భారత్-పాక్ మ్యాచ్: అందరినీ ఆకట్టుకున్న ఈ జంట ఎవరంటే..?

ప్రపంచవ్యాప్తంగా ఉత్కంఠను రేపిన భారత్- పాకిస్తాన్ మ్యాచ్‌లో 89 పరుగుల తేడాతో కోహ్లీ సేన మరో గెలుపును ఖాతాలో వేసుకున్న విషయం తెలిసిందే. కాగా ఇంగ్లండ్‌లోని మాంచెస్టర్ గ్రౌండ్స్‌లో జరిగిన ఈ మ్యాచ్‌కు దాయాది దేశాల నుంచే కాకుండా మిగిలిన దేశాల అభిమానులు కూడా భారీ సంఖ్యలో హాజరయ్యారు. అయితే వారందరిలో కెనడాకు చెందిన ఓ జంట ఇరు దేశాల అభిమానుల మనసులను గెలుచుకుంది. భారత్‌- పాక్ దేశాల జెర్సీలను కలిపి కుట్టించుకున్న డ్రెస్ వేసుకొని ఈ జంట రెండు జట్లకు మద్దతు పలికింది.

ఇక వీరి ఫొటోను లక్ష్మీ కౌల్ అనే ఓ నెటిజన్ తన సోషల్ మీడియాలో షేర్ చేస్తూ.. ‘‘ఈ జంటను ఇండియా- పాకిస్తాన్ మధ్య జరిగిన ప్రపంచకప్ మ్యాచ్‌లో చూశా. ఇందులో భర్తది పాకిస్తాన్, భార్యది భారత్ అవ్వగా.. ఆ రెండు దేశాల జెర్సీలను కలపి కుట్టించుకొని ధరించారు. వారిద్దరు కెనడియన్స్. ఇంగ్లండ్‌లో ఆటను చూస్తూ.. శాంతికి చిహ్నంగా నిలిచారు’’ అంటూ కామెంట్ పెట్టారు. ఇక ఈ ఫొటోపై స్పందిస్తోన్న నెటిజన్లు.. ‘‘ఇరు దేశాల మధ్య జరుగుతున్నది కేవలం ఆటేనని వీరు అందరికి గట్టిగా చెప్పారని’’ ఒకరు కామెంట్ చేయగా.. ‘‘నిన్న ఎవరు గెలిచారనేది అనవసరం. కానీ మనమంతా ఒక్కటేనని వీరు చాటిచెబుతున్నారు’’ అంటూ మరొకరు కామెంట్ పెట్టారు.

Spotted this couple at the #IndiaVsPakistan @cricketworldcup game and was intrigued by their jerseys! Husband is from Pakistan, wife from India so both stitched up India-Pak jerseys & wore them! Both are Canadians, watching the game in England, rooting for peace #SpiritofCricket pic.twitter.com/KrUjtkjFMn

— Lakshmi Kaul लक्ष्मी कौल ???? (@KaulLakshmi) June 16, 2019