MPL 2026: ఐపీఎల్ రేంజ్‌లో ఎంపీఎల్ వేలం.. రికార్డ్ ధర పలికిన ఢిల్లీ క్యాపిటల్స్ స్టార్..

Madhya Pradesh League 2026: మధ్యప్రదేశ్ ప్రీమియర్ లీగ్ (MPL) మూడవ సీజన్ కోసం నిర్వహించిన ప్లేయర్స్ వేలం క్రికెట్ అభిమానుల్లో భారీ అంచనాలను పెంచింది. మొత్తం 10 ఫ్రాంచైజీలు పాల్గొన్న ఈ వేలంలో 243 మంది ఆటగాళ్లు తమ అదృష్టాన్ని పరీక్షించుకున్నారు. ప్రముఖ వేలం నిర్వాహకుడు చారు శర్మ ఆధ్వర్యంలో జరిగిన ఈ ప్రక్రియ పూర్తిగా ఐపీఎల్ తరహాలోనే సాగడం విశేషం. ఈసారి లీగ్‌లోకి కొత్తగా రాయల్ నిమార్ ఈగల్స్, మాళ్వా స్టాలియన్స్, ఉజ్జయిన్ ఫాల్కన్స్ జట్లు ప్రవేశించడంతో పోటీ మరింత తీవ్రమైంది.

‘గ్రేడ్ ఏ’ స్టార్ల కోసం హోరాహోరీ పోరు..

వెంకటేష్, రజత్ పాటిదార్, అనికేత్ వర్మ, ఆశుతోష్ శర్మ వంటి ఎంపీఎల్ ‘గ్రేడ్ ఏ’ ఆటగాళ్లను తమ జట్లలో చేర్చుకోవడానికి పలు జట్లు పోటీపడ్డాయి. ఐపీఎల్ జట్టు ‘ఢిల్లీ డేర్‌డెవిల్స్’ స్టార్ ఆటగాడైన ఆశుతోష్ శర్మ ఎంపీఎల్ వేలంలో పాల్గొనడం ఇదే మొదటిసారి. ఈ ప్లేయర్ కోసం అన్ని జట్ల మధ్య హోరాహోరీ పోరు జరిగింది.

‘మల్వా స్టాలియన్స్’ జట్టు రూ. 15 లక్షల బిడ్‌ను దాఖలు చేసి, ఆశుతోష్ శర్మను ఈ సీజన్‌లో అత్యంత ఖరీదైన ఆటగాడిగా మార్చింది. ఆ తర్వాతి స్థానాల్లో అక్షత్ రఘువంశీ రూ. 13.80 లక్షలకు, అనికేత్ వర్మ రూ. 13.20 లక్షలకు, శివాంగ్ కుమార్ రూ. 13 లక్షలకు, మంగేష్ యాదవ్ రూ. 12 లక్షలకు, మాధవ్ తివారీ రూ. 10.60 లక్షలకు, సారాంశ్ జైన్ రూ. 9.60 లక్షలకు (‘రాయల్ నిమార్ ఈగల్స్’ జట్టు ద్వారా) అమ్ముడయ్యారు.

యువ ఆటగాళ్లకు గొప్ప వేదిక..

కేవలం సీనియర్లే కాకుండా, అండర్-19, దేశవాళీ టోర్నీల్లో రాణించిన యువ ఆటగాళ్లకు ఈ వేలం ఒక బంగారు అవకాశంలా మారింది. కేటగిరీ-సీ, డీలో ఉన్న వర్ధమాన క్రికెటర్లను సైతం జట్లు మంచి ధరలకు కొనుగోలు చేశాయి. ముంబై ఇండియన్స్, ఆర్సీబీ వంటి ఐపీఎల్ జట్లలో ఆడిన అనుభవం ఉన్న ఆటగాళ్లపై ఫ్రాంచైజీలు ప్రత్యేక దృష్టి సారించాయి.

రంగంలోకి 10 జట్లు..

ఈ సంవత్సరం మధ్యప్రదేశ్ క్రికెట్ లీగ్ లో మూడు కొత్త జట్లు చేరాయి. ఇవి మల్వా, నిమార్, ఉజ్జయిని ప్రాంతాలకు ప్రాతినిధ్యం వహిస్తాయి. అదనంగా, రెండు కొత్త మహిళల జట్లు కూడా చేరాయి.

వేలం ప్రారంభించిన మహానార్యమన్ సింధియా..

ఎంపీసీఏ అధ్యక్షుడు మహానార్యమన్ సింధియా వేలం ప్రక్రియను ప్రారంభించారు. ఫ్రాంచైజీ యజమానులను, హాజరైన వారందరినీ ఉద్దేశించి మాట్లాడుతూ, మధ్యప్రదేశ్‌లో క్రికెట్ ప్రతిభను గుర్తించడానికి, వారికి ఒక వేదికను కల్పించడానికి ఎంపీఎల్ ఒక అద్భుతమైన మాధ్యమంగా పరిణమించిందని ఆయన పేర్కొన్నారు. ఎంపీఎల్ ద్వారా అనేక మంది ఆటగాళ్లు అద్భుతమైన ప్రదర్శనలు కనబరిచి, IPL, WPLతోపాటు భారత జాతీయ జట్టులో చోటు దక్కించుకున్నారని ఆయన గుర్తుచేశారు. ఈ ఏడాది తొలిసారిగా వేలం జరుగుతోంది.

వేలం బాధ్యతలు చేపట్టిన ప్రముఖ స్పోర్ట్స్ యాంకర్ చారు శర్మ..

భారత క్రికెట్ తోపాటు వివిధ ఇతర క్రీడలతో అనుబంధం ఉన్న ప్రముఖ స్పోర్ట్స్ యాంకర్ చారు శర్మ ఈరోజు వేలం బాధ్యతలు చేపట్టారు. ఆయన ఈ కార్యక్రమాన్ని అత్యంత వృత్తిపరమైన రీతిలో నిర్వహించారు.