IPL 2025: చరిత్ర సృష్టించిన గుజరాత్ ఓపెనింగ్ పెయిర్! ఒకే సీజన్లో 800కి పైగా పరుగులు చేసిన తొలి భారతీయ జంటగా..

ఐపీఎల్ 2025 సీజన్‌లో గుజరాత్ టైటాన్స్ అదిరిపోయే విజయంతో ఢిల్లీ క్యాపిటల్స్ పై 10 వికెట్ల తేడాతో ఘన విజయాన్ని సాధించింది. ఈ గెలుపుతో గుజరాత్ ప్లేఆఫ్స్‌కు అర్హత పొందడమే కాక, మరోవైపు ఆ మ్యాచ్‌లో శుభ్‌మాన్ గిల్-సాయి సుదర్శన్ చరిత్ర సృష్టించారు. సుదర్శన్ అజేయంగా 108 పరుగులు చేయగా, కెప్టెన్ గిల్ 93 పరుగులతో నాటౌట్‌గా నిలిచాడు. ఢిల్లీ నిర్దేశించిన 200 పరుగుల లక్ష్యాన్ని గుజరాత్ ఒక ఓవర్ మిగిలి ఉండగానే ఛేదించి విజయాన్ని ఖాతాలో వేసుకుంది. ఈ విజయంతో గుజరాత్ టీమ్ మరోసారి తన సామర్థ్యాన్ని నిరూపించుకుంది. మ్యాచ్ జరగాల్సిన రోజు వర్షం కారణంగా వాయిదా పడగా, విరామం తర్వాత టోర్నమెంట్ తిరిగి ప్రారంభమైంది. గత వారం భారత్, పాకిస్తాన్ మధ్య జరిగిన ఉద్రిక్తతల కారణంగా టోర్నీ నిలిపివేయబడింది. కాల్పుల విరమణ అనంతరం అధికారుల నిర్ణయం మేరకు టోర్నమెంట్ కొనసాగింది.

ఈ గెలుపుతో గుజరాత్ మాత్రమే కాదు, రాయల్ ఛాలెంజర్స్ బెంగళూరు (RCB), పంజాబ్ కింగ్స్ (PBKS) కూడా ప్లేఆఫ్స్ రేసులోకి వచ్చాయి. ఈ రెండు జట్లు రాజస్థాన్ రాయల్స్‌తో జరిగిన తమ మ్యాచ్‌లను గెలిచిన నేపథ్యంలో గుజరాత్ విజయం వారికి కూడా లాభంగా మారింది. ఇక గిల్-సుదర్శన్ జంట 2025 ఐపీఎల్ సీజన్‌లో 800కి పైగా పరుగులు చేసిన తొలి భారతీయ జంటగా చరిత్రలో నిలిచారు. ఈ జోడీ మొత్తం 839 పరుగులు సాధించగా, ఇది ఐపీఎల్ చరిత్రలో ఏ భారత జంట చేసిన అత్యధిక భాగస్వామ్యం కావడం విశేషం. గతంలో 2021లో ధావన్-పృథ్వీ షా జోడీ 744 పరుగులు చేయగా, 2020లో KL రాహుల్-మయాంక్ అగర్వాల్ జంట 671 పరుగులు చేశారు.

ఢిల్లీ ఫిరోజ్ షా కోట్లా మైదానంలో జరిగిన ఈ మ్యాచ్‌లో ఇంపాక్ట్ ప్లేయర్‌గా వచ్చిన సుదర్శన్, తన రెండో సెంచరీ నమోదు చేశాడు. గిల్, సుదర్శన్ ఇద్దరూ కలిసి బ్యాటింగ్‌కు అనుకూలమైన పిచ్‌పై ధాటిగా ఆడి ఢిల్లీపై ఒత్తిడిని పెంచారు. గిల్ 13వ ఓవర్‌లో శ్రీలంక బౌలర్ దుష్మంత చమీరాపై దాడి ప్రారంభించగా, సుదర్శన్ కూడా తన సెంచరీని పూర్తి చేసి చివర్లో సిక్సర్‌తో మ్యాచ్ ముగించాడు. ఇదే సమయంలో గుజరాత్ ఐపీఎల్ 2022లో తన తొలి సీజన్‌లోనే టైటిల్ గెలిచిన జట్టుగా గుర్తింపు పొందిన సంగతి తెలిసిందే. ఇప్పటి వరకు 10 జట్ల పట్టికలో మళ్లీ అగ్రస్థానానికి చేరుకుంది.

మరోవైపు, ఢిల్లీ క్యాపిటల్స్ తరఫున కెఎల్ రాహుల్ అద్భుతంగా ఆడి తన ఐపీఎల్ కెరీర్‌లో 5వ సెంచరీను నమోదు చేశాడు. ఆయన 14 ఫోర్లు, 4 సిక్సర్లతో 112 పరుగులు చేసి ఢిల్లీ స్కోర్‌ను 199/3కి చేర్చాడు. అయితే ఈ స్కోర్ కూడా గుజరాత్ బ్యాటింగ్ దూకుడుకు సరిపోలేదు. రాహుల్‌తో పాటు అభిషేక్ పోరెల్ 30 పరుగులు చేసి ముఖ్యమైన భాగస్వామ్యం అందించగా, అక్షర్ పటేల్ 25 పరుగులు చేసి అవుటయ్యాడు. మ్యాచ్ చివర్లో రాహుల్, ట్రిస్టన్ స్టబ్స్ కలిసి చివరి ఓవర్‌లో 16 పరుగులు బాదుతూ స్కోర్ బోర్డును బలోపేతం చేశారు. అయినప్పటికీ, గుజరాత్ జట్టు బ్యాటింగ్ ముందు ఈ స్కోరు చిన్నదిగా మారిపోయింది.

మరిన్ని క్రికెట్ వార్తల కోసం ఇక్కడ క్లిక్ చేయండి..