World Record: టెస్టుల్లో సరికొత్త ప్రపంచ రికార్డు.. డెబ్యూ మ్యాచ్‌లోనే సిక్సుల వర్షం కురిపించిన పాక్ ఆటగాడు

World Record: క్రికెట్ చరిత్రలో ఎన్నో అద్భుతాలు జరుగుతుంటాయి. అయితే ఇంగ్లండ్‌తో జరుగుతున్న మూడో టెస్ట్ మ్యాచ్‌లో పాకిస్థాన్ యువ పేస్ బౌలర్ రజాఉల్లా సృష్టించిన సంచలనం ఇప్పుడు ప్రపంచవ్యాప్తంగా చర్చనీయాంశమైంది. బౌలింగ్‌తో రాణించాల్సిన ఒక పేస్ బౌలర్, అరంగేట్రం మ్యాచ్‌లోనే బ్యాటింగ్‌తో విశ్వరూపం ప్రదర్శించి ఏకంగా ప్రపంచ రికార్డును తన పేరు మీదకు మార్చుకున్నాడు.

ఇంగ్లండ్ జట్టుతో జరుగుతున్న మూడో టెస్ట్ మ్యాచ్ రెండో ఇన్నింగ్స్‎లో పాకిస్థాన్ జట్టు కష్టాల్లో పడింది. వరుసగా వికెట్లు కోల్పోయి ఓటమి దిశగా సాగుతున్న తరుణంలో, స్కోరు బోర్డుపై 312 పరుగుల వద్ద ఏడో వికెట్ నేలకూలింది. ఆ క్లిష్ట సమయంలో క్రీజులోకి వచ్చిన పేస్ బౌలర్ రజాఉల్లా ఎలాంటి భయం లేకుండా ఎదురుదాడికి దిగాడు. ప్రత్యర్థి బౌలర్లను ఒత్తిడిలోకి నెట్టే లక్ష్యంతో వచ్చిన ఈ కుడిచేతి వాటం బ్యాటర్ మైదానంలోకి అడుగుపెట్టిన క్షణం నుంచి భారీ షాట్లతో విరుచుకుపడ్డాడు.

ప్రపంచ రికార్డు సాధించిన మెరుపు ఇన్నింగ్స్

కేవలం 63 బంతులు మాత్రమే ఎదుర్కొన్న రజాఉల్లా 9 అద్భుతమైన సిక్సర్లు అలాగే 4 బౌండరీల సహాయంతో ఏకంగా 81 పరుగుల మెరుపు ఇన్నింగ్స్ ఆడాడు. టెస్ట్ క్రికెట్ చరిత్రలో అరంగేట్రం మ్యాచ్ ఆడుతున్న ఒక ఆటగాడు ఇన్నింగ్స్‌లో అత్యధిక సిక్సర్లు బాదిన రికార్డును సమం చేశాడు. ఇంతకుముందు న్యూజిలాండ్ మాజీ ఆటగాడు టిమ్ సౌథీ మాత్రమే తన టెస్ట్ డెబ్యూలో ఈ ఘనత సాధించగా, ఇప్పుడు రజాఉల్లా ఆ సరసన గర్వంగా నిలిచాడు. చివరికి పాకిస్థాన్ జట్టు మొత్తం 449 పరుగుల భారీ స్కోరు సాధించడంలో రజాఉల్లా ఇన్నింగ్స్ కీలక పాత్ర పోషించింది.

పాకిస్థాన్ తరఫున అత్యంత ఫాస్టెస్ట్ హాఫ్ సెంచరీ

ఈ చారిత్రక ఇన్నింగ్స్‌లో రజాఉల్లా మరో అరుదైన రికార్డును కూడా తన ఖాతాలో వేసుకున్నాడు. టెస్ట్ అరంగేట్రం మ్యాచ్‌లో అత్యంత వేగంగా హాఫ్ సెంచరీ సాధించిన పాకిస్థాన్ క్రికెటర్‌గా నిలిచాడు. కేవలం 43 బంతుల్లోనే తన అర్ధశతకాన్ని పూర్తి చేసుకుని ఈ మైలురాయిని అందుకున్నాడు. దీనికి ముందు పాకిస్థాన్ తరఫున ఫహీమ్ అష్రఫ్ 2018 సంవత్సరంలో ఐర్లాండ్ జట్టుపై 52 బంతుల్లో అర్ధశతకం సాధించిన రికార్డు ఉండగా, ఇప్పుడు ఆ రికార్డును రజాఉల్లా చెరిపివేశాడు.

ఇంగ్లండ్ ముందు భారీ లక్ష్యం

రెండవ ఇన్నింగ్స్‌లో పాకిస్థాన్ బ్యాటర్లు అద్భుతంగా రాణించి 449 పరుగులు చేసినప్పటికీ, తొలి ఇన్నింగ్స్‌లో కేవలం 133 పరుగులకే కుప్పకూలడం వల్ల ఆ జట్టు తీవ్ర ఒత్తిడిలో పడింది. తొలి ఇన్నింగ్స్ ఆధిక్యత కారణంగా ఇంగ్లండ్ జట్టు విజయానికి కేవలం 130 పరుగుల స్వల్ప లక్ష్యం మాత్రమే ముందుంది. ప్రస్తుతం ఇంగ్లండ్ జట్టు ఈ సిరీస్‌లో 2-0 తేడాతో అజేయ ఆధిక్యంలో కొనసాగుతోంది.

మరిన్ని క్రీడా వార్తల కోసం ఇక్కడ క్లిక్ చేయండి..