దేశవాళీలో 4245 పరుగులు, 470 వికెట్లు.. భారత్ తరపున 2 టెస్ట్లకే టాటా బైబై చెప్పేసిన బీసీసీఐ..!
India Cricket Domestic Stats: ఫస్ట్ క్లాస్ క్రికెట్లో వందలాది వికెట్లు, వేలాది పరుగులు సాధించిన రమేశ్ పొవార్ కెరీర్ భారత క్రికెట్ చరిత్రలో ఒక ప్రత్యేక అధ్యాయం. జట్టు సమతూకం, దిగ్గజాల ఆధిపత్యం కారణంగా అద్భుత ప్రతిభ ఉన్నప్పటికీ టెస్టుల్లో ఎక్కువ మ్యాచ్లు ఆడలేకపోయిన అరుదైన ఆటగాడిగా ఆయన మిగిలిపోయారు.
Updated on: Aug 21, 2026 | 4:56 PM
Ramesh Powar Test career: దేశవాళీ క్రికెట్లో పరుగుల వరద పారించి, బంతితో ప్రత్యర్థులను వణికించినా జాతీయ జట్టులో సుదీర్ఘ కాలం నిలదొక్కుకోవడం అందరికీ సాధ్యం కాదు. ముంబై తరపున ఫస్ట్ క్లాస్ మ్యాచ్ల్లో అసాధారణ గణాంకాలు నమోదు చేసిన ఓ మాజీ స్పిన్నర్ అంతర్జాతీయ టెస్టు ప్రయాణం కేవలం రెండే మ్యాచ్లకే పరిమితం కావడం క్రికెట్ ప్రేమికులను ఇప్పటికీ ఆశ్చర్యపరుస్తుంది.
భారత దేశవాళీ సర్క్యూట్లో ముంబై తరపున 1999/00 సీజన్లో ఫస్ట్ క్లాస్ అరంగేట్రం చేసిన రమేశ్ పొవార్, ఆ తర్వాత సుదీర్ఘ కాలం పాటు తిరుగులేని ఆల్రౌండర్గా సేవలందించాడు. 2015 వరకు కొనసాగిన తన రెడ్ బాల్ ప్రయాణంలో ఆయన మొత్తం 148 ఫస్ట్ క్లాస్ మ్యాచ్లు ఆడి 31.31 సగటుతో 470 వికెట్లు పడగొట్టాడు. కేవలం బౌలింగ్లోనే కాకుండా బ్యాటింగ్లోనూ లోయర్ ఆర్డర్లో విలువైన పరుగులు జోడించాడు. ఏకంగా 7 సెంచరీలు, 17 అర్ధ సెంచరీల సాయంతో 4245 పరుగులు సాధించి అత్యుత్తమ ఆల్రౌండర్లలో ఒకరిగా నిలిచారు. బరువైన శరీరాకృతి ఉన్నప్పటికీ మైదానంలో నిరంతరం దూకుడుగా బౌలింగ్ చేస్తూ ప్రత్యర్థి బ్యాటర్లను బోల్తా కొట్టించడంలో ఆయన సిద్ధహస్తుడు.
మూడేళ్ల నిరీక్షణ తర్వాత టెస్టు అరంగేట్రం.. బంగ్లా టూర్తోనే ముగింపు..
రమేశ్ పొవార్ 2004లోనే భారత వన్డే జట్టులోకి ఎంపికైనప్పటికీ, టెస్టు క్యాప్ అందుకోవడానికి మరో మూడేళ్లు నిరీక్షించాల్సి వచ్చింది. చివరకు 2007లో బంగ్లాదేశ్ పర్యటనకు వెళ్లిన భారత టెస్టు జట్టులో ఆయనకు చోటు దక్కింది. చట్టగ్రామ్ వేదికగా జరిగిన తొలి మ్యాచ్తో టెస్టుల్లో అడుగుపెట్టిన పొవార్, ఆ వెంటనే మీర్పూర్లో రెండో టెస్టు ఆడారు. ఈ రెండు మ్యాచ్లలో 19.66 అత్యుత్తమ సగటుతో 6 వికెట్లు తీశారు. ఇందులో 36 పరుగులిచ్చి 3 వికెట్లు తీయడం వ్యక్తిగత అత్యుత్తమ ప్రదర్శన. అయితే ఆ సిరీస్ ముగిసిన తర్వాత ఆయన మళ్లీ టెస్టు జట్టులో కనిపించలేదు.
ఎక్కువమంది చదివినది:SL vs IND: లంకపై ఘన విజయం.. డబ్ల్యూటీసీ ఫైనల్ రేసులో భారత్ దూకుడు.. ఆ జట్టు ఔట్..?
దిగ్గజాల నీడలో పొవార్ టెస్టు భవితవ్యం..
దేశవాళీలో తిరుగులేని రికార్డు ఉన్నప్పటికీ పొవార్కు టెస్టుల్లో వరుస అవకాశాలు రాకపోవడానికి ప్రధాన కారణం నాటి భారత స్పిన్ విభాగం పటిష్టతే. అప్పట్లో అనిల్ కుంబ్లే, హర్భజన్ సింగ్ జోడీ భారత టెస్టు జట్టులో తిరుగులేని ప్రధాన స్పిన్నర్లుగా ఉండటంతో మరో స్పిన్నర్కు తుది జట్టులో స్థానం దక్కడం గగనమైంది. కాలక్రమంలో హర్భజన్ కెరీర్ చివరి దశకు చేరే సమయానికి రవిచంద్రన్ అశ్విన్ జట్టులోకి దూసుకొచ్చి తన స్థానాన్ని సుస్థిరం చేసుకున్నారు. దీంతో రమేశ్ పొవార్ టెస్టు ప్రయాణం ఆ రెండు మ్యాచ్లతోనే ముగిసిపోయింది.
మరిన్ని క్రికెట్ వార్తల కోసం ఇక్కడ క్లిక్ చేయండి..
