ఆర్టిఫిషియల్ ఇంటెలిజెన్స్

కృత్రిమ మేధస్సు లేదా ఆర్టిఫిషియల్ ఇంటెలిజెన్స్ (Artificial Intelligence – AI).. ఇప్పుడు ప్రపంచ వ్యాప్తంగా ఈ అంశం మీదే చర్చ జరుగుతోంది. ఆర్టిఫిషియల్ ఇంటెలిజెన్స్ అంటే మనుషుల మేధస్సును అనుకరించేలా కంప్యూటర్లు, యంత్రాలు ఆలోచించడం, నేర్చుకోవడం, నిర్ణయాలు తీసుకోవడం, సమస్యలను పరిష్కరించడం వంటి పనులు చేయగలిగే సాంకేతికత. మనిషి తన మేధస్సుతో చేసే కొన్ని తెలివైన పనులను యంత్రాలు, సాంకేతికతతో చేయించడమే AI లక్ష్యం. AI ప్రధానంగా భారీ మొత్తంలో డేటాను విశ్లేషించి, అందులోని నమూనాలను గుర్తిస్తుంది.

ఏఐ ద్వారా కలిగే లాభ నష్టాలపై చర్చోపచర్చలు జరుగుతున్నాయి. పనులను వేగంగా పూర్తి చేసేందుకు ఏఐ సాయపడుతుంది. భారీ డేటాలను కూడా విశ్లేషించి క్షణాల్లో మనం కోరుకునే సమాచారాన్ని ఇస్తుంది. కొత్త ఆవిష్కరణలకు ఇది దోహదపడే అవకాశముంది. తద్వారా కొత్త ఉద్యోగ అవకాశాలను సృష్టిస్తుందని కొందరు నిపుణులు అభిప్రాయపడుతున్నారు. అయితే ఏఐ ప్రభావంతో ఇప్పటికే ఉన్న ఉద్యోగాల్లో భారీగా కోతపడే ప్రమాదముందని కొందరు నిపుణులు అంచనావేస్తున్నారు. పలు రంగాల్లో ఎంట్రీ లెవల్ ఉద్యోగాలు భారీగా తగ్గే అవకాశం ఉందంటున్నారు. భవిష్యత్ సవాళ్లను ఎదుర్కొనేందుకు ఏఐ మెళుకవలు అందరూ నేర్చుకోవాల్సిన అవసరం ఉంది.