Rishabh Pant : టెస్టుల్లో హిట్‌, వన్డే-టీ20ల్లో ఫట్.. సత్తా చాటాల్సిన సమయం ఇదే పంత్

Rishabh Pant : భారత్-సౌతాఫ్రికా టెస్ట్ సిరీస్ ముగిసిన తర్వాత ఇప్పుడు మూడు వన్డే మ్యాచ్‌ల సిరీస్ మొదలుకానుంది. ప్రస్తుతం ప్రపంచకప్ చాలా దూరంలో ఉండటం అందరి దృష్టి T20 ప్రపంచకప్‌పై ఉండటం వల్ల ఈ వన్డే సిరీస్‌కు పెద్దగా ప్రాధాన్యత లేదనిపించవచ్చు. అయితే, కొంతమంది ఆటగాళ్లకు మాత్రం ఈ సిరీస్ చాలా కీలకం. విరాట్ కోహ్లీ, రోహిత్ శర్మ రిటైర్మెంట్‌పై ఊహాగానాలు ఉన్నప్పటికీ ఈ సిరీస్ రిషబ్ పంత్ లిమిటెడ్ ఓవర్ల క్రికెట్ కెరీర్‌ను ముందుకు తీసుకెళ్లగలదు లేదా ఆపగలదు కాబట్టి, ఇది అతనికి అత్యంత ముఖ్యమైన సిరీస్‌గా నిలవనుంది.

నవంబర్ 30 నుంచి ప్రారంభమవుతున్న ఈ వన్డే సిరీస్‌లో టీమిండియా శుభ్‌మన్ గిల్, శ్రేయస్ అయ్యర్ వంటి స్టార్ బ్యాట్స్‌మెన్‌లు లేకుండా బరిలోకి దిగుతోంది. ఈ నేపథ్యంలో రిషబ్ పంత్‌తో పాటు ఇతర ఆటగాళ్లకు కూడా తమ టాలెంటును నిరూపించుకోవడానికి అవకాశాలు లభించాయి. ఛాంపియన్స్ ట్రోఫీ తర్వాత పంత్‌కు వన్డే జట్టులో చోటు దక్కింది. గాయం కారణంగా 2023 మొత్తం, 2024లో కొంత భాగం ఆడలేకపోయిన పంత్‌కు, ఈ సిరీస్ తన రీఎంట్రీ పటిష్టం చేసుకునేందుకు చాలా అవసరం.

గత కొన్నేళ్లుగా రిషబ్ పంత్ టెస్ట్ క్రికెట్‌లో తన స్థానాన్ని పదిలం చేసుకున్నాడు. కానీ వన్డే, టీ20 ఫార్మాట్లలో అతని స్థానంపై మాత్రం నిత్యం ప్రశ్నలు తలెత్తుతున్నాయి. T20 ప్రపంచకప్ 2024 తర్వాత పంత్ ఈ ఫార్మాట్‌కు దూరంగా ఉన్నాడు, ప్రస్తుతానికి అతని రీఎంట్రీ కష్టంగా కనిపిస్తోంది.

లిమిటెడ్ ఓవర్లలో పంత్‌కు మిగిలి ఉన్న ఏకైక అవకాశం వన్డే ఫార్మాటే. ఇప్పటివరకు అతను 31 వన్డే మ్యాచ్‌లలో 27 ఇన్నింగ్స్‌లలో 33.50 సగటుతో 871 పరుగులు మాత్రమే చేశాడు. ఇందులో కేవలం ఒక సెంచరీ, 5 హాఫ్ సెంచరీలు మాత్రమే ఉన్నాయి. 2022లో ఇంగ్లాండ్‌పై సెంచరీ కొట్టిన తర్వాత, ప్రమాదం కారణంగా పంత్ దాదాపు రెండేళ్లలో కేవలం ఒకే ఒక వన్డే మ్యాచ్ ఆడగలిగాడు.

ప్రస్తుతం జట్టులో వికెట్ కీపర్‌గా మొదటి ఎంపిక కేఎల్ రాహుల్. రాహుల్ బ్యాటింగ్‌లో కూడా అద్భుతమైన ప్రదర్శన కనబరుస్తున్నాడు. అదే సమయంలో సంజూ శాంసన్ , ఇటీవల టెస్టుల్లో ఆడిన యువ ఆటగాడు ధ్రువ్ జురెల్ వంటి ప్రత్యామ్నాయాలు కూడా పంత్‌కు గట్టి పోటీ ఇస్తున్నారు. ఈ కీలకమైన సిరీస్‌లో పంత్ రాణించలేకపోతే, అతను కేవలం టెస్ట్ ఫార్మాట్‌కు మాత్రమే పరిమితమయ్యే ప్రమాదం ఉంది. కాబట్టి జట్టులో తన స్థానాన్ని నిలబెట్టుకోవడానికి పంత్‌కు ఈ సౌతాఫ్రికా సిరీస్ అత్యంత కీలకం.

మరిన్ని క్రీడా వార్తల కోసం ఇక్కడ క్లిక్ చేయండి..