహారం, ప్రజాపంపిణీ శాఖ మంత్రి పీయూష్ గోయలన్‌కు లేఖ రాశారు.
• కేంద్ర మంత్రి జి.కిషన్ రెడ్డి తన లేఖలో రైతులకు మద్దతుగా తెలంగాణా నుండి బాయిల్డ్ బియ్యాన్ని సేకరించాలని అభ్యర్థించారు.

మరిన్ని జాతీయ వార్తల కోసం