Hardik Pandya: హార్దిక్ పాండ్యా ఎక్కడ..? ఎట్టకేలకు అసలు విషయం చెప్పేసిన ముంబై టీంమేట్..!
Hardik Pandya Injury Update: ఐపీఎల్ 2026 సీజన్లో ముంబై ఇండియన్స్ శిబిరంలో ఏం జరుగుతుందో అర్థం కాక అభిమానులు అయోమయంలో ఉన్నారు. ముఖ్యంగా కెప్టెన్ హార్దిక్ పాండ్యా వరుస మ్యాచ్లకు దూరం కావడం, సామాజిక మాధ్యమాల్లో ఆయన జట్టును వీడుతున్నారనే వార్తలు సంచలనంగా మారాయి. పంజాబ్ కింగ్స్పై విజయం తర్వాత శార్దూల్ ఠాకూర్ ఈ అంశాలపై స్పందిస్తూ ఆసక్తికర విషయాలను వెల్లడించాడు.
Hardik Pandya Injury Update: ముంబై ఇండియన్స్ రెగ్యులర్ కెప్టెన్ హార్దిక్ పాండ్యా గత కొన్ని మ్యాచ్లుగా మైదానంలో కనిపించడం లేదు. చెన్నై సూపర్ కింగ్స్తో జరిగిన మ్యాచ్ తర్వాత ఆయన జట్టుకు దూరమయ్యాడు. దీనిపై శార్దూల్ ఠాకూర్ మాట్లాడుతూ, హార్దిక్ ప్రస్తుతం గాయంతో బాధపడుతున్నారని తెలిపాడు. రాయ్పూర్లో బెంగళూరుతో జరిగిన మ్యాచ్ కోసం ఆయన ప్రయాణించినప్పటికీ, ఫిట్నెస్ సమస్యల వల్ల ఆడలేకపోయారని వివరించాడు. ప్రస్తుతం ముంబైలో చికిత్స పొందుతున్న ఆయన, వచ్చే బుధవారం కోల్కతా నైట్ రైడర్స్తో జరిగే కీలక పోరు నాటికి తిరిగి జట్టులోకి వస్తారని ఆశిస్తున్నట్లు శార్దూల్ పేర్కొన్నాడు. హార్దిక్ వంటి నాణ్యమైన ఆటగాడి సేవలను జట్టు కచ్చితంగా కోల్పోతోందని ఆయన ఆవేదన వ్యక్తం చేశాడు.
ట్రేడింగ్ పుకార్లపై శార్దూల్ ఆగ్రహం..
హార్దిక్ పాండ్యా ముంబై ఇండియన్స్ను వీడి మరో జట్టులోకి వెళ్తున్నారంటూ వస్తున్న వార్తలను శార్దూల్ కొట్టిపారేశాడు. సామాజిక మాధ్యమాల్లో ఇలాంటి అసత్య ప్రచారాలు సహజమని, వాటిని పట్టించుకోవాల్సిన అవసరం లేదని స్పష్టం చేశాడు. ఈ సీజన్లో హార్దిక్ అటు బ్యాటింగ్లోనూ, ఇటు బౌలింగ్లోనూ ఆశించిన స్థాయిలో రాణించలేకపోయాడు. ఎనిమిది ఇన్నింగ్స్ల్లో కేవలం 146 పరుగులు మాత్రమే చేసి, బౌలింగ్లోనూ భారీగా పరుగులు సమర్పించుకున్నాడు. ఈ పేలవ ప్రదర్శన వల్లే ఇలాంటి పుకార్లు పుట్టుకొస్తున్నాయని విశ్లేషకులు భావిస్తున్నారు.
బూమ్రా సారథ్యంలో అద్భుత విజయం..
హార్దిక్ అందుబాటులో లేకపోవడం, సూర్యకుమార్ యాదవ్ తన బిడ్డ పుట్టిన కారణంగా సెలవులో ఉండటంతో జస్ప్రీత్ బూమ్రా తొలిసారి ముంబై జట్టుకు నాయకత్వం వహించాడు. పంజాబ్ కింగ్స్తో జరిగిన మ్యాచ్లో ముంబై అద్భుత పోరాట పటిమ కనబరిచింది. శార్దూల్ ఠాకూర్ నాలుగు వికెట్లతో చెలరేగగా, తిలక్ వర్మ కేవలం 33 బంతుల్లో 75 పరుగులు చేసి జట్టుకు నాలుగో విజయాన్ని అందించాడు. రోహిత్ శర్మ, హార్దిక్ పాండ్యా, బూమ్రా ముగ్గురూ విభిన్న శైలి గల కెప్టెన్లని, ఆటగాళ్లు రాణిస్తేనే ఏ కెప్టెన్ అయినా విజయవంతం అవుతారని శార్దూల్ అభిప్రాయపడ్డాడు.
ముంబై ఇండియన్స్ ప్రస్తుతం పాయింట్ల పట్టికలో ఎనిమిదో స్థానంలో ఉంది. హార్దిక్ పాండ్యా రాకతో జట్టు మళ్లీ గాడిలో పడుతుందని యాజమాన్యం ఆశిస్తోంది. అయితే ఆటగాళ్ల మధ్య సమన్వయం, కీలక సమయాల్లో రాణించడం ముంబై ప్లే ఆఫ్ ఆశలకు అత్యంత కీలకం కానుంది.
మరిన్ని క్రీడా వార్తల కోసం ఇక్కడ క్లిక్ చేయండి..