DC vs GT, IPL 2025: కోహ్లీ రికార్డ్‌కే స్కెచ్ గీసిన కేఎల్ రాహుల్.. సరికొత్త చరిత్రకు రంగం సిద్ధం?

Virat Kohli Kl Rahul

KL Rahul Record: ఐపీఎల్ 2025 సీజన్‌లో 60వ లీగ్ మ్యాచ్ నేడు ఢిల్లీ క్యాపిటల్స్ వర్సెస్ గుజరాత్ టైటాన్స్ (Delhi Capitals vs Gujarat Titans) మధ్య జరగనుంది. ఈ రెండు జట్ల మధ్య మ్యాచ్ ఢిల్లీలోని అరుణ్ జైట్లీ స్టేడియంలో జరుగుతోంది. ఈ సీజన్‌లో ఇప్పటివరకు ఢిల్లీ క్యాపిటల్స్ మంచి ప్రదర్శన కనబరిచింది. కానీ, ప్లేఆఫ్స్‌లో తమ స్థానాన్ని పదిలం చేసుకోవాలంటే, మిగిలిన 3 మ్యాచ్‌లలో ఇంకా మెరుగ్గా రాణించాల్సి ఉంటుంది.

నేటి మ్యాచ్‌లో, అందరి దృష్టి మరోసారి ఢిల్లీ క్యాపిటల్స్ కీలక ఆటగాడు కేఎల్‌ రాహుల్‌‌పైనే ఉంటుంది. ఇక రాహుల్ పైనే ఆధారపడి ఉంటుంది. ఈ సీజన్‌లో ఇప్పటివరకు అతను బ్యాటింగ్‌లో బాగా రాణిస్తున్నాడు. ఈ మ్యాచ్‌లో విరాట్ కోహ్లీ రికార్డును బద్దలు కొట్టడానికి రాహుల్‌కు గొప్ప అవకాశం ఉంది.

కోహ్లీ రికార్డును బద్దలు కొట్టడానికి 33 పరుగుల దూరంలో కేఎల్ రాహుల్..

ఐపీఎల్ 2025 సీజన్‌లో కేఎల్ రాహుల్ 10 మ్యాచ్‌ల్లో 47.63 సగటుతో 381 పరుగులు చేశాడు. ఇందులో అతను మూడు హాఫ్ సెంచరీ ఇన్నింగ్స్‌లు ఆడాడు. అతని స్ట్రైక్ రేట్ కూడా 142.16గా ఉంది. గుజరాత్ టైటాన్స్‌తో జరిగే మ్యాచ్‌లో కేఎల్ రాహుల్ మరో 33 పరుగులు చేస్తే, అతను తన టీ20 కెరీర్‌లో 8000 పరుగుల మార్కును చేరుకుంటాడు. రాహుల్ ఇలా చేస్తే, అతి తక్కువ ఇన్నింగ్స్‌లలో ఈ ఘనత సాధించిన భారత ఆటగాడిగా నిలిచి, విరాట్ కోహ్లీ రికార్డును బద్దలు కొడతాడు.

కోహ్లీ తన టీ20 కెరీర్‌లో 243 ఇన్నింగ్స్‌లలో 8000 పరుగులు పూర్తి చేశాడు. టీ20 క్రికెట్‌లో అతి తక్కువ ఇన్నింగ్స్‌లలో 8000 పరుగులు పూర్తి చేసిన రికార్డు క్రిస్ గేల్ పేరిట ఉంది. అతను కేవలం 213 ఇన్నింగ్స్‌లలో ఈ ఘనతను సాధించాడు.

కేఎల్ రాహుల్ టి20 కెరీర్

కెఎల్ రాహుల్ టి20 క్రికెట్ కెరీర్ గురించి మాట్లాడుకుంటే, అతను 236 మ్యాచ్‌ల్లో 223 ఇన్నింగ్స్‌లలో బ్యాటింగ్ చేస్తూ 42.15 సగటుతో మొత్తం 7967 పరుగులు చేశాడు. ఈ కాలంలో, అతను బ్యాట్‌తో 6 సెంచరీ ఇన్నింగ్స్‌లను నమోదు చేయగా, 68 అర్ధ సెంచరీలు కూడా చేశాడు. టీ20లో రాహుల్ స్ట్రైక్ రేట్ 136.14గా నిలిచింది.

ఢిల్లీ గత ఐదు మ్యాచ్‌ల్లో మూడింటిలో ఓడిపోగా, ఒక మ్యాచ్ వర్షం కారణంగా రద్దయింది. భద్రతా కారణాల దృష్ట్యా ధర్మశాలలో వారి మునుపటి మ్యాచ్ రద్దు చేయవలసి వచ్చింది. జమ్మూ, పఠాన్‌కోట్‌లలో వైమానిక దాడుల హెచ్చరికల తర్వాత మ్యాచ్‌ను సగంలో ఆపాల్సి వచ్చింది. ఢిల్లీ క్యాపిటల్స్ 11 మ్యాచ్‌ల్లో 13 పాయింట్లతో పాయింట్ల పట్టికలో ఐదో స్థానంలో ఉంది.