మారుతున్న Gen Z ఆలోచన.. ఇళ్లు కొనడం మానేస్తే.. భారత ఆర్థిక వ్యవస్థకు ఏమవుతుంది?

జెన్ జెడ్.. అంటే 1990ల చివరి నుంచి 2010ల ప్రారంభం మధ్య జన్మించిన తరం. ఈ తరం ఉద్యోగాలు, జీవనశైలి, పెట్టుబడులు, ఖర్చుల విషయంలో గత తరాల కంటే భిన్నంగా ఆలోచిస్తోంది. ముఖ్యంగా ‘సొంత ఇల్లు’ జీవితంలో తప్పనిసరిగా ఉండాల్సిందేనా? అనే ప్రశ్నను కొత్తగా చూస్తోంది. దీంతో ఒక ఆసక్తికరమైన ప్రశ్న తెరపైకి వచ్చింది. జెన్ జెడ్ పెద్ద సంఖ్యలో ఇళ్లు కొనకుండా ఉంటే భారత ఆర్థిక వ్యవస్థపై ప్రభావం ఎలా ఉంటుంది?

సాధారణంగా ఇళ్ల కొనుగోళ్లు తగ్గితే రియల్ ఎస్టేట్ కుప్పకూలుతుందని భావిస్తాం. కానీ అసలు విషయం అంత సింపుల్ కాదు. జెన్ జెడ్‌కు ఇల్లు అవసరం లేకపోవడం కాదు.. ఇల్లు సొంతం చేసుకునే సమయాన్ని, విధానాన్ని మార్చుకోవడం అసలు మార్పు. అర్థశాస్త్ర నిపుణుల అభిప్రాయం ప్రకారం.. జెన్ జెడ్‌కు నివసించడానికి ఇల్లు తప్పనిసరిగా అవసరం. కానీ అది సొంతంగా కొనుగోలు చేసినదే కావాల్సిన అవసరం లేదు. వారసత్వంగా రావచ్చు, అద్దెకు తీసుకోవచ్చు లేదా తర్వాతి దశలో కొనుగోలు చేయవచ్చు. అందువల్ల గృహాల డిమాండ్ పూర్తిగా మాయమయ్యే అవకాశం లేదంటున్నారు నిపుణులు.

అయితే మొదటిసారి ఇల్లు కొనుగోలు చేసే వారి సంఖ్య, వయసు మారితే మాత్రం ఆర్థిక వ్యవస్థలో డబ్బు ప్రవాహం మారుతుంది. అద్దెకు ఉండే వ్యక్తి ప్రతి నెలా తన ఆదాయంలో కొంత భాగాన్ని ఇంటి యజమానికి చెల్లిస్తాడు. అదే వ్యక్తి ఇల్లు కొనుగోలు చేస్తే.. బ్యాంకు రుణం, డౌన్‌పేమెంట్, డెవలపర్ చెల్లింపులు, స్టాంప్ డ్యూటీ, నిర్మాణ రంగం వంటి అనేక వ్యవస్థల్లోకి డబ్బు ప్రవహిస్తుంది.

‘ఇల్లు ముందా.. పెట్టుబడి ముందా?

జెన్ జెడ్‌లో కనిపిస్తున్న మరో మార్పు పెట్టుబడుల విషయంలో.. ఉద్యోగం వచ్చిన వెంటనే హోమ్ లోన్ తీసుకుని 20–25 ఏళ్ల పాటు EMI చెల్లించడం కంటే.. ముందుగా ఈక్విటీలు, మ్యూచువల్ ఫండ్లు, REITలు వంటి ఆర్థిక సాధనాల్లో సంపదను పెంచుకోవాలని కొందరు భావిస్తున్నారు. సోషల్ మీడియా కూడా ఈ మార్పును ప్రభావితం చేస్తోంది. ఒకప్పుడు సొంత ఇల్లు సంపదకు ప్రధాన గుర్తుగా కనిపిస్తే.. ఇప్పుడు ప్రయాణాలు, కొత్త టెక్నాలజీ, జీవనశైలి, అనుభవాలకు కూడా యువత ప్రాధాన్యం ఇస్తోంది. భవిష్యత్తులో కొనుగోలు చేసే ఫ్లాట్ కోసం ఇప్పటి నుంచే భారీ EMI భారం మోయడం కంటే.. ప్రస్తుతం అందుబాటులో ఉన్న జీవితాన్ని ఆస్వాదించాలనే ఆలోచన పెరుగుతోంది.

రియల్ ఎస్టేట్‌పై ప్రభావం ఎలా?

భారత ఆర్థిక వ్యవస్థలో రియల్ ఎస్టేట్ కీలక రంగం. నిర్మాణ రంగంతో పాటు సిమెంట్, స్టీల్, పెయింట్స్, ఫర్నిచర్, గృహోపకరణాలు, రవాణా, రోజువారీ కూలీల ఉపాధి వంటి అనేక రంగాలు దీనిపై ఆధారపడి ఉన్నాయి. మొదటిసారి కొనుగోలుదారులు తమ ఇళ్ల కొనుగోళ్లను ఐదు లేదా పది సంవత్సరాలు ఆలస్యం చేస్తే.. కొత్త ప్రాజెక్టుల అమ్మకాలపై ప్రభావం పడొచ్చు. అమ్మకాలు తగ్గితే డెవలపర్లు కొత్త ప్రాజెక్టులను ప్రారంభించడంలో వెనుకడుగు వేయవచ్చు. దాని ప్రభావం చివరకు నిర్మాణ రంగంలోని ఉపాధిపైనా పడే అవకాశం ఉంటుంది. అదే సమయంలో బ్యాంకులకు కూడా ప్రభావం ఉంటుంది. గృహ రుణాలు సాధారణంగా బ్యాంకుల సురక్షితమైన రుణ విభాగాల్లో ఒకటి. హోమ్ లోన్ల వృద్ధి మందగిస్తే.. రుణాల నిర్మాణం మారవచ్చు.

ఇక్కడే అసలు ఆసక్తికరమైన అంశం ఉంది. యువత ఇళ్లపై పెట్టుబడి పెట్టకుండా ఆ డబ్బును ఈక్విటీలు, మ్యూచువల్ ఫండ్లు, REITలు లేదా ఇతర ఆర్థిక ఆస్తుల్లో పెట్టుబడి పెడితే.. ఆ డబ్బు ఆర్థిక వ్యవస్థ నుంచి బయటకు వెళ్లదు. దాని దిశ మాత్రమే మారుతుంది. రియల్ ఎస్టేట్‌కు వెళ్లాల్సిన మూలధనం కంపెనీలకు, స్టాక్ మార్కెట్లకు, పెట్టుబడి సంస్థలకు చేరవచ్చు. దీర్ఘకాలంలో ఇది భారత కుటుంబాల సంపదను ఒకే ఆస్తిపై ఆధారపడకుండా విభజించడానికి కూడా సహాయపడొచ్చు. జపాన్, చైనా వంటి దేశాల్లో స్థిరాస్తిపై అధిక ఆధారపడటం ఒక దశలో ఆర్థిక బలహీనతగా మారిన ఉదాహరణలు ఉన్నాయి. అందువల్ల యువత తమ సంపదను వివిధ ఆస్తుల్లో విభజించడం దీర్ఘకాలంలో ఆర్థిక వ్యవస్థకు మరో రకమైన బలాన్ని ఇవ్వొచ్చని ఆర్థిక నిపుణులు అంటున్నారు.

‘Gen Z ఎప్పటికీ ఇళ్లు కొనరా?

అందువల్ల ‘Gen Z ఎప్పటికీ ఇళ్లు కొనదు’ అనేది సరైన అంచనా కాదు. వారు ఇళ్లు కొనుగోలు చేసే అవకాశం ఉంది.. కానీ కొంచెం ఆలస్యంగా. గత తరాల మాదిరిగా 20ల చివర్లో కాకుండా 30లు, 40ల్లో కొనుగోలు చేయవచ్చు. అప్పటికి వారి ఆదాయం, పొదుపులు, పెట్టుబడులు మరింత బలంగా ఉండొచ్చు. అసలు మారుతున్నది గృహాల అవసరం కాదు.. గృహ యాజమాన్యం విషయంలో యువత ఆలోచనా విధానం. ఇల్లు ఇకపై ఒకేసారి ‘ఆశ్రయం + జీవితకాలపు అతిపెద్ద పెట్టుబడి’ కాకుండా.. ముందుగా ఆశ్రయం, ఆ తర్వాత పెట్టుబడిగా మారే అవకాశం ఉంది.

అంటే Gen Z ఇళ్లను తిరస్కరించడం లేదు. వారు ఇల్లు కొనుగోలు చేసే క్రమాన్ని మాత్రమే మార్చుకుంటున్నారు. ఈ మార్పు రియల్ ఎస్టేట్‌కు సవాలే అయినప్పటికీ.. భారత ఆర్థిక వ్యవస్థకు అది తప్పనిసరిగా విపత్తు కావాల్సిన అవసరం లేదు. డబ్బు ఒక రంగం నుంచి మరో రంగానికి మళ్లే అవకాశం ఉంది. అసలు ప్రశ్న.. ఆ మార్పును భారత ఆర్థిక వ్యవస్థ ఎంత సమర్థంగా స్వీకరిస్తుందన్నదే..!

మరిన్ని హ్యుమన్ ఇంట్రెస్ట్ వార్తల కోసం ఇక్కడ క్లిక్ చేయండి…