IPL 2024: శ్రుతిమించిన సెలబ్రేషన్స్.. కేకేఆర్ స్టార్ బౌలర్‌కు భారీ షాక్.. ఒక మ్యాచ్ నిషేధంతో పాటు..

Harshit Rana

Kolkata Knight Riders vs Delhi Capitals: ఇండియన్ ప్రీమియర్ లీగ్ 2024లో కోల్‌కతా నైట్ రైడర్స్ అద్భుతమైన ప్రదర్శన కొనసాగుతోంది. సోమవారం (ఏప్రిల్ 29) రాత్రి ఢిల్లీ క్యాపిటల్స్ తో జరిగిన మ్యాచ్ లోనూ కేకేఆర్ ఘన విజయం సాధించింది. ఈ విజయంలో కోల్ కతా ప్లే ఆఫ్ అవకాశాలు మరింత మెరుగయ్యాయి. ఇలా ఫుల్ జోష్ లో ఉన్న కేకేఆర్ కు భారీ షాక్ తగిలింది. ఢిల్లీ క్యాపిటల్స్‌తో జరిగిన మ్యాచ్‌లో ఐపీఎల్ ప్రవర్తనా నియమావళిని ఉల్లంఘించినందుకు కేకేఆర్ స్టార్ బౌలర్ హర్షిత్ రాణాపై ఒక మ్యాచ్ నిషేధం విధించారు. అలాగే 100 శాతం మ్యాచ్ ఫీజు జరిమానా విధించారు. ఢిల్లీ క్యాపిటల్స్‌తో జరిగిన మ్యాచ్‌లో హర్షిత్ రాణా ఐపీఎల్ ప్రవర్తనా నియమావళిని ఉల్లంఘించాడు. ఆ జట్టు బ్యాటర్‌ అభిషేక్‌ పోరెల్‌ పట్ల అసభ్యకరంగా ప్రవర్తించినందుకు రాణాపై కఠిన చర్యలు తీసుకున్నారు. అభిషేక్‌ ఔటైన తర్వాత రాణా శృతిమించిన సంబురాలు (అభిషేక్‌ను డగౌట్‌ వైపు వెళ్లాలని కోపంగా ఆదేశించాడు) చేసుకుని తగిన మూల్యం చెల్లించుకున్నాడు.దీనికి సంబంధించి హర్షిత్ మ్యాచ్ రిఫరీ ముందు హాజరయ్యాడు. తన తప్పును అంగీకరించాడు. దీంతో అతనికి భారీ జరిమానాతో పాటు శిక్ష తప్పలేదు. హర్షిత్ రాణా ఒక మ్యాచ్ సస్పెండ్ కావడమే కాకుండా మ్యాచ్ ఫీజును కూడా కోల్పోయాడు. హర్షిత్ రాణా 100 శాతం మ్యాచ్ ఫీజులో కోత విధించారు. అంటే, అతను ఢిల్లీ క్యాపిటల్స్‌తో మ్యాచ్ కోసం IPL ఫీజును పొందలేడు

హర్షిత్ రాణా ఇలా చేయడం రెండోసారి. సన్‌రైజర్స్ హైదరాబాద్‌తో జరిగిన మ్యాచ్ లో మయాంక్ ఆగర్వాల్ ను ఔట్ చేసిన అనంతరం ఫ్లయింగ్ కిస్ లు ఇస్తూ అతనిని రెచ్చగొట్టే ప్రయత్నం చేశాడు. ఇందుకు ప్రతిఫలంగా అతని మ్యాచ్ ఫీజులో 60 శాతం తగ్గించి వార్నింగ్ ఇచ్చి వదిలి పెట్టారు. కానీ ఢిల్లీతో జరిగిన మ్యాచ్ లోనూ మళ్లీ ఇదే తప్పు ను పునరావృతం చేశాడు హర్షిత్ రాణా. దీంతో ఈసారి కేకేఆర్ బౌలర్ కు భారీ జరిమానాతో పాటు ఒక మ్యాచ్ సస్పెన్షన్ విధించారు. ఈ సీజన్‌లో హర్షిత్ రానా మంచి ప్రదర్శన కనబరిచాడు. ఈ సీజన్‌లో మొత్తం 8 మ్యాచ్‌లు ఆడి 11 వికెట్లు తీశాడు. అయితే శ్రుతి మించిన సెలబ్రేషన్స్ అతని పాలిట శాపంగా మారాయి.

హర్షిత్ రాణా సెలబ్రేషన్స్ వీడియో..

మరిన్ని క్రీడా వార్తల కోసం ఇక్కడ క్లిక్ చేయండి..