IND vs NZ: 10 ఓవర్లలో 22 పరుగులే.. 2 మెయిడిన్ ఓవర్లతో కివీస్ గడ్డపై చరిత్ర సృష్టించిన అన్షుల్ కాంబోజ్!

Anshul Kamboj Records: భారత క్రికెట్‌లో యువ పేసర్ అన్షుల్ కాంబోజ్ (Anshul Kamboj) మరోసారి తన సత్తా చాటాడు. న్యూజిలాండ్‌తో జరిగిన తొలి వన్డేలో అద్భుత బౌలింగ్‌తో అందరి దృష్టిని ఆకర్షించాడు. ఆక్లాండ్‌లోని ఈడెన్ పార్క్ వేదికగా జరిగిన ఈ మ్యాచ్‌లో తన 10 ఓవర్ల కోటాను పూర్తి చేసి కేవలం 22 పరుగులే ఇచ్చాడు. రెండు మెయిడిన్ ఓవర్లు వేసి రెండు కీలక వికెట్లు పడగొట్టాడు. అతడి ఎకానమీ రేట్ కేవలం 2.20గా నమోదైంది. కివీస్ బ్యాటర్లకు పరుగులు చేసే అవకాశం ఇవ్వకుండా కట్టుదిట్టమైన లైన్ అండ్ లెంగ్త్‌తో బౌలింగ్ చేశాడు. ఈ ప్రదర్శనతో న్యూజిలాండ్ గడ్డపై అత్యంత పొదుపుగా బౌలింగ్ చేసిన భారత బౌలర్ల ప్రత్యేక జాబితాలో చోటు సంపాదించాడు. అంతేకాకుండా తన అంతర్జాతీయ వన్డే కెరీర్‌లో తొలి వికెట్లను కూడా ఖాతాలో వేసుకున్నాడు.

సాంట్నర్ వికెట్‌తో ఖాతా తెరిచిన అన్షుల్..

న్యూజిలాండ్ ఆల్‌రౌండర్ మిచెల్ సాంట్నర్ (Mitchell Santner) వికెట్‌తో అన్షుల్ తన వన్డే వికెట్ల ఖాతా తెరిచాడు. 16 బంతులు ఎదుర్కొన్న సాంట్నర్ కేవలం నాలుగు పరుగులే చేశాడు. అన్షుల్ వేసిన బంతిని ఆడే ప్రయత్నంలో బ్యాట్‌కు తగిలిన బంతి నేరుగా వికెట్లను తాకింది. దీంతో సాంట్నర్ పెవిలియన్‌కు చేరాడు.

కోహ్లీ అద్భుత క్యాచ్.. రెండో వికెట్

ఆ తర్వాత నాథన్ స్మిత్ (Nathan Smith) వికెట్‌ను కూడా అన్షుల్ తన ఖాతాలో వేసుకున్నాడు. ఆఫ్ స్టంప్ వెలుపల వేసిన బంతిని స్మిత్ ఆడేందుకు ప్రయత్నించగా బ్యాట్ అంచుకు తగిలింది. సెకండ్ స్లిప్‌లో ఉన్న విరాట్ కోహ్లీ (Virat Kohli) కుడివైపు డైవ్ చేస్తూ ఒంటి చేత్తో అద్భుత క్యాచ్ అందుకున్నాడు. దీంతో అన్షుల్‌కు రెండో వికెట్ దక్కింది.

శ్రీనాథ్, నెహ్రా సరసన అన్షుల్..

న్యూజిలాండ్‌లో వన్డే మ్యాచ్‌ల్లో కనీసం 10 ఓవర్లు బౌలింగ్ చేసిన భారత బౌలర్లలో అత్యంత పొదుపైన బౌలింగ్ గణాంకాల జాబితాలో అన్షుల్ చోటు సంపాదించాడు.

న్యూజిలాండ్ గడ్డపై భారత్ తరఫున అత్యంత పొదుపైన బౌలింగ్ గణాంకాలు:

3/13 – జవగళ్ శ్రీనాథ్, ఆక్లాండ్, 2003 (ఎకానమీ 1.30)

2/16 – ఆశిష్ నెహ్రా, ఆక్లాండ్, 2002 (ఎకానమీ 1.60)

2/18 – కపిల్ దేవ్, ఆక్లాండ్, 1994 (ఎకానమీ 1.80)

2/22 – అన్షుల్ కాంబోజ్, ఆక్లాండ్, 2026 (ఎకానమీ 2.20)

4/23 – జవగళ్ శ్రీనాథ్, ఆక్లాండ్, 2002 (ఎకానమీ 2.30)

బుమ్రా తర్వాత అత్యుత్తమ గణాంకాలు..

పది ఓవర్ల పూర్తి కోటాను బౌలింగ్ చేసి 2.20 ఎకానమీతో ముగించడం అన్షుల్ ప్రతిభకు నిదర్శనం. 2005 తర్వాత ఒక వన్డే ఇన్నింగ్స్‌లో మొత్తం 10 ఓవర్లు వేసిన భారత పేసర్లలో ఇది అత్యుత్తమ ఎకానమీ గణాంకాల్లో ఒకటిగా నిలిచింది. గత తొమ్మిదేళ్లలో భారత సీమర్లలోనూ ఇది అత్యుత్తమ ప్రదర్శనగా నిలిచింది. 2016లో జింబాబ్వేపై జస్ప్రీత్ బుమ్రా 10 ఓవర్లలో 22 పరుగులిచ్చి ఒక వికెట్ తీసుకున్నాడు. ఆ తర్వాత ఈ స్థాయిలో పొదుపుగా బౌలింగ్ చేసిన భారత పేసర్‌గా అన్షుల్ గుర్తింపు పొందాడు.

తొలి అంతర్జాతీయ వన్డేలో వికెట్ తీయలేకపోయిన అన్షుల్.. రెండో మ్యాచ్‌లోనే రెండు కీలక వికెట్లు పడగొట్టి తన ప్రతిభను నిరూపించుకున్నాడు. భవిష్యత్తులో భారత పేస్ దళానికి కీలక ఆటగాడిగా ఎదిగే సంకేతాలు ఇచ్చాడు.