క్యాచ్ మిస్ చేసిన షెఫాలీ వర్మ.. కట్‌చేస్తే.. ఊహించని షాకిచ్చిన ఐసీసీ..!
Shafali Verma ICC action: జింబాబ్వేపై జరిగిన మహిళల టీ20 మ్యాచ్‌లో భారత క్రికెటర్ షెఫాలీ వర్మ ఐసీసీ నిబంధనలను ఉల్లంఘించారు. క్యాచ్ జారవిడిచిన అసంతృప్తిలో బంతిని నేలపైకి విసిరినందుకు ఆమెకు అధికారిక హెచ్చరికతో పాటు ఒక డిమెరిట్ పాయింట్ విధించారు. ఇది ఐసీసీ నిబంధనల ప్రకారం మొదటి స్థాయి ఉల్లంఘనగా పరిగణించారు. షెఫాలీ కూడా తన తప్పును అంగీకరించారు.
Updated on: Oct 20, 2026 | 5:21 PM
Shafali Verma dem merit point: జింబాబ్వేతో జరిగిన రెండో మహిళల టీ20 మ్యాచ్‌లో భారత ఓపెనర్ షెఫాలీ వర్మ ఐసీసీ కోడ్ ఆఫ్ కండక్ట్ ఉల్లంఘనకు పాల్పడ్డారు. దీంతో ఆమెకు అధికారిక హెచ్చరిక జారీ చేయడంతో పాటు ఒక డిమెరిట్ పాయింట్ ఇచ్చారు. అక్టోబర్ 18న ఆదివారం రాయ్‌పూర్‌లో జరిగిన మ్యాచ్‌లో క్యాచ్ జారవిడిచిన అసంతృప్తితో షెఫాలీ బంతిని నేలపైకి విసిరారు. ఈ ఘటనపై ఐసీసీ క్రమశిక్షణ చర్యలు తీసుకుంది.
జింబాబ్వే ఇన్నింగ్స్‌లో 12వ ఓవర్‌లో ఈ ఘటన చోటుచేసుకుంది. భారత బౌలర్ శ్రీ చరణి వేసిన బంతికి చిపో ముగేరి-తిరిపానో ఇచ్చిన క్యాచ్‌ను మిడ్‌ఆఫ్‌లో ఫీల్డింగ్ చేస్తున్న షెఫాలీ వర్మ అందుకోలేకపోయారు. క్యాచ్ చేజారడంతో అసంతృప్తికి గురైన షెఫాలీ బంతిని నేలపైకి విసిరారు.
షెఫాలీ ప్రవర్తనను ఐసీసీ కోడ్ ఆఫ్ కండక్ట్‌లోని లెవల్-1 ఉల్లంఘనగా పరిగణించారు. అంతర్జాతీయ మ్యాచ్ సమయంలో క్రికెట్ పరికరాలు, ఆటగాళ్ల దుస్తులు లేదా మైదానంలోని ఇతర సామగ్రిని దుర్వినియోగం చేయడానికి సంబంధించిన ఐసీసీ ఆర్టికల్ 2.2 కింద చర్య తీసుకున్నారు.
తన తప్పును షెఫాలీ అంగీకరించారు. ఎమిరేట్స్ ఐసీసీ ఇంటర్నేషనల్ మ్యాచ్ రిఫరీల ప్యానెల్‌కు చెందిన జీఎస్ లక్ష్మి విధించిన శిక్షను కూడా ఆమె అంగీకరించారు. దీంతో ఈ ఘటనపై ప్రత్యేక విచారణ అవసరం లేకుండానే కేసు ముగిసింది. గత 24 నెలల్లో షెఫాలీపై నమోదైన తొలి క్రమశిక్షణ ఉల్లంఘన ఇదే.
ఐసీసీ నిబంధనల ప్రకారం లెవల్-1 ఉల్లంఘనకు అధికారిక హెచ్చరికతో పాటు ఆటగాడి మ్యాచ్ ఫీజులో 50 శాతం వరకు జరిమానా విధించే అవకాశం ఉంటుంది. అలాగే ఒకటి లేదా రెండు డిమెరిట్ పాయింట్లు కూడా ఇవ్వవచ్చు. 24 నెలల వ్యవధిలో ఒక ఆటగాడికి నాలుగు లేదా అంతకంటే ఎక్కువ డిమెరిట్ పాయింట్లు వస్తే మ్యాచ్ నిషేధం విధించే అవకాశం ఉంటుంది.
మరిన్ని క్రీడా వార్తల కోసం ఇక్కడ క్లిక్ చేయండి..
