Hardik Pandya: ఫిట్‌నెస్ లేక పక్కకు తప్పుకున్న పాండ్యా.. జట్టులోకి యంగ్ ప్లేయర్

Hardik Pandya: భారత క్రికెట్ జట్టులో మరో ఆసక్తికర పరిణామం చోటుచేసుకుంది. ఒకవైపు ప్రధాన భారత జట్టు వెస్టిండీస్‌తో టీ-20 సిరీస్‌లో తలపడేందుకు సిద్ధమవుతుండగా, మరోవైపు ఇండియా-ఏ క్రికెట్ జట్టు ఆస్ట్రేలియా-ఏ జట్టుతో మూడు వన్డేల సిరీస్ ఆడేందుకు సమాయత్తమవుతోంది. ఈ ప్రతిష్టాత్మక సిరీస్ అక్టోబర్ 6వ తేదీ నుంచి ప్రారంభం కానుంది. ఈ మేరకు బీసీసీఐ అన్ని ఏర్పాట్లు పూర్తి చేసింది. యువ ఓపెనర్ రుతురాజ్ గైక్వాడ్ నేతృత్వంలో బరిలోకి దిగుతున్న ఈ జట్టులో దేశవాళీ క్రికెట్‌లో రాణిస్తున్న ప్రతిభావంతులైన ఆటగాళ్లకు పెద్దపీట వేశారు.

హార్దిక్ పాండ్యాకు నిరాశ

ఈ వన్డే సిరీస్ కోసం ప్రకటించిన ఇండియా-ఏ జట్టులో స్టార్ ఆల్ రౌండర్ హార్దిక్ పాండ్యా కూడా ఉండాల్సి ఉంది. అయితే గత కొంతకాలంగా గాయాలతో ఇబ్బందిపడుతున్న హార్దిక్ ఇంకా పూర్తిగా కోలుకోకపోవడంతో ఈ సిరీస్ నుంచి తప్పుకోవాల్సి వచ్చింది. బీసీసీఐ సెంటర్ ఆఫ్ ఎక్సలెన్స్ నివేదిక ప్రకారం హార్దిక్ కోలుకోవడానికి మరింత సమయం పట్టే అవకాశం ఉంది. దీంతో న్యూజిలాండ్‌తో జరిగే సిరీస్‌కు కూడా ఆయన అందుబాటులో ఉండటం అనుమానంగా మారింది. హార్దిక్ స్థానంలో యువ ఆటగాడు సూర్యాంశ్ షెడ్గేను సెలక్టర్లు జట్టులోకి ఎంపిక చేశారు.

పూర్తి షెడ్యూల్, వేదిక వివరాలు

ఆస్ట్రేలియా-ఏ జట్టు గత నెల సెప్టెంబర్ నుంచి భారత్‌‌లో పర్యటిస్తోంది. ఇప్పటికే ఇరు జట్ల మధ్య రెండు అనధికారిక టెస్ట్ మ్యాచ్‌ల సిరీస్ ముగిసింది. ఇందులో తొలి మ్యాచ్‌లో ఇండియా-ఏ జట్టు ఘన విజయం సాధించగా, రెండో మ్యాచ్ డ్రాగా ముగిసింది. దీని తర్వాత ఇప్పుడు అక్టోబర్ ఆరు నుంచి వన్డే సిరీస్ ప్రారంభం కానుంది. తొలి వన్డే అక్టోబర్ 6న జరగనుండగా, రెండో వన్డే అక్టోబర్ 9, మూడో వన్డే అక్టోబర్ 11న జరగనున్నాయి. ఈ మూడు మ్యాచ్‌లకు పుదుచ్చేరిలోని సీఏపీఎస్ మైదానం వేదికగా నిలవనుంది.

ఇండియా-ఏ వన్డే జట్టు వివరాలు

ఈ సిరీస్ కోసం బీసీసీఐ పటిష్టమైన జట్టును ప్రకటించింది. జట్టులో రుతురాజ్ గైక్వాడ్, సాయి సుదర్శన్, దేవదత్ పడిక్కల్, రజత్ పాటిదార్, ప్రభ్‌సిమ్రాన్ సింగ్, ప్రియాన్ష్ ఆర్య, నమన్ ధీర్, నిషాంత్ సింధూ, అర్షిన్ కులకర్ణి, అర్షద్ ఖాన్, విప్రజ్ నిగమ్, కుమార్ కుషాంగ్, యశ్ ఠాకూర్, గుర్జాపనీత్ సింగ్, సూర్యాంశ్ షెడ్గే ఉన్నారు.