Chicken Chinthamani: విలేజ్ స్టైల్‌లో ‘చికెన్ చింతామణి’.. ఇలా వండితే ప్లేట్లు ఖాళీ అవ్వాల్సిందే!

వంటలో కొత్త వారైనా సరే, సులభంగా తయారు చేసుకునేలా ఈ ప్రత్యేక రెసిపీ ఇది. అయితే తక్కువ మసాలాలతోనే మంచి రుచిని ఆస్వాదించాలనుకునే వారు దీన్ని తప్పక ట్రై చేయాల్సిందే. మరి ఈ టేస్టీ చింతామణి చికెన్ ఎలా చేస్తారు.. దాని తయారీ విధానం గురించి ఇప్పుడు తెలుసుకుందాం.

కావలసిన పదార్థాలు:

కంట్రీ చికెన్ (నాటుకోడి) – 1 1/2 కిలోలు

ఎర్ర మిరపకాయలు (ఎండుమిర్చి) – 150 గ్రాములు

చిన్న ఉల్లిపాయలు – 250 గ్రాములు (సన్నగా తరిగినవి)

వేరుశనగ నూనె – 50 మి.లీ.

వెల్లుల్లి – 10 రెబ్బలు (ముక్కలు చేసినవి)

టమోటాలు – 2 (తరిగినవి)

కొబ్బరి ముక్కలు – 2 గుప్పెళ్ళు

జీలకర్ర – 2 టీస్పూన్లు

నువ్వుల నూనె – 1 టేబుల్ స్పూన్

కారం పొడి – 1/2 టీస్పూన్

కరివేపాకు – 1 కట్ట

పసుపు – చిటికెడు

ఉప్పు – రుచికి సరిపడా

నీరు – అవసరమైనంత

తయారీ విధానం:

ముందుగా ఎర్ర మిరపకాయల (ఎండుమిర్చి) నుంచి కాడలు, గింజలు తీసివేసి వాటిని పొడవుగా ముక్కలు చేసుకోవాలి.

స్టవ్ మీద పాన్ పెట్టి వేరుశనగ నూనె పోయాలి. నూనె వేడెక్కాక సిద్ధం చేసుకున్న మిరపకాయ ముక్కలు వేసి బాగా వేయించాలి.

తర్వాత సన్నగా తరిగిన చిన్న ఉల్లిపాయలు వేసి, కొంచెం ఉప్పు చల్లి బంగారు రంగు వచ్చేవరకు వేయించాలి.

అందులోనే వెల్లుల్లి ముక్కలు వేసి పచ్చి వాసన పోయేవరకు వేయించి, ఆపై తరిగిన టమోటాలు వేసి అవి మెత్తబడే వరకు మగ్గనివ్వాలి.

ఇప్పుడు కడిగి పెట్టుకున్న నాటుకోడి మాంసాన్ని కొంచెం పసుపుతో కలిపి పాన్‌లో వేసి 3 నిమిషాల పాటు బాగా కలపాలి.

తర్వాత కారం పొడి, కొబ్బరి ముక్కలు వేసి చికెన్ మునిగే వరకు నీరు పోసి మూత పెట్టాలి. చికెన్ మెత్తగా ఉడికే వరకు (సుమారు 20-25 నిమిషాలు) ఉడికించాలి.

నీరంతా ఎండిపోయిన తర్వాత, చేతితో నలిపిన జీలకర్ర వేసి మరో 3 నిమిషాలు ఉడికించాలి.

చివరగా నువ్వుల నూనె వేసి, కరివేపాకు చల్లి మాంసం బంగారు గోధుమ రంగులోకి వచ్చే వరకు వేయించాలి.

అంతే! నోరూరించే పల్లెటూరి రుచితో ‘చికెన్ చింతామణి’ సిద్ధం. దీనిని వేడివేడి అన్నం లేదా రసంతో కలిపి తింటే ఆ మజానే వేరు.