ఉల్లిపాయలు కోసేటప్పుడు ఏడవకుండా ఉండాలంటే ఇలా చేయండి..!

ఉల్లిపాయ వంటగదిలో అత్యంత ముఖ్యమైన కూరగాయలలో ఒకటి. దాదాపు ప్రతి ఇంట్లో రోజువారీ వంటల్లో దీనిని ఉపయోగిస్తారు. అయితే ఉల్లిపాయ కోయడం ప్రారంభించిన కొద్ది సేపటికే కళ్లలో మంట, నీళ్లు రావడం చాలా మందికి ఎదురయ్యే సాధారణ సమస్య. దీనికి కారణం ఏమిటి? దీన్ని ఎలా నివారించాలి? అనే విషయాలను నిపుణులు వివరించారు. నిజానికి.. ఉల్లిపాయను కోసినప్పుడు దానిలోని కణాలు దెబ్బతిని సిన్-ప్రొపనేథియల్-ఎస్-ఆక్సైడ్ (Syn-Propanethial-S-Oxide) అనే వాయువు విడుదల అవుతుంది. ఈ వాయువు కంటిలోని తేమతో కలిసి స్వల్ప ఆమ్లాన్ని ఏర్పరుస్తుంది. దాన్ని కంటి సహజ రక్షణ వ్యవస్థ ప్రమాదకర పదార్థంగా గుర్తించి బయటకు పంపేందుకు అధికంగా కన్నీళ్లను ఉత్పత్తి చేస్తుంది. అందుకే ఉల్లిపాయలు కోసేటప్పుడు కళ్లలో నీళ్లు వస్తాయి. ఉల్లిపాయలు కోసేటప్పుడు వచ్చే మంట, కన్నీళ్లను తగ్గించేందుకు కొన్ని సులభమైన పద్ధతులు ఉన్నాయి. అవేంటంటే..

కన్నీళ్లను తగ్గించే సులభమైన చిట్కాలు

• ఉల్లిపాయను కోయడానికి ముందు 15 నుంచి 20 నిమిషాల పాటు ఫ్రిజ్‌లో ఉంచాలి.
• ఎల్లప్పుడూ పదునైన కత్తినే ఉపయోగించాలి.
• వంటగదిలో ఎగ్జాస్ట్ ఫ్యాన్ లేదా చిమ్నీని ఆన్ చేసి ఉంచాలి.
• ఉల్లిపాయ వేరు భాగాన్ని చివర్లో కోయాలి.
• అవసరమైతే రక్షణ కళ్లద్దాలు ఉపయోగించవచ్చు.
• కాంటాక్ట్ లెన్స్‌లు ధరించిన వారికి ఈ వాయువు ప్రభావం కొంత తక్కువగా ఉండే అవకాశం ఉంది.

ఈ తప్పులు అస్సలు చేయొద్దు

ఉల్లిపాయలు కోసేటప్పుడు చేతులతో కళ్లను రుద్దుకోవడం సమస్యను మరింత పెంచుతుంది. చేతులకు ఉల్లిపాయ రసం అంటుకుని ఉంటే, కళ్లను తాకే ముందు తప్పనిసరిగా చేతులను శుభ్రంగా కడుక్కోవాలి. ఒకవేళ కంటిలో మంట గంటల తరబడి కొనసాగినా, తీవ్రమైన నొప్పి, కళ్ల ఎర్రబారడం లేదా చూపు మసకబారడం వంటి లక్షణాలు కనిపించినా వెంటనే నేత్ర వైద్యుడిని సంప్రదించడం మంచిది. ఉల్లిపాయల్లో విటమిన్ సి, యాంటీఆక్సిడెంట్లు, ఫ్లేవనాయిడ్లు సమృద్ధిగా ఉంటాయి. ఇవి రోగనిరోధక శక్తిని పెంచడంలో, గుండె ఆరోగ్యాన్ని కాపాడడంలో సహాయపడతాయి. కాబట్టి ఉల్లిపాయలు కోసేటప్పుడు కన్నీళ్లు వస్తాయనే కారణంతో వాటిని ఆహారంలో నుంచి దూరం పెట్టాల్సిన అవసరం లేదు. సరైన పద్ధతులు పాటిస్తే ఈ సమస్యను సులభంగా నియంత్రించవచ్చు.