Ram Nath Kovind: ఆదివారంతో ముగియనున్న రాంనాథ్‌ కోవింద్ పదవీ కాలం.. జాతినుద్దేశించి ప్రసంగం
Ram Nath Kovind: భారత రాష్ట్రపతిగా రామ్ నాథ్ కోవింద్ పదవీకాలం జూలై 24తో ముగియనుంది. ఆదివారం రాష్ట్రపతి రామ్‌నాథ్ కోవింద్ జాతిని ఉద్దేశించి ప్రసంగించనున్నారు.
Subhash Goud | Edited By: Ganesh Mudavath
Updated on: Jul 24, 2022 | 7:53 AM
Ram Nath Kovind: భారత రాష్ట్రపతిగా రామ్ నాథ్ కోవింద్ పదవీకాలం జూలై 24తో ముగియనుంది. ఆదివారం రాష్ట్రపతి రామ్‌నాథ్ కోవింద్ జాతిని ఉద్దేశించి ప్రసంగించనున్నారు. జూలై 25న దేశ కొత్త రాష్ట్రపతి ప్రమాణ స్వీకారోత్సవం జరగనుంది. ఈ రోజు రాష్ట్రపతి రామ్‌నాథ్ కోవింద్‌కు పార్లమెంటు వీడ్కోలు పలికింది. పదవీ విరమణ చేసిన రాష్ట్రపతి కోసం ఉభయ సభలు సంయుక్తంగా ఈ కార్యక్రమాన్ని నిర్వహించారు. రాష్ట్రపతి రామ్‌నాథ్ కోవింద్ తన వీడ్కోలు ప్రసంగంలో జాతీయ ప్రయోజనాల దృష్ట్యా రాజకీయ పార్టీలు పక్షపాత రాజకీయాలకు అతీతంగా ఎదగాలని, ప్రజల సంక్షేమానికి ఏది అవసరమో నిర్ణయించుకోవాలని పిలుపునిచ్చారు. పార్లమెంటును ప్రజాస్వామ్య దేవాలయంగా అభివర్ణించారు. సభలో చర్చల సమయంలో గాంధీ తత్వాన్ని ఉపయోగించాలని పార్టీలను కోరారు.
కోవింద్‌కు వీడ్కోలు పలికేందుకు పార్లమెంట్ సెంట్రల్ హాల్‌లో ఏర్పాటు చేసిన వేడుకలకు ఉపరాష్ట్రపతి వెంకయ్యనాయుడు, ప్రధాని నరేంద్ర మోదీ, లోక్‌సభ స్పీకర్ ఓం బిర్లా సహా పలువురు ఎంపీలు హాజరయ్యారు. కొత్తగా ఎన్నికైన రాష్ట్రపతి ద్రౌపది ముర్ముని హృదయపూర్వకంగా అభినందిస్తున్నాను.. అని కోవింద్ అన్నారు. కొత్త అధ్యక్షురాలు ద్రౌపది ముర్ము సోమవారం భారత 15వ రాష్ట్రపతిగా ప్రమాణ స్వీకారం చేయనున్నారు.
రామ్ నాథ్ కోవింద్ 2017లో రాష్ట్రపతిగా ప్రమాణ స్వీకారం
రామ్ నాథ్ కోవింద్ 2017లో భారతదేశ 14వ రాష్ట్రపతిగా ప్రమాణ స్వీకారం చేశారు. కేఆర్ నారాయణన్ తర్వాత రాష్ట్రపతిగా పనిచేసిన దళిత సామాజికవర్గం నుంచి రెండో వ్యక్తి. రాష్ట్రపతి కాకముందు 2015 నుంచి 2017 వరకు బీహార్ గవర్నర్‌గా పనిచేశారు. దీంతో పాటు రాజ్యసభ సభ్యుడిగా కూడా ఉన్నారు. రాజకీయాల్లోకి రాకముందు 16 ఏళ్ల పాటు న్యాయవాదిగా పనిచేశారు. ఢిల్లీ హైకోర్టు, సుప్రీంకోర్టులో ప్రాక్టీస్ చేశారు.
మరిన్ని జాతీయ వార్తల కోసం ఇక్కడ క్లిక్ చేయండి
