T20 World Cup 2026: తిలక్ వర్మ స్థానాన్ని భర్తీ చేసేది ఎవరు? రేసులో నలుగురు..!
Tilak Varma: తెలుగు అబ్బాయ్ తిలక్ వర్మ ఎమర్జెన్సీ సర్జరీతో టీమిండియాకు ఎదురు దెబ్బ తగిలింది. దీంతో టీ20 ప్రపంచకప్ 2026 స్కాడ్లో మార్పులు కనిపించేలా ఉంది. ఈ క్రమంలో ఓ నలుగురు ప్లేయర్లు తిలక్ వర్మను భర్తీ చేసేందుకు బెస్ట్ చాయిస్గా కనిపిస్తున్నారు.
Updated on: Jan 08, 2026 | 12:10 PM
టీ20 ప్రపంచకప్ ప్రారంభానికి కొద్దిరోజుల ముందే యువ బ్యాటర్ తిలక్ వర్మ ఎమర్జెన్సీ సర్జరీ చేయించుకోవాల్సి వచ్చింది. కోలుకోవడానికి కనీసం నెల రోజులు పడుతుందని అంచనా వేస్తుండటంతో, అతను టోర్నీకి దూరమయ్యే అవకాశాలు కనిపిస్తున్నాయి. మిడిల్ ఆర్డర్లో తిలక్ లేని లోటును పూడ్చేందుకు బీసీసీఐ సెలెక్టర్ల ముందున్న ఆప్షన్స్ ఏంటో ఇప్పుడు చూద్దాం.
తిలక్ వర్మ గాయం – టీమిండియాకు ఎదురుదెబ్బ: విజయ్ హజారే ట్రోఫీ ఆడుతున్న సమయంలో తిలక్ వర్మ తీవ్రమైన కడుపు నొప్పితో రాజ్కోట్లోని ఆసుపత్రిలో చేరాడు. అతనికి ‘టెస్టిక్యులర్ టోర్షన్’ శస్త్రచికిత్స విజయవంతంగా జరిగినప్పటికీ, వరల్డ్ కప్ నాటికి అతను పూర్తి ఫిట్నెస్ సాధించడంపై సందిగ్ధత నెలకొంది. ఇప్పటికే ప్రకటించిన 15 మంది సభ్యుల జట్టులో తిలక్ కీలక సభ్యుడు.
తిలక్ స్థానంలో రేసులో ఉన్న ఆటగాళ్లు:
1. శుభ్మన్ గిల్ (Shubman Gill): అందరి దృష్టి ప్రస్తుతం శుభ్మన్ గిల్ మీద ఉంది. వన్డే, టెస్టులకు కెప్టెన్గా ఉన్న గిల్ను ఆశ్చర్యకరంగా టీ20 వరల్డ్ కప్ స్క్వాడ్ నుంచి తప్పించారు. అయితే తిలక్ గాయపడటంతో, గిల్ను మళ్ళీ జట్టులోకి తీసుకునే అవకాశం ఉంది. అతను ఓపెనర్గానే కాకుండా నంబర్ 3లో కూడా బ్యాటింగ్ చేయగలడు.
2. శ్రేయస్ అయ్యర్ (Shreyas Iyer): అనుభవజ్ఞుడైన శ్రేయస్ అయ్యర్ ప్రస్తుతం ఫుల్ ఫామ్లో ఉన్నాడు. ఇటీవల ముంబై తరపున ఆడుతూ మెరుపు హాఫ్ సెంచరీ బాదాడు. మిడిల్ ఆర్డర్లో స్పిన్నర్లను సమర్థవంతంగా ఎదుర్కోగలడు కాబట్టి, తిలక్ స్థానానికి ఇతను సరైన ప్రత్యామ్నాయం కాగలడు.
3. రియాన్ పరాగ్ (Riyan Parag): యువ ఆల్ రౌండర్ రియాన్ పరాగ్ కూడా సెలెక్టర్ల జాబితాలో ఉన్నాడు. బ్యాటింగ్ తో పాటు బౌలింగ్లోనూ ఉపయోగపడటం ఇతని అదనపు బలం. తిలక్ లాగే ఇతను కూడా పార్ట్ టైమ్ బౌలర్గా కీలక వికెట్లు తీయగలడు.
4. సర్ఫరాజ్ ఖాన్ (Sarfaraz Khan): డొమెస్టిక్ క్రికెట్లో పరుగుల వరద పారిస్తున్న సర్ఫరాజ్ ఖాన్ను టీ20ల్లోకి కూడా తీసుకురావాలని కొందరు మాజీలు సూచిస్తున్నారు. మిడిల్ ఆర్డర్లో ఇన్నోవేటివ్ షాట్లతో వేగంగా పరుగులు రాబట్టడం ఇతని ప్రత్యేకత.
చివరి నిర్ణయం ఎవరిది?
టాప్ ఆర్డర్లో ఇషాన్ కిషన్, సంజు శాంసన్ వంటి వారు ఇప్పటికే ఉన్నందున, మిడిల్ ఆర్డర్ స్థిరత్వం కోసం శ్రేయస్ అయ్యర్ లేదా గిల్లో ఒకరికి మొగ్గు చూపే అవకాశం ఉంది. బీసీసీఐ మెడికల్ టీమ్ ఇచ్చే రిపోర్టు ఆధారంగా తిలక్ వర్మ భవితవ్యం తేలనుంది.
మరిన్ని క్రికెట్ వార్తల కోసం ఇక్కడ చూడండి.
