IPL 2026: వేలంలో రూ. 25 కోట్లకుపైగానే.. కట్ చేస్తే.. డకౌట్‌తో పరవు తీసిన ఐపీఎల్ కాస్ట్లీ ప్లేయర్..

 Cameron Green out on zero in Adelaide Test: క్రికెట్ ప్రపంచంలో ఒక్కోసారి విచిత్రమైన సంఘటనలు జరుగుతుంటాయి. ఒకవైపు వేలంలో కాసుల వర్షం కురుస్తుంటే, మరోవైపు మైదానంలో మాత్రం పరుగులు తీయడానికి ఆటగాళ్లు నానా తంటాలు పడుతుంటారు. తాజాగా ఆస్ట్రేలియా స్టార్ ఆల్ రౌండర్ కెమెరాన్ గ్రీన్ విషయంలో సరిగ్గా ఇదే జరిగింది. ఐపీఎల్ చరిత్రలోనే అత్యంత ఖరీదైన విదేశీ ఆటగాడిగా రికార్డు సృష్టించిన గ్రీన్, ఆ మరుసటి రోజే బ్యాటింగ్‌లో ఘోరంగా విఫలమయ్యాడు.

ఐపీఎల్ వేలంలో ఆల్-టైమ్ రికార్డ్ అబుదాబి వేదికగా డిసెంబర్ 16న జరిగిన ఐపీఎల్ 2026 వేలంలో కెమెరాన్ గ్రీన్ పేరు మారుమోగిపోయింది. ఫ్రాంచైజీలు అతని కోసం పోటీపడగా, చివరికి కోల్‌కతా నైట్ రైడర్స్ (KKR) ఏకంగా రూ. 25.20 కోట్ల భారీ ధరకు అతన్ని దక్కించుకుంది. దీంతో ఐపీఎల్ చరిత్రలోనే అత్యంత ఖరీదైన విదేశీ ఆటగాడిగా గ్రీన్ చరిత్ర సృష్టించాడు. గతంలో మిచెల్ స్టార్క్ (రూ. 24.75 కోట్లు – KKR) పేరిట ఉన్న రికార్డును గ్రీన్ బద్దలు కొట్టాడు. విశేషమేమిటంటే, ఈ రెండు భారీ రికార్డులు కూడా కోల్‌కతా నైట్ రైడర్స్ ఖాతాలోనే ఉన్నాయి.

కోట్ల ఆనందం ఒక్క రోజు కూడా నిలవలేదు..

వేలంలో జాక్‌పాట్ కొట్టిన ఆనందం గ్రీన్‌కు ఎంతో సేపు నిలవలేదు. వేలం జరిగిన మరుసటి రోజే (డిసెంబర్ 17) ఆస్ట్రేలియా వర్సెస్ ఇంగ్లాండ్ జట్ల మధ్య అడిలైడ్‌లో టెస్ట్ మ్యాచ్ ప్రారంభమైంది. భారీ ధర పలికిన గ్రీన్ మీద అందరి దృష్టి ఉంది. కానీ, మైదానంలోకి దిగిన గ్రీన్ కనీసం ఒక్క పరుగు కూడా చేయలేకపోయాడు. మొదటి ఇన్నింగ్స్‌లో ఖాతా తెరవకుండానే (డకౌట్) పెవిలియన్ బాట పట్టాడు.

రూ. 25 కోట్లకు పైగా ధర పలికిన ఆటగాడు, ఆ వెంటనే ఆడిన మ్యాచ్‌లో ఇలా ఒక్క పరుగు కూడా చేయకుండా అవుట్ అవ్వడం క్రికెట్ అభిమానులను ఆశ్చర్యానికి గురి చేసింది. ఒకవైపు బ్యాంకు ఖాతా నిండినా, స్కోర్ బోర్డు మాత్రం ఖాళీగా మిగిలిపోవడం గ్రీన్‌కు మింగుడుపడని విషయమే.

మొత్తానికి, ఐపీఎల్ వేలం రికార్డులతో వార్తల్లో నిలిచిన కెమెరాన్ గ్రీన్, ఇప్పుడు తన బ్యాటింగ్ వైఫల్యంతో మరోసారి చర్చనీయాంశమయ్యాడు.