చిన్న పెద్ద తేడా లేదు.. కంటెంట్ ఉంటే కలెక్షన్స్ పక్కా
ప్రేక్షకులు థియేటర్లకు రావడం మానేసారు.. ఓటిటికి అలవాటు పడిపోయారు.. ఇండస్ట్రీ పరిస్థితులు బాగోలేవు అంటూ నిర్మాతలు చెప్తున్నారు. కానీ వాళ్లకు అర్థం కాని విషయమేంటంటే కంటెంట్ కరెక్టుగా ఉన్న సినిమాలకు ఇప్పటికీ జనం వస్తున్నారు. అసలు 2025లో ఎన్ని సినిమాలు రెండు వారాలకు మించి ఆడాయి..? అలాంటి కంటెంట్ ఉన్న సినిమాలెన్ని వచ్చాయి..? చూద్దామా ఓసారి ఎక్స్క్లూజివ్గా..
ఆడియన్స్ మునపట్లా థియేటర్లకు రావట్లేదంటూ నిర్మాతలు ఓ మాట అనేస్తున్నారు కానీ ఆడియన్స్ బానే వస్తున్నారు.. కానీ వాళ్లను థియేటర్ వరకు రప్పించే కంటెంట్ ఇవ్వట్లేదు మన మేకర్స్. వాళ్లకు అది ఒప్పుకోడానికి ఇగో అడ్డొస్తుంది.
మహావతార్ నరసింహాలో ఏ స్టార్ ఉన్నాడని 3 వారాలుగా ఆడుతుంది.. ఇప్పటికే ఇండియాలో 200 కోట్లు వసూలు చేసింది ఈ చిత్రం. స్టార్ హీరో లేడు.. ఆ మాటకొస్తే అసలు రెగ్యులర్ సినిమానే కాదు నరసింహా. పూర్తిగా యానిమేషన్ సినిమా.. జూలై 24న చాలా తక్కువ స్క్రీన్స్లో విడుదలై.. 3 వారాల తర్వాత కూడా అదే దూకుడు చూపిస్తుంది ఈ చిత్రం.
దీని కంటే ముందు నాని నిర్మించిన కోర్ట్ రెండు వారాలు ఆడింది.. అది కూడా కంటెంట్ ఉన్న సినిమానే.. పైగా టికెట్ రేట్లలో ఎలాంటి హైక్ లేదు. 2025లో రెండు వారాల తర్వాత కూడా ప్రేక్షకులను థియేటర్లకు రప్పించిన సినిమాలు కనీసం 5 కూడా లేవు.
సంక్రాంతికి వస్తున్నాం ఒకటి మూడు వారాల వరకు కలెక్షన్స్ తీసుకొచ్చింది. అనిల్ రావిపూడి, వెంకటేష్ కలిసి చేసిన ఈ మ్యాజిక్కు కుటుంబ ప్రేక్షకులు బ్రహ్మరథం పట్టారు. ఆ తర్వాత మరే పెద్ద సినిమా ఈ మ్యాజిక్ చేయలేకపోయింది.
తండేల్, హిట్ 3, మ్యాడ్ స్క్వేర్ లాంటి సినిమాలు మంచి విజయం సాధించాయి.. కానీ ఫస్ట్ వీకెండ్లోనే 90 పర్సెంట్ రిటర్న్స్ తీసుకొచ్చి రెండో వారానికి సైలెంట్ అయ్యాయి. ఆ తర్వాత కోర్ట్.. ఇన్నాళ్లకి మహావతార్ నరసింహా 3వ వారంలోనూ ఆడియన్స్ను రప్పించాయి. వీటిలో ఏ సినిమాకు టికెట్ రేట్లు పెంచుకోలేదు.. మరి లోపం ఎక్కడుందంటారు..? ఆడియన్స్లోనా.. మేకర్స్ ఇచ్చే కంటెంట్లోనా..?