5 నిమిషాల్లో సూపర్ బ్రేక్ఫాస్ట్.. ప్రోటీన్ల గనితో రోజంతా ఫుల్ ఎనర్జీ!
నేటి ఉరుకుల పరుగుల జీవితంలో ఆరోగ్యకరమైన, అదే సమయంలో రుచికరమైన ఆహారాన్ని ఎంచుకోవడం చాలా ముఖ్యం. ముఖ్యంగా బరువు తగ్గాలనుకునే వారు, జిమ్కు వెళ్లేవారు అధిక ప్రొటీన్లు ఉండే స్నాక్స్ కోసం వెతుకుతుంటారు. అలాంటి వారి కోసం ఒక సులభమైన, పోషకాలతో కూడిన దేశీ వంటకం నల్ల శనగల చాట్ (Kala Chana Chaat). దీన్ని కేవలం కొన్ని నిమిషాల్లోనే ఎలాంటి నూనె లేకుండా చాలా హెల్తీగా తయారు చేసుకోవచ్చు. తయారీ విధానం, ఆరోగ్య లాభాలేంటో ఇప్పుడు చూద్దాం...
Updated on: Jun 05, 2026 | 7:34 AM
ఆరోగ్యకరమైన ఆహారాన్ని డైట్లో చేర్చుకోవాలనుకునే వారికి నల్ల శనగల చాట్ (కాలా చనా చాట్) ఒక అద్భుతమైన ఎంపిక. కేవలం కొన్ని నిమిషాల్లోనే ఇంట్లో లభించే వస్తువులతో ఈ పోషకాల గనిని సిద్ధం చేసుకోవచ్చు. నల్ల శనగల్లో ప్రొటీన్లు, ఫైబర్ పుష్కలంగా ఉండటం వల్ల ఇది బరువు తగ్గడానికి, రోగనిరోధక శక్తిని పెంచడానికి ఎంతో సహాయపడుతుంది. ఈ హెల్తీ చాట్ తయారు చేయడం కూడా చాలా సులభం. మొదట నల్ల శనగలను రాత్రంతా నీటిలో నానబెట్టాలి. మరుసటి రోజు ఉదయం కొద్దిగా ఉప్పు వేసి కుక్కర్లో 4 నుండి 5 విజిల్స్ వచ్చే వరకు ఉడికించుకోవాలి.
ఉడికించిన శనగలను ఒక గిన్నెలోకి తీసుకుని చల్లార్చాలి. ఇప్పుడు ఇందులో సన్నగా తరిగిన ఉల్లిపాయ ముక్కలు, టమోటా ముక్కలు, పచ్చిమిర్చి, కొత్తిమీర తరుగు వేయాలి. మరింత రుచి కోసం కొద్దిగా ఉడికించిన బంగాళాదుంప ముక్కలు లేదా దోసకాయ ముక్కలను కూడా చేర్చుకోవచ్చు. చివరగా రుచికి సరిపడా ఉప్పు, వేయించిన జీలకర్ర పొడి, కొద్దిగా కారం, ముఖ్యంగా చాట్ మసాలా చల్లుకోవాలి. వీటన్నింటిపై అర దబ్బ నిమ్మరసాన్ని పిండి, బాగా మిక్స్ చేస్తే నోరూరించే చనా చాట్ సిద్ధమౌతుంది.
ఇందులో ఫైబర్ (పీచు పదార్థం) ఎక్కువగా ఉండటం వల్ల కొద్దిగా తిన్నా కడుపు నిండినట్లు అనిపిస్తుంది. ఇది అతిగా తినడాన్ని నివారించి బరువు తగ్గడానికి దోహదపడుతుంది. నల్ల శనగలు జీర్ణవ్యవస్థను శుభ్రపరచడంలో, మలబద్ధకం వంటి సమస్యలను దూరం చేయడంలో కీలకంగా పనిచేస్తాయి.
నల్ల శనగల్లోని యాంటీఆక్సిడెంట్లు, ఫోలేట్, మెగ్నీషియం కొలెస్ట్రాల్ స్థాయిలను అదుపులో ఉంచి గుండెను ఆరోగ్యంగా ఉంచుతాయి. లో-గ్లైసెమిక్ ఇండెక్స్ కలిగి ఉండటం వల్ల ఇది డయాబెటిస్ (మధుమేహం) ఉన్నవారికి బెస్ట్ మిడ్-డే స్నాక్ అని చెప్పవచ్చు. ఎలాంటి నూనె లేకుండా, కేవలం ఇంట్లో ఉండే కూరగాయలు, మసాలాలతో తయారయ్యే ఈ నల్ల శనగల చాట్ మీ టీ టైమ్ స్నాక్గా లేదా ఆఫీస్ లంచ్ బాక్స్ స్నాక్గా అద్భుతంగా సరిపోతుంది. ఆరోగ్యకరమైన జీవనశైలిని అలవర్చుకోవాలనుకునే వారు ఈ రోజే దీనిని తమ డైట్లో భాగం చేసుకోవచ్చు.
మరిన్ని లైఫ్స్టైల్ వార్తల కోసం ఇక్కడ క్లిక్ చేయండి..
