భద్రాద్రి రామాలయ చరిత్రలో నవ శకం! చిన్న జీయర్ స్వామి ఆధ్వర్యంలో బాలాలయానికి తరలిన ..
భద్రాచలం శ్రీ సీతారామచంద్రస్వామి దేవస్థానం చరిత్రలో కీలక ఘట్టం ఆవిష్కృతం అయింది. ఆలయ విస్తరణ అభివృద్ధి పనుల్లో భాగంగా కళావాహన కార్యక్రమం ఘనంగా జరిగింది చిన్న జీయర్ స్వామి ఆధ్వర్యంలో వైదిక పరమైన పూజా కార్యక్రమాలు ఘనంగా జరిగాయి..ఉదయం ముందుగా పవిత్ర పావన గోదావరి నది నుండి నదీ జలాలను సేకరించి ఆలయానికి ఋత్వికుల బృందం మేలతాలతో తీసుకువచ్చారు. జీర్ణోద్ధరణ, కళావాహన కార్యక్రమాలలో పాల్గొనేందుకు..
దక్షిణ అయోధ్యగా పేరొందిన భద్రాచలం క్షేత్రం ఇప్పుడు సరికొత్త రూపం దాల్చబోతోంది. ఆలయ అభివృద్ధి, విస్తరణ పనుల ప్రారంభోత్సవంలో భాగంగా వైదిక శాస్త్రాల ప్రకారం అత్యంత కీలకమైన జీర్ణోద్ధరణ, కళావాహన కార్యక్రమాలు అత్యంత వైభవంగా జరిగాయి. ఈ చారిత్రాత్మక క్రతువు శ్రీ శ్రీ శ్రీ త్రిదండి చిన్న జీయర్ స్వామి వారి ప్రత్యక్ష పర్యవేక్షణలో జరిగింది. ఆలయానికి చేరుకున్న స్వామివారికి ఈవో దామోదర్ రావు మరియు అర్చక బృందం పూర్ణకుంభంతో స్వాగతం పలికారు. గోదావరి నది నుండి సేకరించిన పవిత్ర జలాలతో పూజా కార్యక్రమాలు ప్రారంభమయ్యాయి.
ఆలయ విస్తరణలో భాగంగా కొన్ని ఉపాలయాలను పునర్నిర్మించాల్సి ఉంది. ఈ క్రమంలో తొలుత అంతరాలయంలోని మూలమూర్తుల నుండి అనుమతి (అనుజ్ఞ) తీసుకున్నారు. భద్ర మహర్షి, లక్ష్మీ తాయారు అమ్మవారు, ఆళ్వార్ల శక్తిని కలశాలలోకి ఆవాహన చేశారు. సుమారు 72 మూలమూర్తులను ఏకకాలంలో రంగనాయకుల గుట్టపై తాత్కాలికంగా నిర్మించిన బాలాలయంలోకి తరలించారు. ఆలయ పునర్నిర్మాణం పూర్తయ్యే వరకు స్వామివార్లకు ఇక్కడే నిత్య కైంకర్యాలు జరుగుతాయి.
1960లో గోపురం పనులు జరిగిన తర్వాత, మళ్ళీ ఇప్పుడు ఆలయ ప్రాంగణంలో సమూల మార్పులు చేపట్టనున్నారు. ప్రధాన అంతరాలయం మినహా మిగిలిన ఉపాలయాలను ఆగమ శాస్త్రానుసారం విస్తరిస్తారు. ఈ మహా క్రతువులో పాల్గొనేందుకు రాష్ట్రంలోని వివిధ వైష్ణవ ఆలయాల నుండి 30 మంది నిష్ణాతులైన ఋత్వికులు భద్రాద్రికి చేరుకున్నారు. భక్త రామదాసు నిర్మించిన ఈ పవిత్ర ఆలయం, ఇప్పుడు ఆధునిక హంగులతో, భక్తుల సౌకర్యార్థం మరింత విస్తృతంగా తీర్చిదిద్దబడుతోంది. ఈ అభివృద్ధి పనులు పూర్తయితే భద్రాద్రి క్షేత్రం మరింత శోభాయమానంగా వెలుగొందనుంది.
మరిన్ని ఆధ్యాత్మిక వార్తల కోసం ఇక్కడ క్లిక్ చేయండి..