ఇంట్లో ఫ్యాన్ మెల్లగా తిరుగుతుందా.. ఇలా చేస్తే జెట్ స్పీడ్‌తో కూల్ కూల్..

ఈ వానాకాలంలో బయట వర్షాలు పడుతున్నప్పటికీ.. వాతావరణంలో తేమ శాతం ఎక్కువగా ఉండటం వల్ల ఇళ్లలో విపరీతమైన ఉక్కపోతగా ఉంటుంది. దీంతో ఈ సీజన్‌లోనూ ఫ్యాన్లు నిరంతరాయంగా తిరగాల్సి వస్తోంది. అయితే వర్షాకాలంలో గాల్లో ఉండే తేమ కారణంగా ఫ్యాన్ల స్పీడ్ తగ్గిపోవడం, గాలి సరిగ్గా రాకపోవడం వంటి సమస్యలు చాలా ఇళ్లలో ఎదురవుతుంటాయి. కొత్తగా కొన్నప్పుడు ఫుల్ స్పీడ్‌తో గుర్రంలా పరిగెత్తే ఫ్యాన్లు.. కాలక్రమేణా నత్తనడకన తిరగడానికి ప్రధాన కారణం వాటి నిర్వహణ లోపించడమే. ఫ్యాన్ స్పీడ్ తగ్గగానే చాలా మంది కొత్తది కొనాలని ఆలోచిస్తారు. కానీ రూపాయి ఖర్చు లేకుండా ఇంట్లోనే కొన్ని చిన్న చిన్న చిట్కాలు పాటిస్తే.. పాత ఫ్యాన్ కూడా మళ్లీ కొత్తదానిలా ఫర్రాటేదార్ గాలితో దూసుకుపోతుంది.

వర్షాకాలపు జిగట ధూళి

వర్షాకాలంలో గాల్లో తేమ ఎక్కువగా ఉంటుంది. ఈ తేమ వల్ల ఫ్యాన్ రెక్కలపై పేరుకుపోయే దుమ్ము కాస్త జిగటగా, మందపాటి పొరలా మారుతుంది. ఈ తడి దుమ్ము వల్ల ఫ్యాన్ రెక్కల బరువు సాధారణం కంటే ఎక్కువగా పెరుగుతుంది. బరువు ఎక్కువవడం వల్ల మోటార్‌పై ఒత్తిడి పడి ఫ్యాన్ స్పీడ్ క్రమంగా తగ్గిపోతుంది. కాబట్టి వారానికి ఒకసారి ఫ్యాన్ రెక్కలను పొడి కాటన్ గుడ్డతో శుభ్రంగా తుడవాలి. రెక్కలు తేలికైతే ఫ్యాన్ స్పీడ్ ఆటోమేటిక్‌గా పెరుగుతుంది.

బ్లేడ్ల అలైన్‌మెంట్

ఫ్యాన్ ఇచ్చే గాలి పూర్తిగా దాని రెక్కల అమరికపైనే ఆధారపడి ఉంటుంది. ఫ్యాన్ గదిలో తిరుగుతున్నప్పుడు లేదా క్లీన్ చేస్తున్నప్పుడు అనుకోకుండా దాని రెక్కల అలైన్‌మెంట్ మారే అవకాశం ఉంది. ఏదైనా ఒక రెక్క కాస్త పైకి లేదా క్రిందికి వంగిపోయినా ఫ్యాన్ ఊగుతూ తిరుగుతుంది కానీ గాలి క్రిందికి రాదు. అందువల్ల అన్ని రెక్కలు ఒకే లెవెల్‌లో సమానంగా ఉన్నాయో లేదో చూసి, వంగిపోయిన రెక్కలను సరిచేయాలి.

బలహీనమైన కెపాసిటర్

ఫ్యాన్ స్పీడ్ తగ్గడానికి 90శాతం కారణం అందులోని కెపాసిటర్ బలహీనపడటమే. కాలం గడిచేకొద్దీ కెపాసిటర్ సామర్థ్యం తగ్గిపోతుంది. దీనివల్ల ఫ్యాన్ 5వ నంబర్ స్పీడ్‌లో పెట్టినా కూడా 2 లేదా 3వ నంబర్ స్పీడ్‌లోనే తిరుగుతుంది. మీ ఇంట్లో కూడా ఫ్యాన్ చాలా స్లోగా తిరుగుతుంటే.. వెంటనే ఒక ఎలక్ట్రీషియన్‌ను పిలిపించి కెపాసిటర్ చెక్ చేయించండి. చాలా తక్కువ ఖర్చులోనే కొత్త కెపాసిటర్ మార్చడం ద్వారా ఫ్యాన్ మళ్లీ సూపర్ స్పీడ్ అందుకుంటుంది.

గ్రీసింగ్ – వైరింగ్

మోటారు వాహనాలకు సర్వీసింగ్ చేసినట్లే.. సీలింగ్ ఫ్యాన్లకు కూడా సమయానుకూలంగా సర్వీసింగ్ అవసరం. కాలక్రమేణా ఫ్యాన్ లోపల ఉండే గ్రీస్ ఎండిపోవడం లేదా వైరింగ్ బలహీనపడటం జరుగుతుంది. ఫ్యాన్ తిరుగుతున్నప్పుడు కిర్ కిర్ మంటూ శబ్దం వస్తుంటే లోపల గ్రీస్ లేదా ఆయిల్ తగ్గిందని అర్థం. టెక్నీషియన్ ద్వారా మోటార్‌కి గ్రీసింగ్ చేయించడం వల్ల పాత ఫ్యాన్ అయినా సరే ఎలాంటి శబ్దం లేకుండా వేగంగా తిరుగుతుంది.

ఈ వర్షాకాలపు ఉక్కపోత నుండి ఉపశమనం పొందేందుకు అనవసరంగా కొత్త ఫ్యాన్ కొని డబ్బులు వృథా చేసుకునే కంటే.. ముందుగా ఈ 4 చిన్న చిట్కాలను పాటించండి. సమయానికి ఫ్యాన్ మెయింటెనెన్స్ చేసుకుంటే రూమ్ అంతా మంచి గాలి రావడంతో పాటు విద్యుత్ కూడా ఆదా అవుతుంది.