Parenting Tips: పిల్లలు ధైర్యంగా ఎదగాలంటే ఇలా చేసి చూడండి..!
పిల్లల్లో ఆత్మవిశ్వాసం అభివృద్ధి అయితే వారు భవిష్యత్తులో ధైర్యంగా సవాళ్లను ఎదుర్కొంటారు. పిల్లల అభివృద్ధిలో కుటుంబ వాతావరణం, ప్రోత్సాహం కీలక పాత్ర పోషిస్తాయి. సరైన మార్గదర్శకత్వం ద్వారా పిల్లల ఆత్మవిశ్వాసాన్ని పెంపొందించుకోవచ్చు. పిల్లలు సాధించిన చిన్న విజయాలను మనం గుర్తించి అభినందించాలి. అలాగే వారు చేసిన తప్పులను విమర్శించకుండా వాటి నుండి నేర్చుకోవడానికి ఒక అవకాశం ఉందని వారికి అర్థమయ్యేలా చెప్పాలి.
పిల్లల్లో ఆత్మవిశ్వాసం ఉంటే భవిష్యత్తులో సవాళ్లను ధైర్యంగా ఎదుర్కొంటారు, మంచి నిర్ణయాలు తీసుకుంటారు. కానీ ఈ నమ్మకం ఎలా పెరుగుతుందో ఎప్పుడైనా ఆలోచించారా..? పిల్లలు ఏం చేసినా పొగడటమే సరిపోతుందా..? లేక వారు ఏం చెప్పినా అంగీకరించడమే సరియైనదా..? నిపుణులు సూచించిన కొన్ని మార్గాల ద్వారా పిల్లల్లో ఆత్మవిశ్వాసాన్ని పెంపొందించవచ్చు.
పిల్లలు చుట్టూ ఉన్న పరిస్థితులను చాలా గమనిస్తారు. అందుకే ఇంట్లో సానుకూలమైన మద్దతు ఇచ్చే వాతావరణం కల్పించాలి. పిల్లలు ప్రేమతో అభిమానం పొందితే వారి ఆత్మవిశ్వాసం మెల్లగా పెరుగుతుంది. సంతోషంగా పెరిగిన పిల్లలకి భయాలు తక్కువగా ఉంటాయి.
పిల్లవాడు ఏదైనా సాధించినప్పుడు అది చిన్న విజయమే అయినా గమనించాలి. నిజాయితీతో పొగడాలి. అలాంటి ప్రశంసలు పిల్లలకు కృషి పట్ల గౌరవాన్ని నేర్పుతాయి. సరైన సమయంలో ఇచ్చిన ప్రశంస పిల్లవాడిని మంచి దిశగా నడిపిస్తుంది.
పిల్లలకు తప్పులు చేయడం సహజమని స్పష్టంగా చెప్పాలి. ఒక తప్పు చేసినప్పుడు నెగటివ్గా స్పందించకుండా అది నేర్చుకునే అవకాశం అని చెప్పాలి. ప్రతి ఒక్కరూ జీవితంలో తప్పులు చేస్తారని పిల్లలకు అర్థం అయ్యేలా చెప్పాలి. ఈ మాటలు పిల్లలకు ధైర్యం ఇస్తాయి.
పిల్లలు చిన్న పనులు స్వయంగా చేయడానికి అవకాశం ఇవ్వాలి. ఉదాహరణకి ఇంట్లో పనులు లేదా స్కూల్ లో తమ అభిప్రాయాన్ని చెప్పడం వంటివి. ఇలాంటి విషయాలు పిల్లలలో స్వతంత్రతను పెంపొందిస్తాయి. చిన్న విజయాలే పెద్ద ఆత్మవిశ్వాసానికి పునాది అవుతాయి.
పిల్లలతో ఎప్పుడూ ఓపికతో మాట్లాడాలి. వారి మాటలను గమనించాలి. పిల్లలు తమ భావాలను ఎటువంటి భయాలు లేకుండా వ్యక్తం చేయగలిగితే వారు బలమైన వ్యక్తిత్వాన్ని పెంచుకుంటారు. వారి భావాలు విలువైనవని చూపడం అవసరం.
పిల్లలతో చిన్న లక్ష్యాలు పెట్టుకోవాలి. ఉదాహరణకి రోజు పాఠాలు పూర్తి చేయడం, ఆటలలో కష్టపడడం లాంటి వాటిని ప్రోత్సహించాలి. వారు లక్ష్యాలను సాధించినప్పుడు వారి మీద వారికి నమ్మకం పెరుగుతుంది. కృషి తప్పక ఫలితాలను ఇస్తుందని పిల్లలకు తెలియజేయాలి.
పిల్లలు స్వయంగా చిన్న నిర్ణయాలు తీసుకునేలా ప్రోత్సహించాలి. ఉదాహరణకి ఏ వస్త్రాలు వేసుకోవాలి..? ఏ ఆట ఆడాలి వంటి చిన్న విషయాల్లో స్వతంత్రంగా నిర్ణయాలు తీసుకున్నప్పుడు పిల్లలు తమపై నమ్మకం పెంచుకుంటారు. ఇది వారి ఆత్మవిశ్వాసాన్ని మరింత బలపరుస్తుంది.