Instagram Promotions: లైకుల కోసం సోషల్‌మీడియాలో ఇవి పోస్ట్ చేస్తున్నారా? బుక్కైపోతారు జాగ్రత్త!

సోషల్ మీడియాలో ఎక్కువ మంది ఫాలోవర్స్ ఉన్నవాళ్లు ఎక్కువమందిని ప్రభావితం చేసే అవకాశం ఉంటుంది. ముఖ్యంగా ఇన్‌ఫ్లుయెన్సర్స్‌ లాంటివాళ్లంతా వారు చేసే బ్రాండింగ్, ప్రమోషన్స్ విషయంలో కొన్ని జాగ్రత్తలు పాటించాలి. లేకపోతే కంజ్యూమర్ ప్రొటెక్షన్ యాక్ట్ కింద కేసుల్లో ఇరుక్కోవాల్సి వస్తుంది.

రిస్క్ ఇదే..

యూట్యూబ్, ఇన్‌స్టాగ్రామ్‌, ఫేస్‌బుక్ ఇన్‌ఫ్లుయెన్సర్లుగా ఉండేవాళ్లు అప్పుడప్పుడు కొన్ని ప్రమోషన్స్ చేస్తుంటారు. ప్రమోషన్ అంటే..  వ్యూవర్స్ ను ఆయా బ్రాండ్స్‌ కొనుగోలు చేసేలా ప్రభావితం చేయడం అని అర్థం. అయితే  ఒకవేళ ఆయా ప్రొడక్ట్స్, సర్వీసుల్లో ఏవైనా మోసాలు జరిగితే అందులో ఇన్‌ఫ్లుయెన్సర్ల పాత్ర కూడా ఉంటుందని తెలుసుకోవాలి. కాబట్టి ప్రమోషన్స్ విషయంలో  చాలా జాగ్రత్తగా ఉండడం అవసరం.

జాగ్రత్తలు ఇలా..

• ఇన్‌ఫ్లుయెన్సర్లు తమ కంటెంట్‌కు దగ్గరగా ఉండే ప్రొడక్ట్స్ లేదా సర్వీసులనే ఎంచుకుంటే బాగుంటుంది.  ఉదాహరణకు ట్రావెల్  ఇన్‌ఫ్లుయెన్సర్లకు ట్రావెలింగ్ పట్ల కొంత అవగాహన ఉంటుంది. కాబట్టి ట్రావెల్ యాప్స్ గురించిన యాడ్లు ఇస్తే సమస్యలు ఉండవు. అలాకాకుండా బ్యూటీ ప్రొడక్ట్స్‌కు సంబంధించిన యాడ్లు ఇస్తే.. తెలియని ఇబ్బందుల్లో ఇరుక్కునే అవకాశం ఉంది.
• ఏవైనా ప్రొడక్ట్స్ లేదా సర్వీస్ ను ప్రమోట్ చేసేటప్పుడు మీ సొంత మాటలు యాడ్ చేయకుండా కేవలం వాటి డిస్క్రిప్షన్ మాత్రం చెప్తే సరిపోతుంది.
• వివాదాలను సృష్టించే ప్రొడక్ట్స్, సర్వీసుల జోలికి వెళ్లకపోవడమే మంచిది.  దీనివల్ల ఫాలోవర్స్ తగ్గడంతో పాటు రిస్క్‌లు కూడా ఎదుర్కోవాల్సి రావొచ్చు.
• ప్రమోషన్  చేస్తున్నప్పుడు అది ప్రమోషన్ అని ట్యాగ్ పెట్టాలి లేదా చెప్పాలి. అలా చేస్తే చట్ట ప్రకారం ఇబ్బందులు ఉండవు. ఒకవేళ ప్రమోషన్‌ ను మీ సొంత అభిప్రాయంలా మార్చి చెప్తే ఇబ్బందులు ఎదురవ్వొచ్చు.
• ఇకపోతే  యూట్యూబ్‌లో ప్రమోషన్స్ చేసేటప్పుడు స్క్రీన్ పైన స్పాన్సర్డ్ యాడ్ అన్న ట్యాగ్ పెట్టాలి. లేకపోతే అది మీ సొంత కంటెంట్ కిందకు వస్తుంది.

మరిన్ని టెక్ వార్తల కోసం ఇక్కడ క్లిక్ చేయండి