IND vs ENG: కోహ్లీ రికార్డును బద్దలు కొట్టిన బట్లర్.. ఇక తర్వాతి టార్గెట్ రోహిత్.. అదేంటంటే..?
Jos Buttler Breaks Virat Kohli Record: జోస్ బట్లర్ నమోదు చేసిన ఈ చారిత్రాత్మక శతకం ఇంగ్లాండ్ జట్టుకు కొండంత బలాన్ని ఇచ్చింది. ఫామ్ లేమితో ఇబ్బంది పడుతున్న తరుణంలో భారత్పై సాధించిన ఈ రికార్డు బ్రేకింగ్ ఇన్నింగ్స్, రాబోయే రోజుల్లో టీ20 క్రికెట్లో బట్లర్ హవాను మరింత పెంచేలా కనిపిస్తోంది. రోహిత్ శర్మ, బాబర్ ఆజంల రికార్డులను బట్లర్ ఎంత త్వరగా బద్దలు కొడతాడో చూడాలి.
Updated on: Jul 12, 2026 | 1:29 PM
Jos Buttler Breaks Virat Kohli Record: భారత్, ఇంగ్లాండ్ మధ్య జరిగిన ఆఖరి ఐదో టీ20 మ్యాచ్లో ఇంగ్లాండ్ బ్యాటర్ జోస్ బట్లర్ అరుదైన ప్రపంచ రికార్డును నెలకొల్పాడు. సౌతాంప్టన్లోని రోజ్ బౌల్ మైదానంలో పరుగుల సునామీ సృష్టించిన బట్లర్, టీమిండియాపై అద్భుత శతకంతో చెలరేగడమే కాకుండా.. అంతర్జాతీయ టీ20 క్రికెట్లో అత్యధిక రన్ల జాబితాలో భారత రన్ మెషీన్ విరాట్ కోహ్లీ రికార్డును అధిగమించి సరికొత్త మైలురాయిని అందుకున్నాడు.
ఇది కూడా చదవండి: ‘నా పేరిట చెత్త రికార్డ్.. ప్రపంచంలో కెప్టెన్ జీరో నేనే’..: శ్రేయస్ అయ్యర్
భారత బౌలింగ్పై జోస్ బట్లర్ దండయాత్ర..
ఈ ఆఖరి టీ20 మ్యాచ్లో టాస్ ఓడి మొదట బ్యాటింగ్ చేసిన ఇంగ్లాండ్ జట్టు నిర్ణీత 20 ఓవర్లలో 3 వికెట్ల నష్టానికి 257 పరుగుల భారీ స్కోరు సాధించింది. ఇంగ్లాండ్ ఇన్నింగ్స్ ప్రారంభించిన జోస్ బట్లర్ మొదటి బంతి నుంచే భారత బౌలర్లపై విరుచుకుపడ్డాడు. కేవలం 64 బంతులు ఎదుర్కొన్న బట్లర్.. 12 ఆకర్షణీయమైన ఫోర్లు, 8 సిక్సర్ల సాయంతో 131 పరుగులు చేసి అజేయంగా నిలిచాడు. ఈ కొండంత లక్ష్య ఛేదనలో టీమిండియా 201 పరుగులకే పరిమితం కావడంతో 56 పరుగుల తేడాతో ఇంగ్లాండ్ ఘనవిజయం సాధించింది. ఈ విజయంతో ఐదు మ్యాచ్ల సిరీస్ను ఇంగ్లాండ్ 4-0తో క్లీన్స్వీప్ చేసింది.
‘కింగ్ కోహ్లీ’ రికార్డును బద్దలు కొట్టిన బట్లర్..
ఈ మ్యాచ్లో సృష్టించిన విధ్వంసంతో అంతర్జాతీయ టీ20 క్రికెట్ చరిత్రలో అత్యధిక పరుగులు చేసిన ప్రపంచపు మూడో మేటి బ్యాటర్గా జోస్ బట్లర్ రికార్డు సృష్టించాడు. ఈ క్రమంలో భారత దిగ్గజం విరాట్ కోహ్లీని వెనక్కి నెట్టాడు. విరాట్ కోహ్లీ తన టీ20 కెరీర్లో 117 ఇన్నింగ్స్లు ఆడి మొత్తం 4,188 పరుగులు సాధించాడు. కాగా, జోస్ బట్లర్ తన 147వ అంతర్జాతీయ ఇన్నింగ్స్లో 2,828 బంతులను ఎదుర్కొని మొత్తం 4,212 పరుగులకు చేరుకుని కోహ్లీ రికార్డును బద్దలు కొట్టాడు.
బట్లర్ తదుపరి లక్ష్యం ‘హిట్మ్యాన్’ రోహిత్ శర్మ..!
ప్రస్తుతం అంతర్జాతీయ టీ20ల్లో అత్యధిక పరుగుల రికార్డు జాబితాలో పాకిస్తాన్ బ్యాటర్ బాబర్ ఆజం 4,596 పరుగులతో మొదటి స్థానంలో ఉన్నాడు. ఇక భారత మాజీ కెప్టెన్, హిట్మ్యాన్ రోహిత్ శర్మ 4,231 పరుగులతో రెండో స్థానంలో కొనసాగుతున్నాడు. ప్రస్తుతం 4,212 పరుగులతో మూడో స్థానంలో ఉన్న జోస్ బట్లర్.. రాబోయే మ్యాచ్లలో కేవలం మరో 20 పరుగులు చేస్తే రోహిత్ శర్మ రికార్డును అధిగమించి రెండో స్థానానికి చేరుకుంటాడు. అదే వేగంతో మరో 385 పరుగులు సాధిస్తే బాబర్ ఆజంను సైతం దాటి ప్రపంచంలోనే నంబర్ వన్ టీ20 రన్ మెషీన్గా అవతరిస్తాడు.
మరిన్ని క్రీడా వార్తల కోసం ఇక్కడ క్లిక్ చేయండి..
