RCB vs GT: వామ్మో.. ఇరుజట్ల ప్లేయింగ్ 11 చూస్తే ట్రాన్స్ఫార్మర్లే పేలిపోతాయ్.. ఢీ అంటే ఢీ అంటున్నారుగా
RCB vs GT Playing XI: ఐపీఎల్ 2026 ప్లేఆఫ్స్ సమరానికి సర్వం సిద్ధమైంది. లీగ్ దశలో అగ్రస్థానంలో నిలిచిన రాయల్ ఛాలెంజర్స్ బెంగళూరు, రన్నరప్గా నిలిచిన గుజరాత్ టైటాన్స్ నేడు ధర్మశాల వేదికగా రాత్రి 7:30 గంటలకు జరగనున్న తొలి క్వాలిఫైయర్ మ్యాచ్లో తలపడనున్నాయి. ఈ మ్యాచ్లో గెలిచిన జట్టు నేరుగా ఫైనల్కు చేరుకుంటుంది.
Updated on: May 26, 2026 | 1:13 PM
IPL 2026 Qualifier 1 RCB vs GT Playing XI: క్రికెట్ పండుగ తుది అంకానికి చేరుకోవడంతో అభిమానుల్లో ఉత్కంఠ నరాల తెగుతోంది. లీగ్ దశలో అద్భుతమైన ఆటతీరుతో ఆకట్టుకున్న బెంగళూరు, గుజరాత్ జట్లు ఇప్పుడు టైటిల్కు కేవలం ఒక్క అడుగు దూరంలో నిలిచాయి. నేటి మ్యాచ్లో విజయం సాధించిన జట్టు నేరుగా తుది పోరుకు అర్హత సాధిస్తే, ఓడిన జట్టుకు నిరాశ చెందాల్సిన అవసరం లేదు. ఎందుకంటే, క్వాలిఫైయర్-2 రూపంలో ఫైనల్ చేరడానికి మరో సువర్ణ అవకాశం లభిస్తుంది.
ఫామ్స్ అండ్ మైండ్ గేమ్స్: గత మ్యాచ్ల ప్రభావం..
బెంగళూరు జట్టు ఈ సీజన్లో ఆడిన 14 మ్యాచ్ల్లో 9 విజయాలతో పాయింట్ల పట్టికలో అగ్రస్థానాన్ని కైవసం చేసుకుంది. అయితే, తన చివరి లీగ్ మ్యాచ్లో హైదరాబాద్ చేతిలో 55 పరుగుల తేడాతో ఓటమి చవిచూడటం ఆ జట్టుకు చిన్న షాక్ అని చెప్పాలి. హైదరాబాద్ నిర్దేశించిన 255 పరుగుల భారీ లక్ష్య ఛేదనలో బెంగళూరు 200 పరుగులకే పరిమితమైంది.
మరోవైపు గుజరాత్ టైటాన్స్ పాయింట్ల పట్టికలో రెండో స్థానంలో నిలిచింది. తన చివరి లీగ్ మ్యాచ్లో బలమైన చెన్నై జట్టుపై 89 పరుగుల భారీ తేడాతో ఘన విజయం సాధించి, పూర్తి ఆత్మవిశ్వాసంతో ప్లేఆఫ్స్ బరిలోకి దిగుతోంది.
బెంగళూరు వ్యూహాలు: ఓపెనింగ్ సస్పెన్స్..!
బెంగళూరు జట్టు బ్యాటింగ్, బౌలింగ్ విభాగాల్లో చాలా పటిష్టంగా కనిపిస్తోంది. రన్ మెషీన్ విరాట్ కోహ్లీ, వెంకటేష్ అయ్యర్ జోడీ జట్టుకు అదిరిపోయే ఆరంభాలు ఇస్తోంది. అయితే, గాయం నుంచి కోలుకున్న స్టార్ బ్యాటర్ ఫిల్ సాల్ట్ జట్టులోకి వచ్చేందుకు సిద్ధమయ్యాడు. ఇప్పుడు అతడిని నేరుగా ఓపెనర్గా బరిలోకి దించుతారా, లేక గత మ్యాచ్ల్లో అదరగొట్టిన వెంకటేష్ అయ్యర్నే కొనసాగిస్తారా అనేది ఆసక్తికరంగా మారింది.
మిడిలార్డర్లో దేవదత్ పడిక్కల్, రజత్ పాటిదార్ మెరుపులు మెరిపిస్తుండగా, జితేష్ శర్మ, టీమ్ డేవిడ్, కృణాల్ పాండ్యాలు ఫినిషర్లుగా భారీ హిట్టింగ్కు సిద్ధంగా ఉన్నారు. బౌలింగ్లో సీనియర్ స్పీడ్స్టర్ భువనేశ్వర్ కుమార్, జోష్ హేజిల్వుడ్ జట్టుకు ప్రధాన అండగా నిలుస్తున్నారు.
గుజరాత్ బలం: మారే ప్రసక్తే లేని తుది జట్టు..
గుజరాత్ టైటాన్స్ జట్టు చూస్తే ఎంతో స్థిరంగా కనిపిస్తోంది. ఈ కీలక మ్యాచ్లో తమ తుది జట్టులో ఎలాంటి మార్పులు చేసే అవకాశం కనిపించడం లేదు. కెప్టెన్ శుభ్మన్ గిల్, సాయి సుదర్శన్, జోస్ బట్లర్ లీగ్ దశ నుంచి భీకరమైన ఫామ్లో ఉన్నారు. వీరికి తోడు వాషింగ్టన్ సుందర్ మిడిలార్డర్లో జట్టును అద్భుతంగా ఆదుకుంటున్నాడు.
ఇది కూడా చదవండి: IPL 2026 Playoffs: ఎవరు గెలిచినా సరికొత్త చరిత్రే.. అక్కడే ఉంది అసలైన ట్విస్ట్..!
నిశాంత్ సింధు, జేసన్ హోల్డర్ ఆల్రౌండర్లుగా సేవలు అందిస్తుండగా, రషీద్ ఖాన్ తన స్పిన్ మాయాజాలంతో ప్రత్యర్థులను కట్టడి చేయనున్నాడు. బౌలింగ్ విభాగంలో కగిసో రబడా, మహమ్మద్ సిరాజ్, ప్రసిద్ధ్ కృష్ణ వంటి స్టార్ పేసర్లు బెంగళూరు బ్యాటర్లను ఇబ్బంది పెట్టడానికి వ్యూహాలు రచిస్తున్నారు.
ధర్మశాల పిచ్ రిపోర్ట్.. టాస్ గెలిస్తే ఏం చేస్తారు?
హిమాచల్ ప్రదేశ్లోని ధర్మశాల మైదానం బ్యాటింగ్కు స్వర్గధామంగా మారుతోంది. ఈ సీజన్లో ఇక్కడ జరిగిన మ్యాచ్ల్లో భారీ స్కోర్లు నమోదయ్యాయి. ఆరంభంలో ఫాస్ట్ బౌలర్లకు పిచ్ నుంచి కొంత స్వింగ్ లభించినప్పటికీ, సమయం గడిచేకొద్దీ బ్యాటర్లు పూర్తి ఆధిపత్యం చలాయించే అవకాశం ఉంది. ఈ నేపథ్యంలో టాస్ గెలిచిన జట్టు మొదట బౌలింగ్ ఎంచుకుని, పిచ్పై ఉన్న తేమను వాడుకోవాలని భావించే అవకాశం ఎక్కువగా ఉంది.
సమాన బలాలు.. వర్షం పడితే ఆర్సీబీకే లక్!
ఐపీఎల్ చరిత్రలో బెంగళూరు, గుజరాత్ జట్లు ఇప్పటివరకు 8 సార్లు తలపడగా.. ఇరు జట్లు చెరో 4 విజయాలతో సమానంగా నిలిచాయి. ఈ సీజన్లో కూడా ఇరు జట్లు రెండు సార్లు తలపడగా, తమ తమ హోమ్ గ్రౌండ్లలోనే విజయాలు సాధించడం విశేషం.
అయితే ఈ మ్యాచ్కు వర్షం ముప్పు ఏమీ లేదు. ఒకవేళ వాతావరణంలో మార్పులు వచ్చి, వర్షం కారణంగా మ్యాచ్ పూర్తిగా రద్దయితే మాత్రం పాయింట్ల పట్టికలో అగ్రస్థానంలో ఉన్న బెంగళూరు జట్టు నేరుగా ఫైనల్కు చేరుకుంటుంది. ఎందుకంటే ఐపీఎల్ నిబంధనల ప్రకారం క్వాలిఫైయర్-1, ఎలిమినేటర్, క్వాలిఫైయర్-2 మ్యాచ్లకు ఎలాంటి రిజర్వ్ డే లేదు. కేవలం ఫైనల్ మ్యాచ్కి మాత్రమే రిజర్వ్ డే కేటాయించారు.
ఇరు జట్ల అంచనా తుది జట్లు (Playing XI):
రాయల్ ఛాలెంజర్స్ బెంగళూరు (RCB): విరాట్ కోహ్లీ
వెంకటేష్ అయ్యర్ / ఫిల్ సాల్ట్
దేవదత్ పడిక్కల్
రజత్ పాటిదార్
జితేష్ శర్మ (కీపర్)
టీమ్ డేవిడ్
కృణాల్ పాండ్యా
భువనేశ్వర్ కుమార్
జోష్ హేజిల్వుడ్
రసిక్ సలామ్
సుయాష్ శర్మ
గుజరాత్ టైటాన్స్ (GT):
శుభ్మన్ గిల్
సాయి సుదర్శన్
జోస్ బట్లర్
వాషింగ్టన్ సుందర్
నిశాంత్ సింధు
జేసన్ హోల్డర్
రషీద్ ఖాన్
అర్షద్ ఖాన్
కగిసో రబడా
మహమ్మద్ సిరాజ్
ప్రసిద్ధ్ కృష్ణ
విరాట్ కోహ్లీ వర్సెస్ శుభ్మన్ గిల్ బ్యాటింగ్ పవర్ప్లే.. మహమ్మద్ సిరాజ్ వర్సెస్ జోష్ హేజిల్వుడ్ బౌలింగ్ యుద్ధం ఈ మ్యాచ్కు అసలైన ఊపును తీసుకువస్తున్నాయి. ఇరు జట్లలోనూ ఒంటిచేత్తో మ్యాచ్ను గెలిపించే మ్యాచ్ విన్నర్లు ఉండటంతో ఈ క్వాలిఫైయర్-1 పోరు క్రికెట్ ప్రేమికులకు అసలైన విందు భోజనంలా మారడం ఖాయం!
మరిన్ని క్రీడా వార్తల కోసం ఇక్కడ క్లిక్ చేయండి..
