Ranji Trophy: 8 ఓవర్లలో 8వికెట్లు.. బ్యాటర్లకు చుక్కలు చూపించిన యంగ్ బౌలర్.. కోహ్లీ, జైషా ప్రశంసల జల్లు..

Deepak Dhapola Ranji Trophy 2022 23

రంజీ ట్రోఫీలో మంగళవారం (డిసెంబర్ 27) హిమాచల్ ప్రదేశ్ వర్సెస్ ఉత్తరాఖండ్ మధ్య ఎలైట్ గ్రూప్ ఎన్‌కౌంటర్ ప్రారంభమవుతుంది. ఈ మ్యాచ్‌లో తొలిరోజు హిమాచల్‌ టాస్‌ గెలిచి బ్యాటింగ్‌ ఎంచుకుంది. టీమిండియా కెప్టెన్ రిషి ధావన్ తీసుకున్న ఈ నిర్ణయం తప్పని తేలింది. హిమాచల్‌ను 50 పరుగులు చేసేందుకు కూడా ఉత్తరాఖండ్ అనుమతించలేదు. హిమాచల్‌ జట్టు తొలి ఇన్నింగ్స్‌లో 49 పరుగులకే ఆలౌటైంది. ఉత్తరాఖండ్‌కు దీపక్ ధపోలా బౌలింగ్‌లో కిల్లర్‌గా మారాడు.

దీపక్ 8.3 ఓవర్లలో 35 పరుగులిచ్చి ఎనిమిది వికెట్లు తీశాడు. ఉదయాన్నే తేమను సద్వినియోగం చేసుకుని ప్రమాదకరంగా బౌలింగ్ చేశాడు. దీంతో హిమాచల్‌కు చెడ్డ ఆరంభం లభించింది. ఐదు పరుగులకే రెండు వికెట్లు పడిపోయాయి. ఆ తర్వాత అమిత్ కుమార్, అంకిత్ కల్సి మూడో వికెట్‌కు 17 పరుగుల భాగస్వామ్యాన్ని నెలకొల్పారు. అమిత్ ఔటైన తర్వాత వికెట్ల పతనం మొదలైంది. హిమాచల్ బ్యాట్స్‌మెన్ ఎవరూ క్రీజులో నిలవలేకపోయారు. అంకిత్ కల్సి మాత్రమే డబుల్ డిజిట్‌ను తాకగలిగాడు. 42 బంతుల్లో 26 పరుగులు చేశాడు. ఐదుగురు ఆటగాళ్లు తమ ఖాతాను కూడా తెరవలేకపోయారు.

దీపక్ విధ్వంసం ఎలా సాగిందంటే?

దీపక్ ధపోలా మొదటి ఐదుగురు బ్యాట్స్‌మెన్‌లను అవుట్ చేశాడు. రాఘవ్ ధావన్ (0), ప్రశాంత్ చోప్రా (1), అంకిత్ కల్సి (26), అమిత్ కుమార్ (6), ఆకాశ్ వశిష్ట్ (నాలుగు)లను పెవిలియన్ పంపాడు. ఆ తర్వాత ముగ్గురు లోయర్ ఆర్డర్ బ్యాట్స్ మెన్ ను దీపక్ పెవిలియన్ కు పంపాడు. మయాంక్ దాగర్ (0), పంకజ్ జైస్వాల్ (5), వైభవ్ అరోరా (0)లను అవుట్ చేశాడు. రిషి ధావన్ (5), ప్రవీణ్ ఠాకూర్ (0)లను అభయ్ నేగి పెవిలియన్ పంపాడు.

ఉత్తరాఖండ్‌కు 246 పరుగుల ఆధిక్యం..

తొలి రోజు ఆట ముగిసే సమయానికి హిమాచల్ 49 పరుగులకు సమాధానంగా ఉత్తరాఖండ్ 6 వికెట్ల నష్టానికి 295 పరుగులు చేసింది. తొలి ఇన్నింగ్స్‌లో 246 పరుగుల ఆధిక్యంలో ఉంది. ఉత్తరాఖండ్ జట్టులో వికెట్ కీపర్ ఆదిత్య తారే అజేయంగా 91 పరుగులు చేశాడు. అభయ్ నేగి 48 పరుగులతో నాటౌట్‌గా ఉన్నాడు. జీవన్‌జోత్ సింగ్ 45, ప్రియాంషు ఖండూరి 36, ఆర్యన్ శర్మ 23, అఖిల్ రావత్ 16, కునాల్ చండేలా 14, స్వప్నిల్ సింగ్ 12 పరుగుల వద్ద ఔటయ్యారు. హిమాచల్‌ తరపున రిషి ధావన్‌ అత్యధికంగా మూడు వికెట్లు పడగొట్టాడు. వైభవ్ అరోరా, పంకజ్ జైస్వాల్, మయాంక్ దాగర్ ఒక్కో వికెట్ పడగొట్టారు.

దీపక్ ధపోలా ఎవరు?

దీపక్ ధపోలా తన మొదటి ఫస్ట్ క్లాస్ మ్యాచ్‌లోనే అద్భుతాలు చేశాడు. బీహార్‌పై తొలి ఇన్నింగ్స్‌లో ఆరు వికెట్లు, రెండో ఇన్నింగ్స్‌లో మూడు వికెట్లు తీశాడు. ఇప్పటి వరకు 14 మ్యాచ్ లాడి 61 వికెట్లు తీశాడు. వీటిలో అతను ఐదుసార్లు 5 లేదా అంతకంటే ఎక్కువ సార్లు వికెట్లు పడగొట్టాడు. అదే సమయంలో, అతను మ్యాచ్‌లో రెండుసార్లు 10 వికెట్లు పడగొట్టాడు. దీపక్ భారత దిగ్గజ బ్యాట్స్‌మెన్ రాజ్‌కుమార్ శర్మ నుంచి కోచింగ్ తీసుకున్నాడు. క్రికెట్ అకాడమీలో విరాట్ ముందు బౌలింగ్ చేశాడు. కోహ్లీ కూడా అతడిని ప్రశంసించాడు.

ట్వీట్ చేసిన జై షా..

దీపక్ ధపోలాకు బీసీసీఐ సెక్రటరీ జై షా నుంచి పెద్ద కాంప్లిమెంట్ వచ్చింది. దీపక్ కోసం జై షా ప్రత్యేక ట్వీట్ చేశారు. “రంజీ ట్రోఫీ ఎప్పటికప్పుడు ప్రతిభను బయటకు తీసుకురావడానికి సహాయపడింది. ఈసారి ఉత్తరాఖండ్‌కు చెందిన దీపక్ ధపోలా. హిమాచల్‌పై దీపక్ 35 పరుగులిచ్చి ఎనిమిది వికెట్లు పడగొట్టాడు. టోర్నమెంట్ అత్యుత్తమ బౌలింగ్ ప్రదర్శనలలో ఒకటి” అంటూ రాసుకొచ్చాడు.

మరిన్ని క్రీడా వార్తల కోసం ఇక్కడ క్లిక్ చేయండి..