‘ఆ బిర్యానీ తింటే శృంగార కోరికలు తగ్గుతాయట’.. షాపులు క్లోజ్ చేయించిన అధికారులు..

పురుష పుంగవులకు ఇది కాస్త కంగారు పెట్టించే వార్తే.. బిర్యానీ తింటే పురుషుల్లో లైంగికశక్తి తగ్గిపోతుందట. అందుకే ఓ మాజీ మంత్రి ఏకంగా బిర్యానీ అమ్మే షాపులను బలవంతంగా మూయించేసారు. పశ్చిమ బెంగాల్ మాజీ మంత్రి, తృణమూల్ కాంగ్రెస్ నాయకుడు రవీంద్ర నాథ్ ఘోష్ బెంగాల్‌ కూచ్ బెహార్‌లోని రెండు స్థానిక బిర్యానీ షాపులను మూసి వేయమని బలవంతం చేశారు.

బిర్యానీలో ఉపయోగించే మసాలాల వల్ల మగవారిలో లైంగిక పటుత్వం తగ్గుతోందని ఆరోపిస్తూ ఈ పని చేయడం స్థానికంగా చర్చనీయాంశమైంది. బిర్యానీ చేయడానికి ఉపయోగించే పదార్థాలు, మసాలాలతో మగవాళ్లలో శృంగారంపై కోరికలు తగ్గినట్టు స్థానిక ప్రజల నుంచి కొన్నాళ్లుగా ఫిర్యాదులు వస్తున్నాయని రవీంద్ర నాథ్ చెప్పారు. వాటివల్ల పురుషుల్లో లైంగిక సామర్థ్యం తగ్గుతోందని ఆరోపిస్తున్నారు’ అని ఆయన తెలిపారు.

బీహార్, ఉత్తరప్రదేశ్ రాష్ట్రాలకు చెందిన వ్యక్తులు ఈ ప్రాంతంలో బిర్యానీ విక్రయిస్తున్నారని, లైసెన్సు లేకుండా దుకాణాలు నిర్వహిస్తున్నారని కూచ్ బెహార్ మున్సిపాలిటీ చైర్మన్ అయిన రవీంద్రనాథ్ తెలిపారు. ఫిర్యాదుల అనంతరం ఇక్కడికి వచ్చి చూడగా షాపులకు ట్రేడ్ లైసెన్స్ లేదని, అందుకే దుకాణాలు మూసేశామని వెల్లడించారు.