32 సిక్సులు, 97 ఫోర్లు.. ఇంగ్లీషోళ్ల బెండ్ తీసిన టీమిండియా ఫ్యూచర్ జనరేషన్

Vaibhav Suryavanshi and Musheer Khan: భారత యువ క్రికెటర్లు ఇంగ్లాండ్ గడ్డపై సత్తా చాటారు. అండర్-19 జట్టులో వైభవ్ సూర్యవంశీ, ముంబై ఎమర్జింగ్ టీమ్‌లో ముషీర్ ఖాన్ అద్భుతమైన ప్రదర్శనతో క్రికెట్ ప్రపంచం దృష్టిని ఆకర్షించారు. ఇద్దరు యువ బ్యాట్స్‌మెన్ తమ ధాటిగా బ్యాటింగ్‌తో ఇంగ్లాండ్ బౌలర్లకు చుక్కలు చూపించారు. ఈ పర్యటనలో కలిపి 757 పరుగులు, 32 సిక్సులతో విధ్వంసం సృష్టించారు.

వైభవ్ సూర్యవంశీ మెరుపులు..

కేవలం 14 ఏళ్ల వయస్సులోనే వైభవ్ సూర్యవంశీ తన బ్యాటింగ్‌తో అందరినీ ఆశ్చర్యపరిచాడు. ఇంగ్లాండ్ అండర్-19 జట్టుతో జరిగిన 5 ODI మ్యాచ్‌ల సిరీస్‌లో వైభవ్ 355 పరుగులు సాధించాడు. ఇందులో 29 సిక్సులు, 30 ఫోర్లు ఉన్నాయి. అతని స్ట్రైక్ రేట్ 174.01గా ఉండటం విశేషం. కేవలం 31 బంతుల్లో 86 పరుగులు, 73 బంతుల్లో 143 పరుగులు (10 సిక్సులు, 13 ఫోర్లతో) వంటి మెరుపు ఇన్నింగ్స్‌లు ఆడి యువ వన్డే చరిత్రలో వేగవంతమైన సెంచరీని నమోదు చేశాడు. బీహార్‌కు చెందిన వైభవ్, రాజస్థాన్ రాయల్స్ అభివృద్ధి వ్యవస్థలో భాగంగా ఉన్నాడు. ఈ ఐపీఎల్ సీజన్‌లోనూ సత్తా చాటి అందరి ప్రశంసలు అందుకున్నాడు.

ముషీర్ ఖాన్ హ్యాట్రిక్ సెంచరీలు..

ముంబై ఇండియన్స్ యువ సంచలనం సర్ఫరాజ్ ఖాన్ తమ్ముడైన ముషీర్ ఖాన్ ఇంగ్లాండ్ పర్యటనలో ముంబై ఎమర్జింగ్ టీమ్ తరపున ఆడుతూ అదరగొట్టాడు. ఈ పర్యటనలో వరుసగా మూడు సెంచరీలు నమోదు చేసి సంచలనం సృష్టించాడు. లౌబరో UCCE జట్టుతో జరిగిన మ్యాచ్‌లో మరో సెంచరీతో ముషీర్ తన బ్యాటింగ్ పరాక్రమాన్ని చాటుకున్నాడు. అతని ఆట తీరుతో టీమిండియాకు మరో భవిష్యత్ తార దొరికాడని అభిమానులు హర్షం వ్యక్తం చేస్తున్నారు. ముషీర్ బ్యాటింగ్‌తో పాటు తన లెఫ్ట్ ఆర్మ్ ఆఫ్ స్పిన్ బౌలింగ్‌తోనూ రాణించడం అతనికి అదనపు బలం. 2022-23 రంజీ సీజన్‌లో ముంబై తరఫున అరంగేట్రం చేసిన ముషీర్, ఇప్పటివరకు 9 మ్యాచ్‌లలో 51.14 సగటున 3 సెంచరీలు, ఒక హాఫ్ సెంచరీతో 716 పరుగులు చేశాడు.

ఈ ఇద్దరు యువ ఆటగాళ్ల అద్భుత ప్రదర్శన భారత క్రికెట్ భవిష్యత్తుకు శుభసంకేతం. వారి ధాటిగా బ్యాటింగ్, స్థిరమైన ప్రదర్శన టీమిండియాలో చోటు సంపాదించుకోవడానికి బలమైన అవకాశాలను సృష్టించాయి. వారి భవిష్యత్ క్రికెట్ ప్రయాణంపై ఇప్పుడు అందరి దృష్టి ఉంది.