రావమ్మా మహాలక్ష్మి.. ఆదివారం అక్షయ తృతీయ.. ఇదొక్కటి చేస్తే మీ ఇంట్లో ధన వర్షం కురవాల్సిందే

వైశాఖ మాసంలో వచ్చే అక్షయ తృతీయ హిందువులకు అత్యంత పవిత్రమైన పర్వదినం. ఈ రోజున చేసే ఏ శుభకార్యానికైనా, దానధర్మానికైనా అక్షయమైన, అంటే ఎప్పటికీ నశించని, ఫలితం లభిస్తుందని ప్రసిద్ధ ఆధ్యాత్మిక వేత్తలు, జ్యోతిష్య పండితులు వివరిస్తున్నారు. చాలామంది అక్షయ తృతీయ అంటే బంగారం కొనుగోలు చేయాలని భావిస్తారు. అయితే, ఇది కేవలం ఒక శాతం మాత్రమేనని, అసలు ప్రాధాన్యత దానధర్మాలు, పూజలకు ఇవ్వాలని సూచనలు చేస్తున్నారు. ఏప్రిల్ 19 ఆదివారం.. అక్షయ తృతీయ.. కావున అక్షయ తృతీయ నాడు చేయదగిన దానాలు, పూజలు.. అక్షయ ఫలితాలు గురించి తెలుసుకోండి..

అక్షయ తృతీయ నిజమైన అర్థం:

“అక్షయం” అంటే ఎప్పటికీ నశించనిది. ఈ రోజు చేసే పుణ్యం కానీ, పాపం కానీ అక్షయమైన ఫలితాన్ని ఇస్తుందని శాస్త్రాలు చెబుతున్నాయి. మానవులు సహజంగా ఐశ్వర్యాన్ని కోరుకుంటారు. కష్టాలను ఆహ్వానించిన కుంతీదేవి వలె కాకుండా, డబ్బు, భవనాలు, కార్లు వంటి భౌతిక సుఖాలు ఉండాలని ఆశిస్తారు. ఈ కోరికలను నెరవేర్చుకోవడానికి, బంగారం కొనుగోలుకు బదులుగా పుణ్యం సంపాదించుకోవడమే సరైన మార్గమని పేర్కొంటున్నారు.

అక్షయ తృతీయ నాడు చేయవలసిన దానాలు:

పండితుల ప్రకారం.. అక్షయ తృతీయ రోజున చేయదగిన ఆరు ముఖ్యమైన దానాలు..

మామిడిపళ్ళ దానం: కనీసం రెండు మామిడిపళ్ళు లేదా అంతకంటే ఎక్కువ మంచి మామిడిపళ్ళు దానం చేయడం ద్వారా కోరిన కోరికలు నెరవేరుతాయి.

జలకుంభ దానం (నీటి కుండ): మట్టి కుండను శుభ్రం చేసి, ముందు రోజు రాత్రంతా నీళ్ళు నింపి, మట్టి వాసన పోయాక, గంధం, కుంకుమ బొట్లు పెట్టి, నీటితో నింపి, మూత పెట్టి బ్రాహ్మణుడికి దానం చేయాలి. దీని వల్ల జీవితాంతం అన్నపానాదులకు లోటు ఉండదు.

విసినికర్ర దానం: విసినికర్రను దానం చేయడం ద్వారా విష్ణు లోక ప్రాప్తి కలుగుతుందని శాస్త్రం చెబుతోంది.

వస్త్ర దానం: వస్త్రాలను దానం చేయడం వల్ల చంద్రలోక ప్రాప్తి కలుగుతుందని పేర్కొంటున్నారు.

బియ్యం దానం: చక్కగా వండుకోవడానికి యోగ్యమైన, సమృద్ధిగా ఉన్న బియ్యాన్ని (ఉదాహరణకు, మూడు కిలోలు లేదా ఐదు కిలోలు, శక్తిని బట్టి) దానం చేయాలి.

బంగారం దానం: శక్తి ఉన్నవారు బంగారాన్ని దానం చేయవచ్చు. బంగారం కొనడం వల్ల అక్షయ ఫలితాలు వస్తాయనే భావన శాస్త్ర సమ్మతం కాదని, దానం చేయడమే శ్రేష్ఠమని స్పష్టం చేస్తున్నారు..

పూజలు, వ్రతాలు, మంత్ర పఠనం:

ఈ దానధర్మాలతో పాటు, అక్షయ తృతీయ రోజున కొన్ని ప్రత్యేక పూజలు, వ్రతాలు ఆచరించడం ద్వారా అపారమైన శుభాలు కలుగుతాయి:

సత్యనారాయణ స్వామి వ్రతం: సత్యనారాయణ వ్రతం చేయడం ద్వారా సమస్త శుభాలు కలుగుతాయి. ప్రతి నెలా చేయలేని వారు, ఈ పవిత్ర దినాన తప్పక చేయాలని సూచిస్తున్నారు.

వేద పారాయణ/ఆశీర్వచనం: వేద పారాయణ చేయడం లేదా వేద స్వస్తి జరిపించుకోవడం ద్వారా అక్షయమైన ఫలితాలు లభిస్తాయి.

విష్ణు సహస్రనామ పారాయణం: దానాలు చేసేటప్పుడు విష్ణు సహస్రనామం పారాయణ చేయడం వల్ల సాక్షాత్తు విష్ణుమూర్తి దానాన్ని స్వీకరిస్తాడని, ఇచ్చేవాడు, పుచ్చుకునేవాడు ఆయనేనని నమ్మకం. వామన రూపంలో విష్ణువు బలిచక్రవర్తి దానాన్ని స్వీకరించడానికి స్వయంగా వచ్చాడని పురాణాలు చెబుతున్నాయి. దానం గ్రహించేవారిని విష్ణు స్వరూపంగా భావించి పూజించాలని వివరిస్తున్నారు.

మహాలక్ష్మి మంత్ర జపం: ఈ రోజున మహాలక్ష్మి అమ్మవారి మంత్రం “ఓం శ్రీం హ్రీం శ్రీం కమలే కమలాలయే ప్రసీద ప్రసీదా శ్రీం హ్రీం శ్రీం శ్రీ మహాలక్ష్మ్యై నమః” ను జపించడం లేదా శ్రవణం చేయడం వల్ల అద్భుతమైన ఫలితాలు లభిస్తాయి.

అక్షయ తృతీయ రోజున దానధర్మాలు చేయడం, సత్యనారాయణ వ్రతం ఆచరించడం, విష్ణు సహస్రనామం, మహాలక్ష్మి మంత్ర పఠనం చేయడం ద్వారా లక్ష్మీ అనుగ్రహం, మహావిష్ణువు అనుగ్రహం లభించి గృహస్థ జీవితంలో కుటుంబ శాంతి, వృద్ధి కలుగుతాయి. ఈ పవిత్ర దినాన భగవదనుగ్రహానికి పాత్రులు కావడానికి ఈ శుభకార్యాలను ఆచరించాలని పండితులు సూచిస్తున్నారు.