బొద్దింకలతో ఇబ్బంది పడుతున్నారా..? తరిమికొట్టేందుకు సింపుల్ చిట్కాలు ఇదిగో..!
వంటగదిలో బొద్దింకలు కనిపించడం అనేది సాధారణమైన సమస్య. ఇవి ఆరోగ్యానికి హానికరమైన వాతావరణాన్ని సృష్టిస్తాయి. అయితే సహజ పద్ధతులతో బొద్దింకలపై కట్టడి చేయవచ్చు. ఈ చిట్కాలు పాటించడం వల్ల ఇంటిని శుభ్రం చేయడమే కాకుండా అనారోగ్య సమస్యలు కూడా నివారించవచ్చు. ఆ చిట్కాల గురించి ఇప్పుడు తెలుసుకుందాం.
Updated on: Apr 06, 2025 | 6:24 PM
వంటగది శుభ్రంగా ఉండటం ఆరోగ్యానికి మంచిది. అయినా కొన్ని కీటకాలు మనకి తలనొప్పిగా మారుతుంటాయి. వాటిలో బొద్దింకలు ముఖ్యంగా కనిపిస్తాయి. ఇవి ఆహారం చుట్టూ తిరుగుతుంటాయి. దోమలు, ఈగలు కంటే కూడా బొద్దింకలు ఎక్కువ ఇబ్బంది పెడతాయి. ఇవి డ్రాయర్లలో, స్టవ్ చుట్టూ ఉండి ఆహారాన్ని పాడు చేస్తాయి. వీటివల్ల ఇన్ఫెక్షన్లు, కొన్ని వ్యాధులు కూడా వచ్చే అవకాశం ఉంది.
బొద్దింకలు చీకటి ప్రదేశాల్లో ఎక్కువగా కనిపిస్తాయి. వంటగదిలో డ్రాయర్లలో చీకటి ఉండే అవకాశం ఎక్కువగా ఉంటుంది. అందుకే అవి అక్కడ దాక్కుంటాయి. అక్కడే గూడు పెట్టుకుని జీవిస్తాయి. ఆ డ్రాయర్లలో ఉన్న పాత్రలు కూడా పాడవుతాయి. దీంతో కుటుంబ ఆరోగ్యానికి ముప్పు ఏర్పడుతుంది.
బొద్దింకల బాధ నుంచి బయటపడటానికి ఎంతో ఉపయోగపడే కొన్ని చిట్కాలు ఉన్నాయి. ఈ చిట్కాలు పాటిస్తే బొద్దింకలు ఆ డ్రాయర్లకు దగ్గరికి రావు. దీన్ని రోజూ పాటించాలి. అంతే కాని ఒకసారి చేసి మానేస్తే మళ్లీ వస్తాయి. బొద్దింకలు ఆహారాన్ని కలుషితం చేస్తాయి. దాంతో కడుపు సమస్యలు, జీర్ణ సమస్యలు వస్తాయి. ఇన్ఫెక్షన్లు పెరిగే ప్రమాదం కూడా ఉంటుంది. అందుకే వీటిని పూర్తిగా నివారించాలి.
డ్రాయర్లను వెనిగర్ నీటితో తుడవాలి. 1:1 నిష్పత్తిలో వాడాలి. ఇలా చేస్తే ఆహార వాసన పోతుంది. బొద్దింకలకు ఆకర్షణ తగ్గుతుంది. డ్రాయర్లలో ఆహార ముక్కలు పడకుండా చూడాలి. డ్రాయర్లలో ఏం ఉంచినా గాలి చొరబడని డబ్బాలలో పెట్టాలి. ఇలా చేయడం వల్ల బొద్దింకలు మళ్లీ రావు.
బే ఆకులు బలమైన వాసన కలిగిస్తాయి. డ్రాయర్లలో ఇవి పెట్టితే బొద్దింకలు దరి చేరవు. అలాగే వేప ఆకులు, వేప నూనె కూడా చాలా మంచివి. వేప నూనెను నీటిలో కలిపి పిచికారీ చేయాలి. వేప ఆకులు డ్రాయర్లలో పెట్టినా సరిపోతుంది. లవంగాలు, దాల్చిన చెక్క కూడా మంచి పరిష్కారం. వీటివల్ల కూడా బొద్దింకలు భయపడతాయి.
డ్రాయర్లలో పగుళ్లు కనిపిస్తే వెంటనే మూసేయాలి. లేదంటే అక్కడే బొద్దింకలు దాక్కుంటాయి. ఇది నిర్లక్ష్యం చేస్తే మళ్లీ సమస్య మొదలవుతుంది. సెలయిర్ గమ్ లేదా ఇన్సులేషన్ టేప్ వంటివి ఉపయోగించవచ్చు.
ఆహారం లేని ప్రదేశాల్లో బొద్దింకలకు ఉచ్చులు పెట్టాలి. వీటితో బొద్దింకలు ఆ ప్రదేశానికి రాకుండా చూసుకోవచ్చు. ఇది ఫైనల్ స్టెప్ లాంటిది. సహజ పద్ధతులు కాకపోతే ఇదే దారి.
ఇవన్నీ పాటిస్తే బొద్దింకల బాధ పూర్తిగా తగ్గిపోతుంది. ముఖ్యంగా శుభ్రత, సహజ నివారణలు, డ్రాయర్ల పగుళ్లు మూసివేయడం.. ఇవన్నీ తరచూ పాటిస్తూ ఉండాలి. మళ్ళీ మళ్ళీ వస్తే ఆశ్చర్యపడక్కరలేదు.. సరైన పద్ధతుల్లో తరిమికొట్టాల్సిందే.
