అప్పుడిలా.. ఇప్పుడిలా.. ఎన్నికలకు ముందు తమిళనాడు డిప్యూటీ సీఎం ఉదయనిధి స్టాలిన్‌కు షాక్..!

తమిళనాడు అసెంబ్లీ ఎన్నికలు మరో వారం రోజుల్లో జరగనున్నాయి.. ప్రధాన పార్టీలు డీఎంకే-కాంగ్రెస్, ఏఐడీఎంకే-బీజేపీ కూటమి సహా.. పలు పార్టీల నేతలు ప్రచారంలో దూసుకెళ్తున్నారు.. ఈ క్రమంలో తమిళనాడు డిప్యూటీ సీఎం ఉదయనిధి స్టాలిన్‌కు షాక్ తగిలింది. ఎన్నికల సమీపిస్తున్న వేళ గత ఎన్నికల్లో ఇచ్చిన అఫిడవిట్‌లో ఆస్తులను దాచిపెట్టారనన్న ఆరోపణలతో మద్రాస్ హైకోర్టులో పిటిషన్ దాఖలు అయింది. 2021లో తమిళనాడు ఉప ముఖ్యమంత్రి ఉదయనిధి స్టాలిన్ నామినేషన్ పత్రాలతో పాటు సమర్పించిన అఫిడవిట్లలో సమర్పించిన వివరాలు, రాబోయే అసెంబ్లీ ఎన్నికల కోసం సమర్పించిన అఫిడవిట్‌లో చూపిన ఆస్తులలోని వ్యత్యాసాలపై విచారణ జరపాలని భారత ఎన్నికల సంఘం (ఈసీఐ), చెపాక్-ట్రిప్లికేన్ అసెంబ్లీ నియోజకవర్గం రిటర్నింగ్ అధికారి, ఆదాయపు పన్ను (విచారణలు) డైరెక్టర్ జనరల్, కేంద్ర కార్పొరేట్ వ్యవహారాల మంత్రిత్వ శాఖలను ఆదేశించాలని ఈ పిటిషన్‌లో కోరారు. ట్రిప్లికేన్‌కు చెందిన ఆర్. కుమరవేల్ తన పిటిషన్‌లో పలు వివరాలను పొందుపరిచారు.

ఉదయనిధి 2021 అభ్యర్థి అఫిడవిట్‌లో రెడ్ జెయింట్ మూవీస్ ప్రైవేట్ లిమిటెడ్‌లో రూ. 7.36 కోట్ల పెట్టుబడిని చూపించారని పేర్కొన్నారు. అయితే, 2026 అఫిడవిట్‌లో ఈ విషయాన్ని చూపించలేదని, అందులో కేవలం ఆయన భార్యకు ఆ ఫిల్మ్ ప్రొడక్షన్ కంపెనీలో రూ. 2.63 కోట్ల పెట్టుబడులు ఉన్నాయని మాత్రమే పేర్కొన్నారని ఆయన తెలిపారు.

ఉదయనిధి స్టాలిన్ 2021 అభ్యర్థిగా రెడ్ జెయింట్ మూవీస్ ప్రైవేట్ లిమిటెడ్ రూ 7.36 కోట్లు పెట్టుబడిగా చూపించారని, అయితే తాజాగా 2026 అఫిడవిట్లో ఈ విషయాన్ని చూపించలేదన్నారు. కేవలం ఆయన భార్యకు ఆ ఫిలిం ప్రొడక్షన్ కంపెనీలో 2.63 కోట్లు పెట్టుబడి మాత్రమే ఉందని పేర్కొన్నారు. దీనికి సంబంధించి ఎలాంటి వివరణ గాని మద్దతుగా లేదని పిటిషనర్ పేర్కొన్నారు. ఒక్కసారిగా కోట్లు అదృశ్యం కావడం.. పాక్షికంగా తిరిగి ప్రత్యక్షం కావడం అనేది ఆస్తులు అణిచివేయడానికి ఒక నిలువెత్తు ఉదాహరణ అని పిటిషన్ లో పేర్కొన్నారు. ఇది వాస్తవ యాజమాన్యం నిధులు మళ్లింపు కీలక వివరాలు దాచిపెట్టడం వంటి అంశాలపై కూడా తీవ్రమైన ప్రశ్నలను లేవనెత్తుతుందని ఆయన ఆరోపించారు. అలాగే 2021 – 26 లో చూపిన లెక్కలను పోల్చి చూసినప్పుడు ఉదయనిధి స్టాలిన్.. స్నో హౌసింగ్ ప్రైవేట్ లిమిటెడ్ కు ఇచ్చిన అప్పు కోటి తగ్గించి చూపించారన్నారు. 2021 ప్రకారం కంపెనీకి ఇచ్చిన రుణం 11.0 కోట్లు కాగా 2026 లో అప్పుడు వీటిలో అది పది కోట్లుగా ఉందన్నారు.

ఎన్నికల తేదీకి ముందు అటువంటి వ్యత్యాసాలను కనీసం ప్రాథమిక పరిశీలనకు గురిచేయకపోతే, ఓటర్లు అసంపూర్ణమైన, తప్పుదారి పట్టించే లేదా వక్రీకరించిన సమాచారం ఆధారంగా తమ ఓటు హక్కును వినియోగించుకోవలసి వస్తుంది.. తద్వారా ప్రజాస్వామ్య ప్రక్రియకు పూడ్చలేని నష్టం వాటిల్లుతుందని పిటిషనర్ అన్నారు. అందువల్ల, ఉదయనిధి ఆర్థిక వెల్లడింపులు, ఆదాయ వనరులు, లావాదేవీలు, చట్టబద్ధమైన ఫైలింగ్‌లపై, అలాగే రెడ్ జెయింట్ మూవీస్ ప్రైవేట్ లిమిటెడ్, స్నో హౌసింగ్ ప్రైవేట్ లిమిటెడ్, రాజ్ ప్రమోటర్స్ ప్రైవేట్ లిమిటెడ్‌లతో ఆయనకున్న లావాదేవీలతో సహా, సమగ్రమైన, స్వతంత్రమైన, కాలపరిమితితో కూడిన విచారణ జరపాలని ఆదాయపు పన్ను (విచారణలు) డైరెక్టర్ జనరల్‌కు, కేంద్ర కార్పొరేట్ వ్యవహారాల మంత్రిత్వ శాఖకు ఆదేశాలు జారీ చేయాలని ఆయన కోర్టును కోరారు.

ఏప్రిల్ 20 లోగా నివేదికను దాఖలు చేయండి..

ఎన్నికల అఫిడవిట్లలో చేసిన వెల్లడింపుల, ఖచ్చితత్వాన్ని ధృవీకరించాలని పిటిషనర్ పేర్కొన్నారు. పోలింగ్ తేదీ అయిన ఏప్రిల్ 23 లోపు ఉదయనిధి ఆస్తుల స్థితిపై మధ్యంతర నివేదికను కోర్టులో దాఖలు చేయాలని కూడా ఆయన కోరారు. ప్రధాన న్యాయమూర్తి సుశ్రుత్ అరవింద్ ధర్మాధికారి నేతృత్వంలోని మొదటి ధర్మాసనం ముందు ఈ పిటిషన్ బుధవారం విచారణకు వచ్చింది. విచారించిన మద్రాస్ హైకోర్టు బుధవారం (ఏప్రిల్ 15, 2025) ఆదాయపు పన్ను డైరెక్టర్ జనరల్ (విచారణ) నుండి నివేదికను కోరింది. పోలింగ్ రోజుకు ముందే ప్రతి అభ్యర్థి ఆస్తుల గురించి ఓటర్లకు తప్పనిసరిగా తెలియాలని పిటిషనర్ పట్టుబట్టినందున, ప్రధాన న్యాయమూర్తి సుశ్రుత్ అరవింద్ ధర్మాధికారి మరియు జస్టిస్ జి. అరుల్ మురుగన్‌లతో కూడిన మొదటి డివిజన్ బెంచ్, ఆదాయపు పన్ను శాఖ సీనియర్ స్టాండింగ్ కౌన్సిల్ ఎపి శ్రీనివాస్ సహాయంతో అదనపు సొలిసిటర్ జనరల్ ఎఆర్.ఎల్. సుందరేశన్‌ను సోమవారం (ఏప్రిల్ 20) లోగా నివేదికను దాఖలు చేసేలా చూడమని ఆదేశించింది.