ఇంటీరియర్‌‌తోనే టాటా సంచలనం ..! స్టీరింగ్‌పై లోగో లేకుండానే మార్కెట్‌లోకి వస్తుందా

నెక్సాన్ లేదా కర్వ్ వంటి మోడళ్లకు భిన్నంగా, అత్యంత ప్రీమియం అనుభూతిని అందించే లక్ష్యంతో ‘అవిన్యా’ను టాటా అభివృద్ధి చేస్తోంది. జూన్ 2026 నాటికి మార్కెట్లోకి రానున్న ఈ వాహనం, జాగ్వార్ ల్యాండ్ రోవర్ టెక్నాలజీతో రూపుదిద్దుకుంటోంది. కనీస భౌతిక బటన్లు లేకుండా, కంప్లీట్ టచ్ స్క్రీన్, మినిమలిస్ట్ డిజైన్‌తో వస్తున్న అవిన్యా ఇంటీరియర్ ప్రత్యేకతలు, ఇతర అప్‌డేట్ల గురించి తెలుసుకుందాం!

అవిన్యా డాష్‌బోర్డ్

లీకైన పేటెంట్ చిత్రాల ప్రకారం, అవిన్యా డాష్‌బోర్డ్ చాలా వెడల్పుగా, వంపు తిరిగిన ఆకారంలో ఉంటుంది. ఇందులో ఎక్కడా టాటా లోగో కనిపించదు, దానికి బదులుగా ‘T’ ఆకారంలో ఉన్న అవిన్యా లోగోను రూపొందించారు. భౌతిక స్విచ్‌ల అవసరం లేకుండా, మెజారిటీ ఫంక్షన్లను పెద్ద సెంట్రల్ టచ్ స్క్రీన్ ద్వారానే నియంత్రించేలా డిజైన్ చేశారు. స్టీరింగ్ వీల్ మీద కూడా ఫిజికల్ బటన్లకు బదులుగా టచ్-బేస్డ్ కంట్రోల్స్ ఇచ్చారు. డ్రైవర్ ముందు ఉన్న ఇన్స్ట్రుమెంట్ క్లస్టర్ చాలా స్లిమ్‌గా, తక్కువ ఎత్తులో ఉండటం వల్ల డ్రైవింగ్‌లో స్పష్టత పెరుగుతుంది. జర్మన్, బ్రిటిష్ లగ్జరీ కార్ల శైలిలో సాఫ్ట్-టచ్ ఫినిషింగ్‌తో ఈ క్యాబిన్ రూపొందుతోంది.

స్టీరింగ్ ప్రత్యేకతలు..

అవిన్యాను ఒక ప్రత్యేక లగ్జరీ సబ్-బ్రాండ్‌గా నిలబెట్టాలనే ఉద్దేశంతోనే టాటా లోగోను తొలగించారు. స్టీరింగ్ వీల్‌పై కేవలం ‘AVINYA’ అనే అక్షరాలు మాత్రమే ఉంటాయి. అంతేకాదు, స్టీరింగ్ స్టాక్స్‌లో ఒకటి గేర్ సెలెక్టర్‌గా పనిచేసేలా సరికొత్త టెక్నాలజీని తీసుకువస్తున్నారు. ఇది టాటా కార్లలోనే మొదటిసారి జరుగుతున్న ప్రయోగం.

ప్లాట్‌ఫామ్ వివరాలు

2026లో అవిన్యా బ్రాండ్ అరంగేట్రం చేయనుంది. ఇది జాగ్వార్ ల్యాండ్ రోవర్ (JLR) యొక్క ‘EMA’ ప్లాట్‌ఫామ్‌పై ఆధారపడి ఉంటుంది. వార్షికంగా కేవలం 24,000 యూనిట్ల ఉత్పత్తిని మాత్రమే లక్ష్యంగా పెట్టుకోవడం ద్వారా, దీనిని ఒక నిచ్ (Niche), ప్రీమియం లగ్జరీ రేంజ్‌గా టాటా ఉంచాలనుకుంటోంది.

ఇక 2026 టాటా టియాగో ఈవీ (Tiago EV) విషయానికొస్తే, ఇందులో డ్యూయల్ ఫ్లోటింగ్ స్క్రీన్స్, 360-డిగ్రీ కెమెరా, వైర్‌లెస్ ఆపిల్ కార్ ప్లే వంటి ఫీచర్లు ప్రయాణికులకు మరింత సౌకర్యాన్ని అందిస్తున్నాయి.

టాటా మోటార్స్ సాధారణ వినియోగదారుల నుంచి లగ్జరీ విభాగం వైపు అడుగులు వేస్తోంది. అవిన్యా రాకతో భారతీయ ఈవీ మార్కెట్లో పోటీ తదుపరి స్థాయికి చేరుకోనుంది. డిజైన్, టెక్నాలజీ పరంగా టాటా చూపుతున్న ఈ మార్పులు, కచ్చితంగా గ్లోబల్ బ్రాండ్లతో పోటీపడేలా ఉన్నాయి. ఈ లగ్జరీ ఈవీ డ్రైవింగ్ అనుభవం ఎలా ఉండబోతుందో చూడాలంటే మరికొన్ని రోజులు వేచి చూడక తప్పదు!