రోజూ అవే పూరీలు ఏం తింటారు..ఓ సారి ఇలా ట్రై చేయండి..హెల్దీ, టేస్టీ మూంగ్దాల్ పాలక్ పూరీ మీ కోసమే..
మార్నింగ్ బ్రేక్ఫాస్ట్ తయారీ అంటే దాదాపు అందరూ తల్లులకు పెద్ద తలనొప్పిలాగే ఉంటుంది.. ఎందుకంటే.. ఇంట్లో పిల్లల నుంచి పెద్దల వరకు ఒకే రకం టిఫిన్ పెడితే ఒప్పుకోరు.. ఒక్కోక్కరూ ఒక్కోటి అడుగుతుంటారు.. అలాంటి టైమ్లోనే ఇలా కొత్త రుచితో పాలకూర, పెసరపప్పు పూరీలు చేయండి..! ప్రతిరోజూ చేసుకునే సాధారణ పూరీల కంటే భిన్నంగా, ఆరోగ్యకరమైన పద్ధతిలో రుచికరమైన మూంగ్దాల్ పాలక్ పూరీని సులభంగా తయారు చేసుకోవచ్చు. పిల్లల లంచ్ బాక్స్లోకి, టిఫిన్ సమయానికి లేదా పండుగల వేళ ప్రత్యేక వంటకంగా ఈ పూరీలు ఎంతో అనువుగా ఉంటాయి.
పొద్దున బ్రేక్ ఫాస్ట్ అయినా లేదా సాయంత్రం పూట ఏదైనా ప్రత్యేకమైన రుచిని ఆస్వాదించాలనుకున్నప్పుడు మూంగ్దాల్ పాలక్ పూరీ సరైన ఎంపిక. సాధారణ పూరీలతో పోలిస్తే ఇది మరింత రుచికరంగా ఉండటమే కాకుండా ఆరోగ్యాన్ని పెంపొందించడంలోనూ కీలక పాత్ర పోషిస్తుంది. పెసరపప్పు, పాలకూర కలయిక వల్ల ఇది ప్రొటీన్లు, ఫైబర్ నిండిన బలవర్ధకమైన ఆహారంగా మారుతుంది.
కావలసిన పదార్థాలు:
గోధుమ పిండి: 2 కప్పులు
పెసరపప్పు: 1/2 కప్పు (కనీసం 2 గంటలు నానబెట్టినది)
పాలకూర తురుము/పేస్ట్: 1 కప్పు (తేలికగా ఉడికించినది)
పచ్చిమిర్చి: 2
అల్లం: చిన్న ముక్క
వాము (అజ్వైన్): 1/2 స్పూన్
జీలకర్ర, పసుపు, కారం: తగినంత
ఉప్పు: రుచికి సరిపడా
నూనె: వేయించడానికి సరిపడా
తయారీ విధానం:
ముందుగా నానబెట్టిన పెసరపప్పు, ఉడికించిన పాలకూర, పచ్చిమిర్చి, అల్లం ముక్కలను మిక్సీ జార్లో వేసి మెత్తటి పేస్ట్లా రుబ్బుకోవాలి. ఒక పాత్రలో గోధుమ పిండి తీసుకుని అందులో రుబ్బిన మూంగ్దాల్-పాలకూర పేస్ట్, వాము, జీలకర్ర, పసుపు, కారం, రుచికి సరిపడా ఉప్పు, ఒక స్పూన్ నూనె వేయాలి. పదార్థాలన్నీ పిండికి పట్టేలా కలిపి, అవసరమైతే కొద్దిగా నీరు చేర్చి పూరీ పిండిలా కాస్త గట్టిగా కలుపుకోవాలి. పిండిపై మూత పెట్టి 10-15 నిమిషాలు నాననివ్వాలి.
కలుపుకున్న పిండిని చిన్న చిన్న ఉండలుగా చేసి, పూరీపీటపై కొద్దిగా నూనె రాసి మందంగా ఉండేలా పూరీలను ఒత్తుకోవాలి. బాణలిలో నూనె బాగా వేడెక్కిన తర్వాత ఒత్తుకున్న పూరీలను వేసి, రెండు వైపులా దోరగా కాలే వరకు వేయించి తీయాలి. అంతే, వేడి వేడిగా హెల్దీ, టేస్టీ మూంగ్దాల్ పాలక్ పూరీలు సిద్ధం!
ఆరోగ్య ప్రయోజనాలు:
పాలకూరలో ఐరన్, ఫోలిక్ యాసిడ్ పుష్కలంగా ఉంటాయి, ఇవి రక్తహీనతను నివారిస్తాయి. పెసరపప్పు సులభంగా జీర్ణమయ్యే ప్రొటీన్ను అందిస్తుంది. పిల్లలు సాధారణంగా ఆకుకూరలు తినడానికి ఇష్టపడరు, అలాంటి వారికి ఈ విధంగా పూరీల రూపంలో చేసి పెడితే ఇష్టంగా తింటారు. ఈ వేడివేడి మూంగ్దాల్ పాలక్ పూరీలను పెరుగు, ఆవకాయ లేదా బంగాళాదుంప కూరతో కలిపి తింటే రుచి అద్భుతంగా ఉంటుంది!
మరిన్ని లైఫ్ స్టైల్ న్యూస్ కోసం క్లిక్ చేయండి..