Head Bath: రోజూ తలస్నానం చేస్తే ఏం జరుగుతుంది? తెలిస్తే ఆ పొరపాటు మళ్లీ చేయరు!

జుట్టును శుభ్రంగా ఉంచుకోవాలనుకోవడం సహజమే. అందుకే చాలామంది ప్రతిరోజూ లేదా రోజు విడిచి రోజు షాంపూతో తల స్నానం చేస్తూ ఉంటారు. అయితే, తరచూ తలస్నానం చేయడం అనేది మంచి అలవాటు కాదని, ఇది జుట్టు, తల చర్మానికి) హాని చేస్తుందని నిపుణులు హెచ్చరిస్తున్నారు. జుట్టును రోజూ తడపడం వల్ల కలిగే నష్టాలేంటి? అసలు ఎన్నిరోజులకు ఒకసారి తలస్నానం చేయాలి?

తరచుగా తలస్నానం చేయడం వల్ల పలు సమస్యలు కలుగుతాయని నిపుణులు హెచ్చరిస్తున్నారు. పదేపదే జుట్టుని తడపడం వల్ల కలిగే సమస్యలేంటో తెలుసుకుందాం..

సహజ నూనెలు కోల్పోవడం

మన తల చర్మం సహజంగానే సీబమ్ అనే నూనెను ఉత్పత్తి చేస్తుంది. ఈ నూనె జుట్టును మాయిశ్చరైజ్ చేసి, రక్షిస్తుంది, సహజమైన మెరుపును ఇస్తుంది. ప్రతిరోజూ లేదా తరచుగా షాంపూతో కడగడం వల్ల ఈ సీబమ్ నూనె పూర్తిగా తొలగిపోతుంది. ఫలితంగా జుట్టు పొడిబారుతుంది, నిర్జీవంగా కనిపిస్తుంది, సులభంగా చిట్లిపోతుంది.

నూనె ఉత్పత్తి పెరగడం

తల చర్మం నుంచి సహజ నూనెలు తొలగిపోయినప్పుడు, చర్మం దాన్ని ఒక ప్రమాద సంకేతంగా తీసుకుంటుంది. కోల్పోయిన నూనెలను భర్తీ చేయడానికి, సెబేషియస్ గ్రంథులు మరింత ఎక్కువగా నూనెను ఉత్పత్తి చేస్తాయి. ఫలితంగా జుట్టు మరింత త్వరగా జిడ్డుగా మారుతుంది. దీనివల్ల మళ్లీ తలస్నానం చేయాల్సిన అవసరం పెరుగుతుంది, ఇది ఒక విష వలయంలా మారుతుంది.

దురద, చుండ్రు

అతిగా షాంపూ చేయడం వల్ల తల చర్మం సహజ పిహెచ్ (pH) స్థాయి దెబ్బతింటుంది. ఇది చర్మాన్ని పొడిగా, సున్నితంగా మారుస్తుంది, దురద, చుండ్రు వంటి సమస్యలకు దారితీస్తుంది. కొన్నిసార్లు, తల చర్మం వాపు కూడా రావచ్చు. జుట్టుకు రంగు వేసుకున్నట్లయితే, తరచుగా కడగడం వల్ల రంగు త్వరగా తగ్గిపోతుంది. షాంపూలోని రసాయనాలు రంగు అణువులను వేగంగా తొలగిస్తాయి.

నిపుణుల సలహా ప్రకారం, జుట్టు ఆరోగ్యంగా ఉండాలంటే వారానికి రెండు లేదా మూడు సార్లు తలస్నానం చేస్తే సరిపోతుంది. జిడ్డు ఎక్కువగా ఉన్నవారు రోజు విడిచి రోజు చేయవచ్చు. షాంపూ చేసే ముందు తల చర్మానికి మాత్రమే షాంపూ చేసి, జుట్టుకు కండిషనర్ ఉపయోగించడం వల్ల నూనెలు కోల్పోకుండా, మాయిశ్చర్ నిలిచి ఉంటుంది.