‘వాళ్ళ ఆలోచనలను ప్రక్షాళన చేయాల్సిందే’, దిశారవి ఉదంతంపై హర్యానా హోం మంత్రి అనిల్ విజ్ ట్వీట్

టూల్ కిట్ డాక్యుమెంట్ విషయంలో క్లైమేట్ ఛేంజ్ యాక్టివిస్ట్ దిశారవి చేసిన ట్వీట్ల తాలూకు సెగ ఇంకా ఆరలేదు. దేశద్రోహం, కుట్ర కింద దిశారవిని ఢిల్లీ పోలీసులు అరెస్టు చేశారు.

Umakanth Rao | Edited By: Anil kumar poka

Updated on: Feb 16, 2021 | 5:44 PM

టూల్ కిట్ డాక్యుమెంట్ విషయంలో క్లైమేట్ ఛేంజ్ యాక్టివిస్ట్ దిశారవి చేసిన ట్వీట్ల తాలూకు సెగ ఇంకా ఆరలేదు. దేశద్రోహం, కుట్ర కింద దిశారవిని ఢిల్లీ పోలీసులు అరెస్టు చేశారు. ఈ ఉదంతంపై స్పందించిన హర్యానా హోం మంత్రి అనిల్ విజ్.. దేశ వ్యతిరేక ఆలోచనలు (బీజాలు) గల వారినందరినీ నాశనం చేయాలని ట్వీట్ చేశారు. ఈ వివాదాస్పద వ్యాఖ్యపై నిరసనలు పెల్లుబికాయి. ఒక వ్యక్తి చేసిన ఫిర్యాదు మేరకు జర్మనీలో ట్విటర్ కొద్దిసేపు ఈ ట్వీట్ ను తొలగించింది. అయితే దీనిపై ఇన్వెస్టిగేట్ చేశామని, తొలగించటానికి ఇది తగినది కాదని భావించామని అంటూ దీన్ని మళ్ళీ పునరుధ్ధరించింది. అటు-తన వివాదాస్పద కామెంట్ పై వివరణ ఇచ్చిన అనిల్ విజ్.. జాతి వ్యతిరేక ఆలోచనలు గలవారిని నాశనం చేయాలన్న తన ట్వీట్ ఉద్దేశం నిజానికి అది కాదని, అలాంటి వారి మెదళ్లను ప్రక్షాళన చేయాలన్నదేనని అన్నారు. ఈ విధమైన ఆలోచనలను శుద్ది చేయాలని తాను కోరుతున్నానన్నారు. వీళ్ళు (దిశారవి వంటివారు) ఇంగ్లీషు స్కూళ్లలో చదువుకున్నవారని, వీరికి హిందీ భాష రాదని చెప్పారు. అసలు నా ట్వీట్ లో ఏముంది అని ఆయన నవ్వేశారు.

‘నా ట్వీట్ ను మళ్ళీ ట్విటర్ పోస్ట్ చేసిందిగా..ఇందులో తప్పేముందని అని స్పష్టం చేసిందిగా ‘అన్నారు. ఇలా ఉండగా దిశారవి అరెస్టు పెద్ద దుమారాన్నే సృష్టించింది. తన కేసుపై వాదించిన ఆమె.. తనేమీ టూల్ కిట్ ను రూపొందించలేదని, నిరసన చేస్తున్న రైతులకు మద్దతు ఇవ్వాలని తాము కోరుతున్నామని వెల్లడించింది. ఈ నెల 3 నే రెండు లైన్లను ఎడిట్ చేసినట్టు పేర్కొంది. ఈమెకు 5 రోజులపాటు పోలీసు కస్టడీకి రిమాండ్ చేశారు. ఈ కేసులో లాయర్ అయిన నిఖితా జాకబ్, యాక్టివిస్ట్ శంతను ములుక్ పేర్లను కూడా పోలీసులు తమ ఎఫ్ ఐ ఆర్ లో చేర్చారు.