డీజిల్ వాహనదారులకు గుడ్న్యూస్! ఇలా చేస్తే మీ వెహికల్ మైలేజ్ భారీగా పెరుగుతుంది!
డీజిల్ ధరలు పెరుగుతున్న నేపథ్యంలో తక్కువ ఇంధనంతో ఎక్కువ మైలేజ్ పొందేందుకు కారు మెయింటెనెన్స్, సరైన టైర్ ప్రెజర్, స్థిరమైన వేగం, సమయానికి సర్వీసింగ్ కీలకమని నిపుణులు సూచిస్తున్నారు. గంటకు 60-80 కి.మీ వేగంతో ప్రయాణించడం, ఆకస్మిక బ్రేకులు నివారించడం ద్వారా డీజిల్ వినియోగాన్ని గణనీయంగా తగ్గించవచ్చని చెబుతున్నారు.
ఇంధన ధరలు పెరుగుతున్న నేపథ్యంలో డీజిల్ కార్ల వినియోగదారులు మైలేజ్పై ఎక్కువ దృష్టి పెడుతున్నారు. తక్కువ డీజిల్తో ఎక్కువ దూరం ప్రయాణించాలంటే కేవలం మంచి కారు ఉండటం సరిపోదని, డ్రైవింగ్ అలవాట్లు, వాహనం నిర్వహణ కూడా కీలకమని ఆటోమొబైల్ నిపుణులు చెబుతున్నారు. ముందుగా కారు ఇంజిన్ కండీషన్ బాగుండటం అత్యంత ముఖ్యమని నిపుణులు సూచిస్తున్నారు. ఇంజిన్ ఆయిల్ను సమయానికి మార్చడం, ఎయిర్ ఫిల్టర్, ఫ్యూయల్ ఫిల్టర్లను శుభ్రంగా ఉంచడం వల్ల ఇంజిన్ పనితీరు మెరుగుపడుతుంది. టైర్లలో సరైన గాలి ఒత్తిడి లేకపోతే ఇంధన వినియోగం పెరుగుతుంది. అందుకే తయారీదారు సూచించిన స్థాయిలోనే టైర్ ప్రెజర్ ఉండేలా చూసుకోవాలి.
డీజిల్ కార్లను ఆకస్మిక వేగంతో నడపడం మైలేజ్ను తగ్గిస్తుంది. సాధారణంగా గంటకు 60 నుంచి 80 కిలోమీటర్ల మధ్య స్థిరమైన వేగంతో ప్రయాణిస్తే మంచి ఇంధన సామర్థ్యం లభిస్తుందని నిపుణులు చెబుతున్నారు. తరచూ బ్రేకులు వేయడం, ఒక్కసారిగా యాక్సిలేటర్ పెంచడం వల్ల డీజిల్ ఎక్కువగా ఖర్చవుతుంది. అవసరం లేని సమయంలో ఇంజిన్ ఆన్లో ఉంచకూడదు. ట్రాఫిక్ సిగ్నల్ వద్ద ఎక్కువసేపు ఆగాల్సి వస్తే ఇంజిన్ ఆఫ్ చేయడం ద్వారా ఇంధనం ఆదా చేయవచ్చు. అలాగే వాహనంలో అధిక బరువు మోసినా మైలేజ్ తగ్గుతుంది. కాబట్టి అవసరం లేని వస్తువులను కారులో ఉంచకపోవడం మంచిది.
ఎయిర్ కండీషనర్ను అధికంగా ఉపయోగించడం కూడా డీజిల్ వినియోగాన్ని పెంచుతుంది. ముఖ్యంగా నగర ట్రాఫిక్లో ఏసీ వినియోగం మైలేజ్పై ప్రభావం చూపుతుంది. వీలైతే తక్కువ వేగాల్లో విండో వెంటిలేషన్ను ఉపయోగించాలని నిపుణులు సూచిస్తున్నారు. అలాగే మంచి నాణ్యత గల డీజిల్ వినియోగించడం, సమయానికి సర్వీసింగ్ చేయించడం, సరైన గేర్లో డ్రైవ్ చేయడం వంటి అలవాట్లు దీర్ఘకాలంలో ఇంధన ఖర్చును గణనీయంగా తగ్గిస్తాయి. ఇంధన ఆదా కేవలం డబ్బు పొదుపుకే కాకుండా వాహనం పనితీరును మెరుగుపరచడంలో కూడా కీలక పాత్ర పోషిస్తుందని ఆటోమొబైల్ రంగ నిపుణులు చెబుతున్నారు.
మరిన్ని టెక్ వార్తల కోసం ఇక్కడ క్లిక్ చేయండి