పిల్లలకు స్మార్ట్‌ఫోన్ ఇస్తున్నారా..? భయంకర నిజాలు బయటపెట్టిన అధ్యయనాలు..!

పిల్లలు ఏడుస్తున్నారని, తినడం లేదని, ప్రశాంతంగా ఉండటం లేదని చేతిలో స్మార్ట్‌ఫోన్ పెట్టడం చాలామంది తల్లిదండ్రులకు సాధారణంగా మారిపోయింది. కానీ చిన్న వయసులోనే పిల్లలను ఎక్కువసేపు స్క్రీన్‌లకు అలవాటు చేయడం భవిష్యత్‌లో వారి అభ్యాస సామర్థ్యం, జ్ఞాపకశక్తి, భాషా నైపుణ్యాలు, ఏకాగ్రతపై ప్రభావం చూపే అవకాశం ఉందని తాజా పరిశోధన హెచ్చరిస్తోంది. ముఖ్యంగా బాల్యంలో కొన్ని కీలక దశల్లో అధిక స్క్రీన్ ఎక్స్‌పోజర్‌ ఉంటే.. తర్వాతి సంవత్సరాల్లో విద్యా పనితీరు, వర్కింగ్ మెమరీ బలహీనపడే అవకాశం ఉందని పరిశోధకులు గుర్తించారు.

ఫ్రాన్స్‌కు చెందిన INSERM, సింగపూర్ నేషనల్ యూనివర్శిటీ పరిశోధకులు నిర్వహించిన ఈ అధ్యయనం ‘Growing Up in Singapore Towards Healthy Outcomes (GUSTO)’ బర్త్ కోహార్ట్‌లోని 502 మంది పిల్లలపై జరిగింది. పిల్లలు వివిధ వయస్సుల్లో స్క్రీన్‌లను ఎంతసేపు ఉపయోగించారో పరిశీలించిన పరిశోధకులు.. వారి విద్యా పనితీరును 9 ఏళ్ల వయస్సులో, జ్ఞాపకశక్తి సామర్థ్యాలను సుమారు 10.5 ఏళ్ల వయస్సులో అంచనా వేశారు.

ఈ పరిశోధనలో ప్రత్యేకత ఏమిటంటే.. పిల్లలు మొత్తం ఎన్ని గంటలు స్క్రీన్ చూస్తున్నారు అనే అంశంతో పాటు, ఏ వయస్సులో స్క్రీన్ ఎక్స్‌పోజర్ ఎక్కువగా ఉంది? అనే అంశాన్ని కూడా పరిశీలించారు. ఆ విశ్లేషణలో చిన్న వయసులో, ముఖ్యంగా ఒక సంవత్సరం వయస్సులో ఎక్కువ స్క్రీన్ సమయం ఉన్న పిల్లల్లో తర్వాతి దశలో విద్యా పనితీరు తక్కువగా ఉండటం, వర్కింగ్ మెమరీ బలహీనంగా ఉండటం వంటి సంబంధాలు కనిపించాయి. సుమారు ఆరు సంవత్సరాల వయస్సులో అధిక స్క్రీన్ వినియోగం కూడా ప్రతికూల ఫలితాలతో సంబంధం కలిగి ఉన్నట్లు అధ్యయనం సూచించింది.

పిల్లల మెదడు వేగంగా అభివృద్ధి చెందే సమయంలో స్క్రీన్ సమయం పెరిగితే.. ఆటలు ఆడటం, పుస్తకాలు చదవడం, తల్లిదండ్రులతో మాట్లాడటం, ఇతర పిల్లలతో కలిసి ఆడటం వంటి అభివృద్ధికి అవసరమైన కార్యకలాపాలకు కేటాయించే సమయం తగ్గిపోవచ్చని పరిశోధకులు చెబుతున్నారు. పిల్లలు వాస్తవ ప్రపంచంలో చేసే పరస్పర చర్యల ద్వారా భాష, సమస్య పరిష్కారం, సామాజిక నైపుణ్యాలు, జ్ఞాపకశక్తి వంటి అనేక సామర్థ్యాలను అభివృద్ధి చేసుకుంటారు.

అయితే స్క్రీన్ అంటే పూర్తిగా చెడు అని చెప్పడం సరైంది కాదని పరిశోధనలు సూచిస్తున్నాయి. 2020లో కాల్గరీ విశ్వవిద్యాలయానికి చెందిన షెరీ మాడిగన్ నేతృత్వంలోని పరిశోధకులు 42 అధ్యయనాల్లోని 18,905 మంది పిల్లల డేటాను సమీక్షించారు. ఎక్కువ స్క్రీన్ సమయం బలహీనమైన భాషా నైపుణ్యాలతో సంబంధం కలిగి ఉన్నట్లు గుర్తించారు. అయితే విద్యా సంబంధిత కంటెంట్ చూడటం, తల్లిదండ్రులు, సంరక్షకులతో కలిసి స్క్రీన్‌ను ఉపయోగించడం వంటి సందర్భాల్లో మెరుగైన భాషా నైపుణ్యాలు కనిపించాయని పరిశోధన పేర్కొంది.

అలాగే 2023లో ఫ్రాన్స్ పరిశోధకులు చిన్న పిల్లలపై నిర్వహించిన 15 అధ్యయనాలను సమీక్షించారు. అధిక స్క్రీన్ ఎక్స్‌పోజర్‌, శ్రద్ధ సమస్యల మధ్య సంబంధాన్ని పరిశీలించగా.. కొన్ని అధ్యయనాలు ఈ సంబంధాన్ని గుర్తించాయి. అయితే అన్ని పరిశోధనలు ఒకే విధమైన ఫలితాలను ఇవ్వలేదు. అంటే స్క్రీన్ వినియోగం, పిల్లల అభివృద్ధి మధ్య సంబంధం సంక్లిష్టమైనదని నిపుణులు చెబుతున్నారు.

అందువల్ల తల్లిదండ్రులు పిల్లలకు స్క్రీన్ పూర్తిగా దూరం చేయడం కంటే.. ఎప్పుడు ఇస్తున్నారు, ఎంతసేపు ఇస్తున్నారు, ఏ కంటెంట్ చూపిస్తున్నారు, పిల్లలతో కలిసి చూస్తున్నారా లేదా అనే అంశాలపై దృష్టి పెట్టడం ముఖ్యమని పరిశోధనలు సూచిస్తున్నాయి. ముఖ్యంగా చిన్న వయసులో స్క్రీన్ సమయాన్ని పరిమితం చేసి.. ఆటలు, పుస్తక పఠనం, కుటుంబంతో సంభాషణ, శారీరక కార్యకలాపాలకు ఎక్కువ సమయం కేటాయించడం పిల్లల సమగ్ర అభివృద్ధికి ఉపయోగకరంగా ఉండొచ్చు.

ఈ అధ్యయనం స్క్రీన్ వినియోగమే పిల్లల భవిష్యత్ విద్యా పనితీరుకు నేరుగా కారణమని నిరూపించదు. అయితే చిన్న వయసులో అధిక స్క్రీన్ ఎక్స్‌పోజర్‌పై తల్లిదండ్రులు అప్రమత్తంగా ఉండాల్సిన అవసరాన్ని మాత్రం మరోసారి గుర్తుచేస్తోంది.

మరిన్ని లైఫ్‌స్టైల్ వార్తల కోసం ఇక్కడ క్లిక్ చేయండి..