కైలాస మానస సరోవర్ యాత్రకు వెళతారా..? అప్లై చేయడానికి చివరి తేదీ ఇదే!

ఈ ఏడాది వార్షిక కైలాస్ మానసరోవర్ యాత్ర జూన్ నుంచి ఆగస్టు వరకు నిర్వహించనున్నట్లు విదేశాంగ మంత్రిత్వ శాఖ గురువారం వెల్లడించింది. ఈ యాత్రకు దరఖాస్తులను 2026 మే 19 లోగా సమర్పించవచ్చని తెలిపింది. అధికారిక ప్రకటన ప్రకారం, యాత్రను ఉత్తరాఖండ్‌లోని లిపులేఖ్ పాస్, సిక్కింలోని నాథూ లా మార్గాల ద్వారా నిర్వహించనున్నారు. మొత్తం 20 బ్యాచ్‌లుగా యాత్రను ప్లాన్ చేయగా, మొదటి 10 బ్యాచ్‌లలో ఒక్కో బ్యాచ్‌లో 50 మంది యాత్రికులకు అవకాశం కల్పించనున్నారు. ఈ కార్యక్రమం చైనా అధికారుల సమన్వయంతో కొనసాగుతుందని విదేశాంగ మంత్రిత్వ శాఖ స్పష్టం చేసింది.

రిజిస్ట్రేషన్ వివరాలు

కైలాస్ మానసరోవర్ యాత్రకు దరఖాస్తులు కేవలం ఆన్‌లైన్ ద్వారానే స్వీకరించబడతాయి. అధికారిక వెబ్‌సైట్ kmy.gov.in ద్వారా నమోదు చేసుకోవచ్చు. ఫ్యాక్స్ లేదా భౌతిక లేఖల ద్వారా దరఖాస్తులు పంపాల్సిన అవసరం లేదని, మొత్తం ప్రక్రియ పూర్తిగా డిజిటల్‌గా జరుగుతుందని మంత్రిత్వ శాఖ తెలిపింది.

ఎంపిక ప్రక్రియ కంప్యూటర్ ఆధారిత, యాదృచ్ఛిక, నిష్పక్షపాతంగా, లింగ సమతుల్యతను పరిగణలోకి తీసుకుని నిర్వహించబడుతుంది. దరఖాస్తుదారులు రెండు మార్గాల్లోనూ లేదా తమకు ఇష్టమైన ఒక్క మార్గాన్ని కూడా ఎంచుకోవచ్చు.

ప్రాముఖ్యత

కైలాస్ మానస సరోవర్ యాత్ర హిందువులకు అత్యంత పవిత్రమైన తీర్థయాత్రలలో ఒకటిగా పరిగణించబడుతుంది. శివుని నివాసంగా భావించే ఈ ప్రాంతం బౌద్ధులు, జైనులు సహా అనేకమందిని ఆకర్షిస్తుంది.

కోవిడ్-19 మహమ్మారి, భారత్–చైనా సరిహద్దు ఉద్రిక్తతల కారణంగా ఐదేళ్లకు పైగా నిలిచిపోయిన ఈ యాత్ర గత ఏడాది తిరిగి ప్రారంభమైంది.

ఖర్చు వివరాలు

హెలికాప్టర్ ద్వారా కాఠ్మండు–కాఠ్మండు 11 రోజుల యాత్రకు భారతీయ పాస్‌పోర్ట్ ఉన్నవారికి సుమారు రూ. 3,45,000 ఖర్చవుతుంది. విదేశీ పాస్‌పోర్ట్ ఉన్నవారికి సరైన వీసాతో పాటు సుమారు $4,170 ఖర్చు అవుతుంది. రోడ్డు మార్గం సహా ఇతర ప్యాకేజీల వివరాలు కూడా అధికారిక వెబ్‌సైట్‌లో అందుబాటులో ఉన్నాయి.