వామ్మో.. ఏంది ఈ ఘోరం.. లవర్ గొంతు కోసిన మైనర్ బాలిక.. ఆ తర్వాత ట్విస్ట్ ఇదే..!

ఛత్తీస్‌గఢ్‌లోని రాయ్‌పూర్‌ను కుదిపేసిన దిగ్భ్రాంతికరమైన సంఘటన వెలుగులోకి వచ్చింది. 16 ఏళ్ల మైనర్ బాలిక తన ప్రేమికుడిని అత్యంత పాశవికంగా హతమార్చింది. ఈ హత్య పోలీసులను కూడా షాక్‌కు గురిచేసింది. హత్యకు కారణం ప్రేమ కాదు, ఒత్తిడి అని తేలింది. లాడ్జ్ గదిలో నిద్రిస్తున్న తన ప్రియుడిని గొంతు కోసి చంపింది ఆ ఆమ్మాయి. హత్య తర్వాత, ఆమె గదిని బయటి నుండి లాక్ చేసి నిశ్శబ్దంగా బిలాస్‌పూర్‌కు పారిపోయింది. కానీ చివరికి, ఆమె తన తల్లి ముందు తన నేరాన్ని అంగీకరించాల్సి వచ్చింది. పోలీసుల దర్యాప్తులో ఒక షాకింగ్ కారణం బయటపడింది.

పోలీసుల సమాచారం ప్రకారం, ఈ సంఘటన రాయ్‌పూర్‌లోని గంజ్ పోలీస్ స్టేషన్ ప్రాంతంలోని అవాన్ లాడ్జ్‌లో జరిగింది. మృతుడిని మొహమ్మద్ సద్దాంగా గుర్తించారు అతను బీహార్‌కు చెందిన సద్దాం అభన్‌పూర్‌లో MS ఇంజనీరింగ్ అధికారిగా పనిచేస్తున్నాడు. శనివారం (సెప్టెంబర్ 27), మైనర్ బాలిక, తన ప్రియుడు మొహమ్మద్ సద్దాంను కలవడానికి బిలాస్‌పూర్ నుండి వచ్చింది. ఇద్దరు కలిసి రామన్ మందిర్ వార్డ్‌లోని సత్కర్ గాలిలోని అవాన్ లాడ్జ్‌కి వెళ్లారు. మూడు నెలల గర్భవతి అయిన తనను పెళ్లి చేసుకోవాలని బాలిక సద్దాంను కోరింది. అయితే అందుకు అంగీకరించని సద్దాం, బాలికను గర్భస్రావం చేయించుకోవాలని ఒత్తిడి చేశాడు. ఈ విషయంపై ఇద్దరి మధ్య వివాదం రాజుకుంది. లాడ్జ్ వెలుపల జరిగిన గొడవలో అతను ఆమెను కత్తితో బెదిరించాడని పోలీసులు తెలిపారు. ఆ క్షణంలోనే ఏం చేయాలో ఆ అమ్మాయి నిర్ణయించుకుంది. సద్దాం నిద్రలోకి జారుకున్న వెంటనే, ఆమె అదే కత్తిని తీసుకుని అతని గొంతు కోసిందని పోలీసులు తెలిపారు. హత్య తర్వాత, ఆమె బాధితుడి మొబైల్ ఫోన్‌తో పారిపోయింది. ఆధారాలను నాశనం చేయడానికి తాళాలను రైల్వే పట్టాలపై విసిరేసింది.

ఆ బాలిక బిలాస్‌పూర్ చేరుకుని తన తల్లికి జరిగినదంతా చెప్పింది. ఆమె తల్లి వెంటనే పోలీసులకు సమాచారం ఇచ్చింది. ఆమెను పోలీస్ స్టేషన్‌కు తీసుకెళ్లి జరిగిన సంఘటన గురించి వారికి తెలియజేసింది. ఆమె తల్లి నిర్ణయం ఈ హత్య మిస్టరీని ఛేదించింది. రాయ్‌పూర్ పోలీసులు వెంటనే లాడ్జికి చేరుకుని, మృతదేహాన్ని స్వాధీనం చేసుకుని, మైనర్‌ను అదుపులోకి తీసుకున్నారు. పోలీసులు ఇప్పుడు మొహమ్మద్ సద్దాం కుటుంబం కోసం వెతుకుతున్నారు. ఈ ఘటనకు సంబంధించి పూర్తి స్థాయి దర్యాప్తు జరుగుతోందని పోలీసులు తెలిపారు.

మరిన్ని క్రైమ్ వార్తల కోసం ఇక్కడ క్లిక్ చేయండి..