Video: అద్భుతం అంటే ఇదేనేమో.. దేవుడి సాక్షిగా గుండెల్ని హత్తుకునే ఘటన.. వీడియో వైరల్..

కొన్నిసార్లు వాస్తవాలు సినిమాలకంటే అద్భుతంగా ఉంటాయి. నమ్మకం, చెక్కుచెదరని ప్రేమే ఉంటే విధి కూడా తలవంచక తప్పదని నిరూపించే సంఘటన పవిత్ర వైష్ణో దేవి ఆలయ ప్రాంగణంలో చోటుచేసుకుంది. ఐదు సంవత్సరాల క్రితం తప్పిపోయిన తన కొడుకును ఒక తల్లి, సోదరి మళ్లీ కలుసుకున్న దృశ్యం ఇప్పుడు ఇంటర్నెట్‌ను కదిలిస్తోంది. వైరల్ అవుతున్న ఆ వీడియోలో.. ఐదేళ్ల తర్వాత తన కళ్లముందే ఉన్న కొడుకును చూడగానే ఆ తల్లి ఒక్కసారిగా కుప్పకూలిపోయింది. ఆమె నోట మాట రాలేదు.. కేవలం కన్నీళ్లు మాత్రమే వచ్చాయి. సోదరి తన తమ్ముడిని గట్టిగా కౌగిలించుకుని బావురుమంటూ ఏడుస్తుంటే, అక్కడ ఉన్న భక్తులందరూ ఆ అద్భుతాన్ని చూసి కన్నీరు పెట్టుకున్నారు. సంవత్సరాల తరబడి గుండెల్లో దాచుకున్న దుఃఖం, నిరాశ ఆ ఒక్క క్షణంలో ఆనందభాష్పాలుగా మారిపోయాయి.

విధి ఆడిన వింత నాటకం

ఈ కొడుకు ఎలా అదృశ్యమయ్యాడనే వివరాలు పూర్తిగా తెలియనప్పటికీ.. ఆ కుటుంబం మాత్రం ఆశ వదులుకోలేదు. ఐదు సంవత్సరాలుగా ప్రతి రోజు, ప్రతి నిమిషం అతని కోసం వెతుకుతూనే ఉన్నారు. ఎక్కడ ఉన్నాడో, ఏమయ్యాడో తెలియని అనిశ్చితిలో కూడా ఆ తల్లి మనసు నా కొడుకు వస్తాడు అని నమ్ముతూనే ఉంది. చివరకు ఆ తల్లి, సోదరి వైష్ణో దేవి దర్శనం కోసం వెళ్లినప్పుడు ఆ అద్భుతం జరిగింది. కోట్లాది మంది భక్తులు సందర్శించే ఆ పవిత్ర క్షేత్రంలో అనుకోకుండా తన సోదరుడిని ఆ సోదరి గుర్తించింది. ఇది కేవలం యాదృచ్చికం కాదు.. ఆ తల్లి ప్రార్థనల ఫలమని నెటిజన్లు అభివర్ణిస్తున్నారు.

నెటిజన్ల రియాక్షన్

ఈ వీడియో సోషల్ మీడియాలో షేర్ చేసిన కొద్దిసేపటికే లక్షలాది వ్యూస్ సాధించింది. ఇది అరుదైన క్షణం అని ఒక నెటిజన్ కామెంట్ చేయగా.. తల్లి ప్రేమ ముందు విధి కూడా ఓడిపోయింది అని మరికొందరు రాసుకొచ్చారు. భక్తికి, అనుబంధానికి ఈ సంఘటన ఒక నిలువెత్తు సాక్ష్యమని నెటిజన్లు భావోద్వేగానికి లోనవుతున్నారు. జీవితం ఒక్కోసారి చాలా కఠినంగా మారుతుంది. కానీ ఈ కథ మనకు ఒకే ఒక్క విషయాన్ని గుర్తు చేస్తోంది.. అదే నమ్మకం. ఎన్నడూ ఆశ వదులుకోని ఒక తల్లి, విశ్వాసాన్ని కోల్పోని ఒక సోదరి కలిసి అసాధ్యాన్ని సుసాధ్యం చేశారు.

Sister Found Her Brother After 5 Years In The Court Of Vaishno Mata Ji 🥹❤️ pic.twitter.com/kVGKYylYlx

— SURAJ (@SURAJ_624) April 13, 2026