పచ్చిమిర్చితో ఇన్ని అద్భుతాలా.. రోజూ తింటే శరీరంలో ఏం జరుగుతుందో తెలుసా..?
పచ్చిమిరపకాయ కారం అని తెలిసినా, కళ్లలో నీళ్లు తిరుగుతున్నా ఆ రుచిని మనం వదులుకోలేం. ఈ మిర్చి కేవలం కారాన్ని మాత్రమే కాదు.. మన ఆరోగ్యానికి ఒక సంజీవని లాంటి ప్రయోజనాలను కూడా ఇస్తుందని మీకు తెలుసా? పచ్చిమిర్చి ఘాటు వెనుక దాగున్న అద్భుతమైన ఆరోగ్య రహస్యాలేంటో ఇప్పుడు తెలుసుకుందాం..
భారతీయ భోజనంలో పచ్చిమిరపకాయది ప్రత్యేక స్థానం. కూరగాయల మార్కెట్కు వెళ్తే.. పచ్చిమిరపకాయలు లేనిదే తిరిగి రారు. కళ్లలో నీళ్లు తెప్పించే ఈ పచ్చిమిరపకాయ కేవలం కారం మాత్రమే కాదు.. అది మన శరీరానికి చేసే మేలు అంతా ఇంతా కాదు. పచ్చిమిర్చిలో దాగున్న ఆ 5 అద్భుత ప్రయోజనాల గురించి ఇప్పుడు తెలుసుకుందాం.
బరువు తగ్గడానికి క్యాప్సైసిన్ మ్యాజిక్
పచ్చిమిరపకాయల్లో ఉండే క్యాప్సైసిన్ అనే సమ్మేళనం శరీర జీవక్రియను వేగవంతం చేస్తుంది. దీనివల్ల శరీరంలో పేరుకుపోయిన కొవ్వు వేగంగా కరుగుతుంది. మీరు రుచికరమైన కారంగా ఉండే ఆహారం తింటూనే బరువు తగ్గవచ్చు.
చర్మానికి సహజమైన గ్లో
నారింజ పండ్లలో కంటే పచ్చిమిర్చిలో విటమిన్ సి అధికంగా ఉంటుందని మీకు తెలుసా? ఇది చర్మాన్ని ఆరోగ్యంగా ఉంచుతుంది. చర్మంపై ముడతలను తగ్గించి ముఖానికి సహజమైన కాంతిని ఇస్తుంది. యవ్వనంగా కనిపించాలనుకునే వారికి పచ్చిమిర్చి ఒక సహజ సౌందర్య సాధనం.
గుండె పదిలం
పచ్చిమిరపకాయలు రక్తంలోని కొలెస్ట్రాల్, ట్రైగ్లిజరైడ్స్ స్థాయిలను తగ్గించడంలో సహాయపడతాయి. ఇది రక్తం గడ్డకట్టడాన్ని నివారించి, గుండెపోటు ప్రమాదాన్ని తగ్గిస్తుంది. గుండె ఆరోగ్యాన్ని కాపాడటంలో ఇది కీలక పాత్ర పోషిస్తుంది.
రోగనిరోధక శక్తికి పవర్హౌస్
విటమిన్ సి, యాంటీ ఆక్సిడెంట్లు పుష్కలంగా ఉండటం వల్ల పచ్చిమిర్చి రోగనిరోధక శక్తిని పెంచుతుంది. క్రమం తప్పకుండా మితంగా పచ్చిమిరపకాయలను తీసుకునే వారికి జలుబు, దగ్గు వంటి ఇన్ఫెక్షన్లు అంత త్వరగా దరిచేరవు.
జీర్ణక్రియకు సహకారం
మితంగా పచ్చిమిర్చి తీసుకోవడం వల్ల లాలాజల ఉత్పత్తి పెరిగి, ఆహారం సులభంగా జీర్ణం కావడానికి సహాయపడుతుంది. ఇది ప్రేగుల ఆరోగ్యాన్ని కూడా మెరుగుపరుస్తుంది.
అతి సర్వత్ర వర్జయేత్
ఏదైనా అతిగా తింటే ప్రమాదమే. పచ్చిమిరపకాయలు ఎక్కువగా తింటే కడుపులో మంట, అసిడిటీ లేదా పైల్స్ వంటి సమస్యలు రావచ్చు. అందుకే రోజువారీ ఆహారంలో 2 నుంచి 3 పచ్చిమిరపకాయల కంటే ఎక్కువ తీసుకోకపోవడమే మంచిదని నిపుణులు సూచిస్తున్నారు.
మరిన్ని లైఫ్ స్టైల్ న్యూస్ కోసం క్లిక్ చేయండి..