Steel Vessels: స్టీల్ పాత్రలలో పండ్లు, పాల ఉత్పత్తులు నిల్వ చేస్తున్నారా? ఈ విషయం తెలుసుకోండి!

మన కిచెన్​లో ఎక్కువగా ఉపయోగించేవి స్టీల్ పాత్రలు. వాటి మన్నిక, శుభ్రత కారణంగా వాటిని ప్రతి ఒక్కరూ ఇష్టపడతారు. అయితే, స్టీల్ పాత్రలు వంట చేయడానికి, నీరు నిల్వ చేయడానికి ఎంత మంచివైనా, కొన్ని రకాల ఆహార పదార్థాలను, ముఖ్యంగా పండ్లు, పాల ఉత్పత్తులు వాటిలో నిల్వ చేయడం ఆరోగ్యానికి హానికరం అని పోషకాహార నిపుణులు హెచ్చరిస్తున్నారు.

ఈ పాత్రలలో కొన్నిరకాల ఆహారపదార్థాలు నిల్వ ఉంచకపోవడం మంచిదని సూచిస్తున్నారు. స్టీలుపాత్రలో నిల్వ ఉంచితే ఆయా పదార్థాల్లో రసాయన మార్పులకు దారితీస్తుంది. స్టీల్​పాత్రల్లో నిల్వ ఉంచకూడని ఆహార పదార్థాలేంటో తెలుసుకుందాం..

•  నారింజ, నిమ్మ, బెర్రీలు, ద్రాక్ష వంటి సిట్రస్ పండ్లలో ఆమ్లత్వం అధికంగా ఉంటుంది. ఈ ఆమ్ల ఆహారాలను ఎక్కువసేపు స్టీల్ పాత్రల్లో నిల్వ చేసినప్పుడు, ఆ ఆమ్లం స్టీల్‌లో ఉండే లోహ మూలకాలతో ముఖ్యంగా నికెల్, క్రోమియంతో చర్య జరిపే అవకాశం ఉంది. ఈ చర్య వల్ల లోహపు అంశాలు ఆహారంలోకి స్వల్ప మొత్తంలో లీకైపోతాయి. వీటిని దీర్ఘకాలంగా తీసుకోవడం వల్ల ఆరోగ్య సమస్యలు, ముఖ్యంగా అజీర్తి, వికారం, అలెర్జీలు వచ్చే ప్రమాదం ఉంటుంది. ఆహారం సహజ రుచి మారిపోయి, లోహపు రుచి వచ్చే అవకాశం ఉంది.
•  పెరుగు, మజ్జిగ, పాలు వంటి పాల ఉత్పత్తులు కూడా ఆమ్లత్వం కలిగి ఉంటాయి, చాలా సున్నితమైనవి. స్టీల్ పాత్రల్లో నిల్వ చేయడం వల్ల పాల ఉత్పత్తులు త్వరగా పులిసిపోతాయి లేదా పాడైపోతాయి. ఆమ్ల ఆహారం మాదిరిగానే, పాల ఉత్పత్తులు కూడా స్టీల్‌తో చర్య జరపడం వల్ల రుచి మారే అవకాశం ఉంటుంది.
•  స్టీల్ పాత్రలకు సురక్షితమైన ప్రత్యామ్నాయాలు ఉపయోగించడం ద్వారా ఆహారం నాణ్యత, ఆరోగ్యాన్ని కాపాడుకోవచ్చు. గాజు పాత్రలు ఎటువంటి రసాయన చర్యలకు లోను కావు. ఇవి ఆమ్ల ఆహారాలను, పాల ఉత్పత్తులను నిల్వ చేయడానికి అత్యంత సురక్షితమైనవి.
•  పండ్లు, వండిన ఆహారాన్ని నిల్వ చేయడానికి సిరామిక్ కంటైనర్లు మంచి ఎంపిక. అత్యవసర పరిస్థితుల్లో బిపిఎ-రహిత ఫుడ్-గ్రేడ్ ప్లాస్టిక్ కంటైనర్లను కూడా ఉపయోగించవచ్చు.

కిచెన్​లో చిన్న మార్పు చేయడం ద్వారా మీ కుటుంబ ఆరోగ్యాన్ని మెరుగుపరచవచ్చు. స్టీల్ పాత్రలను వంట చేయడానికి మాత్రమే ఉపయోగించి, పండ్లు, పాల ఉత్పత్తుల నిల్వ కోసం గాజు లేదా సిరామిక్ పాత్రలను ఎంచుకోవడం ఉత్తమం.