అయ్యో.. ఒకే కుటుంబంలో ఐదుగురి మృతి.. నూడుల్స్ తిన్నందుకే చనిపోయారా?

గ్రేటర్ నోయిడా: ఉత్తరప్రదేశ్‌లోని గ్రేటర్ నోయిడా పరిధిలో ఉన్న నాగ్లా శ్రీగోపాల్ గ్రామంలో ఒకే కుటుంబానికి చెందిన ఐదుగురు అనుమానాస్పదంగా మృతి చెందడం తీవ్ర కలకలం రేపుతోంది. మృతుల్లో మహేష్ (38), అతని భార్య లలితతో పాటు వారి ముగ్గురు చిన్నారులు ఉన్నారు. తొలుత టీ, నూడుల్స్ తినడం వల్ల ఫుడ్ పాయిజనింగ్ జరిగి మరణించి ఉండవచ్చని అనుమానించారు. అయితే, ఆహార భద్రతా అధికారుల ప్రాథమిక పరిశీలనలో విషాహారానికి సంబంధించిన స్పష్టమైన ఆనవాళ్లు కనిపించకపోవడంతో ఈ కేసు మరింత మిస్టరీగా మారింది.

ఫుడ్ పాయిజనింగ్ కాదా? అధికారుల కీలక వ్యాఖ్యలు

రబుపురా పోలీస్ స్టేషన్ పరిధిలో జరిగిన ఈ ఘటనపై ఆహార భద్రతా శాఖ అధికారులు విచారణ చేపట్టారు. ఆహార భద్రతా అధికారి ఓపీ సింగ్ మాట్లాడుతూ, సాధారణంగా ఫుడ్ పాయిజనింగ్ జరిగినప్పుడు వాంతులు, విరేచనాలు, కడుపునొప్పి వంటి లక్షణాలు కనిపిస్తాయని తెలిపారు. ఈ కేసులో అలాంటి లక్షణాలకు సంబంధించిన ఆధారాలు స్పష్టంగా లేవని పేర్కొన్నారు. అయితే, దీనిని బట్టి ఆహార విషబాధను పూర్తిగా తోసిపుచ్చలేమని, మరణాలకు అసలు కారణం ఏమిటనేది పోస్ట్‌మార్టం, అంతర్గత అవయవాల రసాయన పరీక్షల నివేదికలు వచ్చిన తర్వాతే వెల్లడవుతుందని ఆయన తెలిపారు.

6 ఎకరాల భూమి.. కుటుంబ కలహాలే కారణమా?

ఈ కేసులో తాజాగా ఆస్తి వివాదం కోణం తెరపైకి వచ్చింది. మృతురాలు లలిత తల్లిదండ్రులు చేసిన ఆరోపణల ప్రకారం, సుమారు 6 ఎకరాల 10 గుంటల భూమి, ఇంటి యాజమాన్యం విషయంలో లలితకు అత్త, ఆడపడుచుతో విభేదాలు ఉన్నట్లు తెలుస్తోంది. ఈ వివాదమే ఐదుగురి మరణాలకు కారణమై ఉండవచ్చని కుటుంబసభ్యులు అనుమానం వ్యక్తం చేస్తున్నారు. అయితే, ఈ ఆరోపణలు ఇంకా నిర్ధారణ కాలేదు. ఆస్తి వివాదానికి, మరణాలకు మధ్య సంబంధం ఉందా అనే అంశాన్ని పోలీసులు పరిశీలిస్తున్నారు. ఎవరినీ నిందితులుగా నిర్ధారించడానికి ఇప్పటివరకు తగిన ఆధారాలు వెల్లడికాలేదు.

పోస్టుమార్టం నివేదికపైనే అందరి దృష్టి

ఐదుగురి మృతదేహాలకు పోస్టుమార్టం నిర్వహించడంతో పాటు అంతర్గత అవయవాలను రసాయన పరీక్షల కోసం పంపిస్తున్నట్లు గ్రేటర్ నోయిడా డీసీపీ శ్రవణ్ కుమార్ తెలిపారు. ఫోరెన్సిక్ బృందాలు సంఘటనా స్థలంలో ఆధారాలను సేకరించాయి. విషప్రయోగం జరిగిందా? మరణాలకు ఆహారం కారణమా? లేక కుటుంబ, ఆస్తి వివాదానికి సంబంధించి మరేదైనా అంశం ఉందా? అనే కోణాల్లో దర్యాప్తు కొనసాగుతోందన్నారు. ఐదుగురి మరణాలకు అసలు కారణం ఏమిటన్నది ప్రస్తుతం మిస్టరీగానే ఉంది. పోస్టుమార్టం, ఫోరెన్సిక్ నివేదికలు వచ్చిన తర్వాతే ఈ కేసులో కీలక విషయాలు వెలుగులోకి వచ్చే అవకాశం ఉంది.

మరిన్ని క్రైమ్ వార్తల కోసం ఇక్కడ క్లిక్ చేయండి..