సన్‌ఫ్లవర్ నూనె vs పల్లీ నూనె.. ఆరోగ్యానికి ఏది మంచిది..? ఈ నిజాలు తెలుసుకోండి..

భారతీయ వంటింట్లో నూనెది అత్యంత కీలక పాత్ర. అయితే గత కొన్నేళ్లుగా ఆరోగ్యంపై శ్రద్ధ పెరిగిన నేపథ్యంలో ప్రతిరోజూ వాడే వంట నూనెల ఎంపికపై తీవ్ర చర్చ జరుగుతోంది. ముఖ్యంగా మన ఇళ్లలో ఎక్కువగా వాడే పల్లీ నూనె, సన్‌ఫ్లవర్ ఆయిల్ మధ్య ఏది ఆరోగ్యానికి మంచిది అనే డౌట్ చాలామందిలో నెలకొంది. ఈ రెండింటిలోనూ సహజంగా కొలెస్ట్రాల్ ఉండనప్పటికీ, వాటిలోని కొవ్వు ఆమ్లాలు, అవి పనిచేసే తీరు పూర్తిగా భిన్నంగా ఉంటాయి. పోషక విలువల పరంగా చూస్తే.. పల్లీ నూనెలో మోనోఅన్‌శాచురేటెడ్ ఫ్యాటీ యాసిడ్స్ సమృద్ధిగా ఉంటాయి. ఇవి రక్తంలో చెడు కొలెస్ట్రాల్‌ను తగ్గిస్తూనే, గుండెను రక్షించే మంచి కొలెస్ట్రాల్‌ను పెంచడంలో సహాయపడతాయి. మరోవైపు సన్‌ఫ్లవర్ ఆయిల్‌లో పాలీఅన్‌శాచురేటెడ్ ఫ్యాటీ యాసిడ్స్ అధికంగా లభిస్తాయి. ముఖ్యంగా దీనిలోని లినోలియిక్ యాసిడ్ చెడు కొలెస్ట్రాల్ స్థాయిలను వేగంగా నియంత్రించడంలో తోడ్పడుతుంది. విటమిన్ ఈ రెండు నూనెల్లోనూ ఉన్నప్పటికీ, సన్‌ఫ్లవర్ ఆయిల్‌లో దీని సాంద్రత కాస్త ఎక్కువగా ఉండి కణాల రక్షణకు ఉపయోగపడుతుంది.

వంటల తయారీ విషయంలో ఈ రెండు నూనెల స్మోక్ పాయింట్ చాలా ఎక్కువగా ఉంటుంది. పల్లీ నూనె అధిక ఉష్ణోగ్రతలను తట్టుకోగలదు కాబట్టి పూరీలు, బజ్జీలు, గారెలు వంటి డీప్ ఫ్రైయింగ్‌కు, ఘాటైన భారతీయ పోపులకు బాగా సరిపోతుంది. పైగా దీనికి సహజమైన కమ్మని సువాసన ఉంటుంది. దీనికి భిన్నంగా, సన్‌ఫ్లవర్ ఆయిల్‌కు ఎలాంటి ప్రత్యేక రుచి లేదా వాసన ఉండదు. అందుకే అసలు వంటకం రుచి మారకుండా ఉండేందుకు బేకింగ్, తక్కువ మంటపై చేసే తేలికపాటి వేపుళ్లకు సన్‌ఫ్లవర్ ఆయిల్‌ను ఎక్కువగా ఎంచుకుంటారు.

ఆరోగ్యం, శరీర బరువు పరంగా చూస్తే.. సన్‌ఫ్లవర్ ఆయిల్‌లోని తేలికపాటి కొవ్వులు బరువు నియంత్రణ ప్రయత్నాల్లో ఉన్నవారికి అనుకూలంగా ఉంటాయి. అయితే ఇందులో ఒమేగా-6 ఫ్యాటీ యాసిడ్లు ఎక్కువ మోతాదులో ఉండటం వల్ల పరిమితికి మించి వాడితే శరీరంలో అంతర్గత వాపులు వచ్చే ప్రమాదం ఉందని వైద్య నిపుణులు హెచ్చరిస్తున్నారు. ఇక పల్లీ నూనె విషయానికి వస్తే.. శుద్ధి చేసిన నూనె కన్నా సాంప్రదాయ చెక్క గానుగ ద్వారా తీసిన నూనెను వాడితే శరీర మెటబాలిజం మెరుగవుతుంది. గుండె రక్తనాళాల్లో పూడికలు ఏర్పడకుండా ఉంటాయి.

నిపుణులు ఇచ్చే సలహా ఏంటంటే.. ఈ రెండింటిలో ఏ ఒక్క నూనెనూ సంపూర్ణమైనదిగా పరిగణించలేం. శరీర సంపూర్ణ ఆరోగ్యానికి MUFA, PUFA కొవ్వులు రెండూ సమపాళ్లలో అవసరం. కాబట్టి డీప్ ఫ్రైయింగ్, వేపుళ్లకు గానుగ పల్లీ నూనెను, సాధారణ తేలికపాటి వంటలకు సన్‌ఫ్లవర్ ఆయిల్‌ను వాడటం ఉత్తమం. లేదా ప్రతినెలా నూనెలను మారుస్తూ ఉపయోగించడం వల్ల అన్ని రకాల ఆరోగ్య ప్రయోజనాలను సమతుల్యంగా పొందవచ్చు.