ఇంత అవమానమా.. ఇది ముమ్మాటికి బుడ్డోడి కాన్ఫిడెన్స్‌ని దెబ్బతీయడమే.. మాజీ ప్లేయర్ షాకింగ్ కామెంట్స్
Vaibhav Suryavanshi: భారత జట్టు మేనేజ్‌మెంట్ వైభవ్ సూర్యవంశీ, సంజూ శాంసన్ వంటి ఆటగాళ్లను తరచూ మార్చడం వల్ల వారి ఆత్మవిశ్వాసం దెబ్బతింటోందని 1983 ప్రపంచకప్ విజేత శ్రీకాంత్ ఆందోళన వ్యక్తం చేశారు. ఓపెనింగ్ స్థానంలో పోటీ ఉన్నప్పటికీ, స్థిరమైన అవకాశాలు లేకపోవడం ఆటగాళ్ల ప్రదర్శనపై ప్రభావం చూపుతోందని ఆయన అభిప్రాయపడ్డారు. టీ20 ప్రపంచకప్ సన్నాహకాలకు ఇది మంచిది కాదని సూచించారు.
Updated on: Oct 14, 2026 | 3:41 PM
భారత టీ20 జట్టులో ప్రస్తుతం టాప్ ఆర్డర్‌లో ప్రతిభావంతులైన ఆటగాళ్లు చాలామంది ఉన్నారు. అభిషేక్ శర్మ, సంజూ శాంసన్, ఇషాన్ కిషన్ ముగ్గురూ ఐపీఎల్‌లో తమ తమ జట్లకు స్టార్ ఓపెనర్లుగా కొనసాగుతున్నారు. అభిషేక్ శర్మకు వరుసగా అవకాశాలు లభిస్తుండగా.. వైభవ్ సూర్యవంశీ అంతర్జాతీయ క్రికెట్‌లోకి వచ్చిన తర్వాత ఓపెనింగ్ స్థానంలో అతడికి, సంజూ శాంసన్‌కు మధ్య పోటీ నెలకొంది. జూన్-జూలైలో ఐర్లాండ్, ఇంగ్లాండ్ పర్యటనలకు తొలిసారి సూర్యవంశీని ఎంపిక చేశారు. ఐర్లాండ్‌తో జరిగిన మ్యాచ్‌లో శాంసన్ ఆడాడు. ఆ తర్వాత ఇంగ్లాండ్‌తో తొలి టీ20లోనూ అతడికి అవకాశం వచ్చింది. ఆ మ్యాచ్‌ల్లో శాంసన్ 5, 0, 1 పరుగులు చేశాడు. ఆ తర్వాత రెండో టీ20లో వైభవ్ సూర్యవంశీకి అంతర్జాతీయ టీ20 అరంగేట్రం చేసే అవకాశం దక్కింది. అతడు మూడు మ్యాచ్‌లు ఆడి 14, 13, 15 పరుగులు చేశాడు.
ఇంగ్లాండ్‌తో జరిగిన ఐదో టీ20లో సంజూ శాంసన్ మళ్లీ జట్టులోకి వచ్చి 27 పరుగులు చేశాడు. అయితే ఆ తర్వాత జరిగిన జింబాబ్వే పర్యటనకు అతడికి విశ్రాంతి ఇచ్చారు. ఈ పర్యటనలో సూర్యవంశీ 50, 20, 81 పరుగులతో ఆకట్టుకున్నాడు. అయితే జట్టు మేనేజ్‌మెంట్ తరచూ ఆటగాళ్లను మార్చడం, తుది జట్టులో ప్రయోగాలు చేయడం వల్ల వారి ఆత్మవిశ్వాసం దెబ్బతింటోందని 1983 ప్రపంచకప్ విజేత కృష్ణమాచారి శ్రీకాంత్ అభిప్రాయపడ్డారు.
“వాళ్లు సంజూ శాంసన్ ఆత్మవిశ్వాసాన్ని మాత్రమే కాదు, అతడి ఆత్మవిశ్వాసాన్ని కూడా పూర్తిగా దెబ్బతీశారు. వెస్టిండీస్ లాంటి జట్టుతో అతడికి వరుసగా మూడు మ్యాచ్‌లు ఆడే అవకాశం ఇచ్చి ఉండాల్సింది. ఇప్పుడు అభిషేక్ శర్మను చాలా కాలంగా ఆడించారు కాబట్టి అతడికి విశ్రాంతి ఇవ్వొచ్చు. తదుపరి మ్యాచ్‌లో సూర్యవంశీ, శాంసన్ ఓపెనర్లుగా బరిలోకి దిగవచ్చు” అని శ్రీకాంత్ ఓ యూట్యూబ్ వీడియోలో అన్నారు.
శ్రీకాంత్ సంజూ శాంసన్ నిలకడపైనా ప్రశ్నలు లేవనెత్తారు. 2026 టీ20 ప్రపంచకప్‌లో భారత్ విజయం సాధించిన సమయంలో శాంసన్ మూడు మంచి ఇన్నింగ్స్‌లు ఆడాడు. అందులో ఫైనల్ మ్యాచ్ కూడా ఉంది. అయితే ఆ తర్వాత అతడి ఫామ్ క్రమంగా తగ్గిపోయింది.
“శాంసన్ ఎప్పుడూ నిలకడగా ఆడలేదు. అతడి స్థిరత్వంపై ఎప్పుడూ ప్రశ్నలు ఉన్నాయి. ప్రపంచకప్‌లో ఒక్కసారిగా అద్భుతంగా ఆడతాడు. ఆ తర్వాత మళ్లీ వరుసగా విఫలమవుతాడు. అభిషేక్ శర్మ లాంటి ఆటగాడిలో ఇలాంటి తీవ్ర హెచ్చుతగ్గులు కనిపించవు. ఇప్పుడు కూడా శాంసన్ తదుపరి మ్యాచ్‌లో పరుగులు చేస్తాడని అనుకుంటున్నాను” అని శ్రీకాంత్ పేర్కొన్నారు.
మరిన్ని క్రీడా వార్తల కోసం ఇక్కడ క్లిక్ చేయండి..
